Toe manatu tasi lava...Filifili lou taunu’uga

By Fa’aliliu e Maiava 25 July 2016, 12:00AM

Toe mafaufau tasi lava…Sa fufulu le ta’avale a le isi ali’i, e fa’aaoga ai se palasi-fa’apitoa, a’e te’i i le fai atu o se teineititi sa matamata iai: “E iai le palasi fa’apena a lo’u tama e fufulu ai fo’i lana ta’avale.” “E mo’i!” o le fesili lea a le ali’i.

“O le a le ituaiga e iai le ta’avale a lou tama?” Tali le teineititi: “’Oi, e leai sana ta’avale, ae iai lana pulumu e fufulu ai.” Ioe, e tatau lava ona iai se amataga o so’o se mea! O le mea taua lava, o le amata. O le mea e fai, o le filifili po’o le a le ituaiga soifuaga tatou te manana’o ai. Ae malie fo’i la, ona o le to’atele o tatou e manana’o e ola-ola ai pea e aunoa ma le iloa o le mea e fai i le soifuaga nei! Silasila fo’i i le ali’i lea na fa’apea: “E sili loa pe a ta’atia ia nei mea uma, se’i o’o taeao.”  

Silasila fo’i, tusa lava pe ua fai e isi tagata fa’ai’uga mo ‘Oe, e tatau lava ona e mafaufau lelei, pe fa’apei ona e tali atu ma fa’atino le olaga ua tu’u-lima atu i ou a’ao. E pule lava ‘Oe i lau faitalia. O lau lava lea filifiliga e maua ai lou fiafia, tusa lava po’o gafea o e iai a’o a fo’i tulaga o lua feagai. Manatua, e te maua lava isi tagata e sili atu le vaivai ma fa’aletonu, e mafai ona e fesoasoni iai. Fa’atoa tatou maua lava le fiafiaga sili, pe a ta’atia o tatou lava fa’afitauli, ae a’apa atu i mea o mafatia ai isi tagata ia fa’afiafiaina ai.

Ae a leai loa sau fa’ai’uga e fai i se mea, o lau fa’ai’uga lava lena o le a e ola ma ‘Oe. E anoanoa’i tagata atamamai ma talenia e le o matua fiafia i a latou taumafaiga o fai nei, talu ai, le le-faia o se fa’atatau lelei ma taumafai e fa’atino ia taunu’u. 

Manatua, a lē-suia lou olaga, o le a e tumau ai lava i le mea e tasi! E faigofie a. Ina ia se’e-‘ese la mai le tulaga o e iai nei, mafaufau muamua i le mea tonu o fia aga’i iai. A le-mafai ona suia lou mafaufau, e le taitai  fo’i suia lou olaga. “O le taimi lava e sui ai, e uma ai fo’i ma ‘upu!”

Fai mai le tusitala lauiloa o Tolstoy: “Ua manana’o tagata e sui le lalolagi, ae leai ma se tasi e mana’o e suia ia lava.” Fesili ‘Oe ia ‘Oe i le taimi nei: O le a le mea sili ‘ou te mo’omia ia suia ai lo’u olaga? E malo lava lou tatalo i lo tatou Fa’aola, e pulea atoa e Ia lou soifua i aso uma. O le Mana Fa’aola o Iesu Keriso, lau filifiliga sili e suia ai ‘Oe ma e maua ai le ola fou e te mo’omia. O le mea moni, e filifili lava e ‘Oe lou lumana’i, i le asō. Toe mafaufau tasi lava…                                                    

By Fa’aliliu e Maiava 25 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>