Fa’ataua le faifa’ato’aga
E tatau lava i le malo ona savalia ia latou tala e fai.
O fua o fa’ato’aga o le ivi malosi lea a le tatou atunu’u ma e tatau lava ona tele le tupe e fa’aalu ai i lona atina’eina.
O le manatu fa’alia lea a Fili Fale mai Leulumoega.
Sa fai galuega toto a lenei tama ina ua maua atu o ia e le Fofoga o Samoa.
“O a’u sa ou faigaluega muamua ma e umi fo’i se taimi a’o o’u faigaluega,” o lana tala lea.
“Ae peita’i e tatou te o’o uma lava i se taimi e lagona ai fo’i le fia malolo."
“O lea la ua fai sina leva talu na ou galue i le fa’ato’aga."
“O ma’umaga e tele le latou aoga i tagata Samoa. Ia a’u a ia, e lelei le ma’umaga aua e pule a ita i lata taimi faigaluega."
“E taua aua e maua ai a tatou mea’ai."
“Ma e taua fo’i aua e maua ai se seleni."
“Ae e lelei a la pea fa’atau atu i le maketi ae o iinei le matou nu’u e tau le lelei tele se tupe maua mai ai pea fa’atau ai."
“E lelei a ae e iai fo’i ni suiga laiti la lea i le itu o le seleni e maua mai ai, aua e pei o aso la e tele atu ai se seleni e maua mai ai."
“Ao lenei vaitaimi, ia o le tele a o taimi e fa’atau atu ai tau talo i le ta’i $20."
“Ma o lesi fo’i maitau atu, o le to’atele a o tagata ua nonofo mai galuega ae ave uma le latou malosi i le tau atina’eina o fa’ato’aga."
“Ae o a’u a ia ma lo’u manatu ma lo’u talitonuga, e sili atu ai le fa’aoga o fua o fa’ato’aga e tausi ma fafaga ai lou aiga.”