Ua lapata’ia le Sui Fofoga Fetalai e uiga i fesoasoani

Tusia Staff Writer ma Faaliliu e Seagaitumua Tupuola ,

145 Hits

Nafo’itoa Talaimanu Keti.

Nafo’itoa Talaimanu Keti.

O le Sui Fofoga Fetalai ma o se Sui Usufono fou o le Palemene mo Gaga’emauga Nu.3, o Nafoitoa Talaimanu Keti, na ia taina logo  o le faailoilo ananafi, e ala i lona lapata’ina o le malo e faapea e le mafai e Samoa ona faalagolago i fesoasoani mai fafo e faavavau. 

Ma ona o lea ua pulato’a le atunuu i se aitalafu i fafo e sili atu i lo le $1.5 piliona, fai mai Nafoitoa-e matua taua tele mo le Palemene ma le malo ona ta’iala pe a pa’ia le faaupuga “ia soifua e tusa ai ma mea o loo mafai ona maua.” “O le fesoasoani mai Fafo e matua lelei tele ma tatou te matua faafetaia lava-ae tatau ona tatou manatua e o’o mai le taimi e faamuta ai lea fesoasoani,” o lana faaaliga lea. 

“Tatou te manaomia uma lava le soifua e tusa ai ma mea ua tatou maua.” Ina ia mafai ona faatino lea tulaga, fai mai Nafoi o loo i ai se mana’oga ina ia faaitiitia le nonŏ mai o tupe ma ia una’ia o tatou tagata ina ia faatino le latou pitolaau tau le atiina a’e o Samoa. 

Na te le’i faamalamalamaina lana mataupu.

Ae peitai-na faaalia e le Sui Usufono o le Palemene ia manatu i totonu o lana saunoga faa-taupou i Tuana’imato ananafi. Na tauaofia le Palemene i le Aso Lulu e talanoaina le tala o le tupe a le MInisita o Tupe, o Sili Sala Epa e $894 miliona lea o loo faamamafa ai le noataga mo le malo ma tagata lautele o le atunuu.

I lana saunoaga i le Maota, sa viia e le Sui Fofoga Fetalai le faaiuga a le Minisita o Sili ina ia ave le faamamafa i le tuufaatasia o tupe a le malo, ma le pulea lelei o tupe faaalu.

 “Ou te fia faafetaia le Minisita o Tupe mo lana tala o le tupe,” o le faaaliga lea a Nafoi. “E matua taua tele ona faamamafa le tulaga moni o le soifuaga e tusa ai ma mea tatou te maua,”

E ese ai mai tupe a le malo, na talosagaina foi e Nafoi le Minisita o Puna’oa Faale-Natura ma le Siosiomaga, o Fiame Naomi Mataafa ina ia asia lona itumalo ina ia mafai ai ona silasila i le tulaga afaina o le siitia o le maualuga o le suasami i o latou matafaga. I Matautu, e le o lilo le tele o atiina a’e tau fale talimalo ma galuega tetele tau fale i luga o le matafaga o loo i ai,” o lana faaaliga lea. Na ‘ou tupu a’e i totonu o lea vaega-eleele ma e tumau pea lo’u mitamita i le mea moni e faapea e i ai o tatou matafaga matagofie.O le mea lenei o loo faatosina mai ai turisi i Samoa. “O le itu e faanoanoa ai, o le fua faatatau o le maualuga o le sami ua matua uiga ese le vaai i ai ma ua tafea matafaga. Matou te manaomia le lagolago a le malo. O lea ua ‘ou valaauina ai le Minisita o le Siosiomaga e afio atu ma o le a matou talimalo ia te ia, O le a matou faaali ia te ia le tulaga leaga o lea itu.”

Fai mai Nafoi o lona itumalo e faalagolago tele i tupe mai le turisi ae o le suiga o le tau, aemaise ai lava le tafia o matafaga, o se lu’itau maoa’e lea e manaomia ai se faiga faanatinati mai le malo.

O le mataupu tau le faamalosia o le tulafono, na talosagaina e le sa avea muamua ma Leoleo le toe faaolaolaina o le mea sa ta’ua o se Faamasinoga e mafai ona feasiasia’i. Fai mai a ia-sa i ai se faiga faapena i aso ua mavae a’o faamasinoina tagata solitulafono i totonu o laltou nuu.. Sa i ai le tulaga tau le fefe e tusa ai ma tagata solitulafono ia e taofia i latou mai nisi solitulafono ma o ia faamasinoga e tatau ona toe fai, o le faaaliga lela a le Sui Usufono o le Palemene.  Sa sailia foi e le Sui Fofoga Fetalai se fesoasoani mai le Minisita o Galuega, Fela’uaiga ma Galuega Tetele, o Papalii Niko Lee Hang, mo auala galue, fai mai Nafoi o loo tauivi tagata o lona itumalo ina ia ‘ausia a latou faatoaga, ia latou te faalagolago  ai, mo a latou tupe maua i aso uma.  Ae peita’i-e le na o Nafoi le Sui Usufono o le Palemene sa na tapā le malo ina ia faaleleia auala galue. I Falealili Sasa’e, na fai foi lea lava talosaga e le isi Sui Usufono fou o le Plemene o Fuimaono Te’o Samuele . I Salani, sa ta’ua e Fuimaono e faapea o ia auala ua i se tulaga faigata lo latou fausia lea e manaomia mo femalagaiga a turisi. O Taligalu, na ia ta’ua o loo matua manaomia tele i Salesatele, Sapo’e ma Utulaelae ina ia faaitiitia ai le afaina i le siitia o le maualuga o le suasami.

E tusa ai ma le soifua maloloina –sa talosagaina e Fuimaono se Nofoaga Tau le Soifua Maloloina ina ia faavaeina e tali atu ai i mataupu e lei ma’i suka ma le faafoeina o Faama’i Le Pipisi, e taofia ai le faatumulia o le Falema’i Faa-Itumalo i Poutasi.. O le mataupu mulimuli –na talosagaina e Fuimaono se malae lakapi fou e fai i Salani. 

Sa faamanatu atu e Fuimaono e faapea o Falealili o le nuu lea o le Manu Samoa ma o le mea moni e faapea ua leva ona taumafai le ‘au talu ai nei nei ona o le toesea o tama taalo mai lo latou itumalo.

Sa na faamanatu i le Minisita o A’oga, Taaloga ma Aganuu, o Loau Keneti Sio, e faapea, e faapea ua leva ona tofia o ia mo se faamoemoe, fai mai Fuimaono o loo i ai se mana’oga faanatinati e faatino le fausaga sa’o e ati a’e ai le lakapi mai le amataga i Falealili. Na ia toe ta’ua e faapea e atau i le malo ona tilotilo i le siitia o isi taaloga e aofia ai ma isi taaloga i le malae e pei o le togi pulu mamafa, o le ipu salafalafa ma le malosi-e faasino i taaloga  ia e maoa’e ai tagata taaalo a Samoa. 

© Samoa Observer 2016

Developed by Samoa Observer in Apia