O se vaitaimi ua tele ai fa’alavelave

Tusia Aruna Lolani ma Fetalai Tuilulu’u ,

95 Hits

Malaga Sio mai le nu’u o Lele’a Luatuanu’u.

Malaga Sio mai le nu’u o Lele’a Luatuanu’u.

O le fa’atalatalanoaga a le Fofoga o Samoa ma se tasi o tama mai Luatuanu’u; Malaga Sio sa ia fa’alia ai lona manatu fa’atatau i le tele o suiga i lenei vaitaimi.

E 63 le matua o le soifua o lenei tama ma na aga’i atu o ia i se fonotaga a lona aiga i se tasi o latou fa’alavelave ina ua maua atu e le Fofoga o Samoa.

“O lo’u va’ai i lenei taimi, ua ova le tele o mea fai a tagata Samoa.  

“O le mea loua iai, ua si’i a lesi fa’alavelave i luga o lesi fa’alavelave ma ua atili le lava ai a le fa’asoa.”

Sa ta’ua e Malaga le taugata o le soifuaga ma ua tele ai a mataupu ua lotea ai lenei sini autu o le seleni.

“O le olaga fa’a Samoa lava ua le toe suia, ua alu lava i le mea sa amata mai iai,” o lana tala lea.

“Fai o le tele o saogatupe ma le tele o mea e tatau ona fai ae ua faigata fo’i le su’ega o le galuega.

“O le saputu mai o nei mea uma ua tele ona fa’amamafaina ai mafaufau o tagata aua le tau su’eina o le tupe.”

Sa fa’apea fo’i Malaga o le tausi-aiga a e talitonuina e tagata Samoa ma o le isi itu na e tatau lava ona fa’ataunu’uina ni mea e tu’u mai i so’o se tagata.

“Ua tele fa’alavelave i le mafaufau ma ua le iloa fa’avasega.

“E le o se olaga faigofie ma ou te le iloa fo’i pe e toe o’o i se tulaga faigofie.

Sa fa’apea mai Malaga o le olaga lava lea o se tagata Samoa ma o le tau lava ia fai ai le loto fai mea mafai ina ia fa’ataunu’uina.”

© Samoa Observer 2016

Developed by Samoa Observer in Apia