Ua fa’aitiitia i’a e maua – Lata Asuelu

Tusia Aruna Lolani ma Fetalai Tuilulu’u ,

110 Hits

Le fiafia i le tulaga ua o’o iai le sami ma faifaiva:  Lata Asuelu mai Luatuanu’u.

Le fiafia i le tulaga ua o’o iai le sami ma faifaiva: Lata Asuelu mai Luatuanu’u. (Photo: Aruna Lolani)

O le fa’atalatalanoaga a Lata Samuelu ma le Fofoga o Samoa sa ia fa’alia ai se manatu fa’apea ua faigata le su’eina o ni i’a i le latou itu sami.

O se tama mai Luatuanu’u o ia ma sa ia fa’apea “ua le toe tutusa lava le tulaga o le sami i le taimi nei ma aso ua te’a.

“Ua tau fiu e su’e ni i’a o le sami i lenei taimi ua tau leai se mea e maua, e mafua mai lava i tagata fagogota po’o faifaiva o le po.

“O le itu’aiga fagota lea e fai o le susulu o moli ae toe tasua uma i luga amu ma nofoaga o lo’o nonofo ma momoe ai i’a.

“E uma ifo a ua le toe iai se meaola e fia nofo lata mai ii aua ua leiloa po’o fea o le a nonofo ai.

“E maua ai la i’a a le au fagota i le po ae leai se i’a e maua e matou ia e fa’aogaina neti mo o latou fagotaga.

“Ia a leai ma’umaga e tua iai, o le sami lesi mea e tua iai mo mea’ai mo aiga i isi taimi.

“A tele fo’i i’a e maua, e fa’atau mo se tupe maua ae o le tupe lelei fo’i e maua mai faiva, ae a le lava ia e fa’aoga lava mo mea’ai.

“Ae peita’i ua tau le toe tele ni i’a e maua i le neti mo matou nei mafua mai lena tulaga.

Sa fa’apea Asuelu e tatau lava ona iloa e le au fai faiva e to’atele a aiga Samoa o lo’o fa’alagolago i le sami mo mea’ai, ma e tatau ona fai fa’alelei le sami ma fanua aua e le faigofie le galuega.

“O lea na fa’apea o se aso lelei e pu’e ai ni i’a aua se mea’ai ae leai, ua ta fiu fo’i e su’e ua leai se mea e maua.”

© Samoa Observer 2016

Developed by Samoa Observer in Apia