Talosagaina e se tina se vai

Tusia Aruna Lolani ma Fetalai Tuilulu’u ,

87 Hits

E mana’omia le vai mo galuega fai: Tasileta Limu mai Fusi, Safata.

E mana’omia le vai mo galuega fai: Tasileta Limu mai Fusi, Safata. (Photo: Fetalai Tuiluluu)

O le vai e mana’omia mo galuega fai ma e mana’omia mo le ola ae peita’i o se itu lea o lo’o mafatia ai tagata Samoa i le tau su’eina.

O le manatu fa’aalia lea a se tina, 55 le matua o lona soifua, Tasileta Limu mai Safata i le Fofoga o Samoa.

Sa maua atu lenei tina a’o fai lana tagamea i le vaitafe tala ane o lona maota. 

Ina ua fesiligia o ia i le tulaga o le latou vai po’o paipa, sa ia fa’apea mai o lo’o pe le paipa ma o le mafua’aga lena o lo’o fai ai lana tagamea i le vaitafe.

“O le matou nu’u e fa’aaoga le puna pe’a mana’omia le vai,” sa ia fa’apea mai.

“Ua leva la ona iai lena puna ae a fa’apea e le tumu le fa’atanoa puna lea, e leai fo’i se matou vai e maua.

“E fa’atali a la se’i tumu.

“O le vai fo’i po’o le puna lea, e le au i gutu o paipa aua fo’i e le masau le alu o le vai.

“E fa’aaoga la e tagata ofe aua le fa’asau ai fafo le vai mai le puna.

“A o’o i taimi e timu ai, ona palapala fo’i lea o le vai, ae o le vai lea e tele na feinu ma aumai ai vai e fai ai mea’ai. 

“E le lelei la lenei tulaga aua e mama’i ai tagata ma e le fa’apea o aso uma e maua uma ai vai.

“E mama a le matou vai aua ua uma ona siakiina e le Soifua Maloloina ae e leaga lava pea o’o i vaitaimi timuga.

“A tumu a la le fa’atanoa po’o le puna vai lea, e lua a vaiaso mo le vai lena ua maua.

“Ae o le tele o taimi, e o a tagata e su’e po’o fea lae gata ai le alu a le vai, ona sulu ai lea o o latou ofe ae fa’aaoga aua e le ola ni paipa mai le alu laitiiti ole vai. 

© Samoa Observer 2016

Developed by Samoa Observer in Apia