Saunoa Mulipola:“ E le o se vavega,”

Tusia Deidre Fanene ma Fa’aliliu e Maiava ,

244 Hits

Ua te’a-‘ese atu le Afā o Amosa ma Samoa, ae  o lo’o tu’u-fesilisili pea le to’atele, “O le a ea le mea na tupu, se vavega ea? 

E ‘ese’ese uma ma fete’ena’i ripoti mai le Pasefika ma le lalolagi, ua le-manino ai le mea tonu na tupu. 

O nisi o nei fenumia’i e afua mai lava i tala sa tu’uina mai e le Ofisa Va’ai Tau i Mulinu’u, lea na fa’apea mai, o le mata (ogatotonu-galēmū) o le Afā o Amosa, sa i luga tonu o Samoa. 

Peita’i, e ta ane le lua i le vaveao o le Aso Sa, ua leai se mea. Ua lalafo savili ma ua to’amalie le lalolagi o Samoa. 

Na fa’ailoa mai e Mulipola Ausetalia Titimaea, le Ofisa Lagolago o le Matagaluega, o le Ta’ita’i fo’i o le Ofisa Va’ai-Tau i Mulinu’u i le Samoa Observer e fa’apea, e le o se vavega na tupu, o le fa’amalamalamaga faigofie lava, “o le Afa o Amosa, e le o se afa o le Vaega 3 pe 4 fo’i.

“E le o se vavega la, aua o le mea na tupu, ua manatu uma tagata, o le lautele o a’afiaga o le Afa  Amosa,  e i le Afa o le Vaega 3 pe 4 fo’i,” o lana fa’aaliga lea. 

“Ae ina matou matauina le tulaga lea, e le’i o’o i se lautele o le Vaega 3 pe 4 fo’i, ma o le mafuaga lena ma matou le mulimuli ai lava i va’aiga ia fa’apea o le Vaega 3 pe 4 fo’i.

“Ae sa matou tumau lava, o  le malosi o le matagi e i le Vaega 1 po’o le 2 fo’i ma o le matou lapata’iga lena na tu’uina atu, o le Afa i le Vaega 2.

“Sa matou fa’ailoa atu lava i le isi a matou ripoti, ripoti numera 9, a o’o lava i le taimi talafeagai, o le a matou avatua lava se lapata’iga o le Vaega 3 ma sa matou tu’uina atu fo’i le taimi e talafeagai ai, i totonu o le isi 12 itula pe a suia.” 

Na saunoa fo’i Mulipola, o lapata’iga o afa na tu’uina atu, o le Afa o le Vaega 2.

“Sa matou va’ava’ai toto’a lava i le ta’avili o matagi ma matou te le’i maua vaega ia na ta’ua e nisi o vaega va’ai-tau i Nadi, le Nofoaga Va’ai Tau i Matu fa’apea fo’i le Ofisa Va’ai Tau a Niu Sila, ae sa matou tausisi lava ma fa’amautu a matou lapata’iga sa tu’uina atu i le Vaega 2,” o lana fa’aaliga lea. 

“E le’i o’o i le Vaega 3 pe 4 fo’i ae sa iai isi fa’amatalaga faigata, e le tatau ona fa’ailoa atu i le atunu’u ona e le mo tagata-lautele, e fai si lavelave ma malamalama gata i tagata.

“Ina ua o’o mai Amosa, sa vave lava ona suia mai le fitu maila le saoasaoa i le itula, i le 20 maila i le itula ina ua o’o i Savai’i. 

“Na valo’ia e ono o’o atu i le Vaega 3 po’o le Vaega 4, peita’i, e le’i fa’apena.”

 “Na fa’amaonia lava i le po o le Aso To’ona le afa ona o le malolosi o matagi latalata i le mata, sa o’o atu i le 25 – 30 note le malolosi.

O le mafuaga fo’i lea o le igoa o le afa, o le Afa o Amosa. 

“Ae le o se matagi matua malosi ona e le’i matua iloa mai le mata ma o le mafuaga lea na le-malamalama ai le to’atele o le atunu’u ona e iai lava le faiga-fa’apitoa e faitauina ai le mata o le afa lea sa mautinoa, e le’i i luga o Samoa.”

© Samoa Observer 2016

Developed by Samoa Observer in Apia