Tu’u uma iai mea ua ia te ‘Oe

By Fa’aliliu e Maiava 25 April 2016, 12:00AM

Toe mafaufau tasi lava…O e manatu e le’i lelei le amataga o lou soifuaga? O e lagona sa fa’aletonu lou amataga ua faigata ai lou soifua? Fa’afofoga lelei i le tala moni lenei atonu e aoga mo ‘Oe.

Fa’atoa 14 tausaga o le ali’i o John Herreshoff i le motu o Rhode Island i Amerika, ae nofo loa fau lana ulua’i va’a-faila: o se va’a-faila tutu’u na fa’aigoa o le Meteor. E 20 ane ona tausaga, ua mae’a ona fau le isi ana va’a na fa’aigoa o le Faustine.

O le ulua’i va’a lea o lea ituaiga na mua’i asa le Vasa Atalani i le na o le 17 aso. E atoa ane le 27 o tausaga o John, ua mae’a ona fausia o sana va’a-faila e alu i le afi na fa’aigoa o le Annie Morse. O le 37 o ona tausaga, na fa’atuina ai lana lava kamupani fau-va’a, le Fale Fau-Va’a a Herreshoff. Na tu’u-fa’atasi ma lona uso o Nathaniel ma fausia va’a-faila tutu’u ma va’a-afi-tutu’u.

I le tausaga e 1892, na lu’i ai e Egelani le Iunaite Setete mo le Ipu a Amerika, le fa’ailoga fa’ava-o-malo aupito maualuga i tu’uga-va’a-faila.

O le va’a-faila a Sir Thomas Lipton na fa’aigoa o le Shamrock sa fai ma sui o Egelani i lea tauvaga ta’uta’ua i le lalolagi. Mo Amerika, e tatau ona sa’ili se va’a aupito lelei mo lea tauvaga lea.

Leai se tagata-fau-va’a i Amerika e le’i naunau i le fia maua o lea fa’aeaea maualuga. Mulimuli ane, sa filifilia le kamupani fau-va’a a John Herreshoff, ma alo ai loa John ma lona uso o Nathaniel e tusi le ata ma fuafua le fausiga o le va’a-faila tutu’u lea na fa’aigoa o le Vigilant. Ioe, na mua le Vigilant i le tu’uaga. 

I tausaga e tele mulimuli ane, e tele va’a sa tusia ma fuafua ma fausia e John ma lona uso. A o le vaega aupito ofoofogia o lenei tala moni, ona o le ali’i lea o John, na fausia lana ulua’i va’a ae fa’atoa 14 ona tausaga… ma fa’aauau ai lava lea se’ia o’o ina ia fa’atuina nisi matati’a iloga i le lalolagi, i tu’uga-va’a-faila…o lana va’a lona lua na fau, na fa’atuina se matati’a i le Vasa Atalani…ma ana va’a na manumalo fa’alima i le Ipu a Amerika i totonu o le 10 tausaga…a’o si ali’i o John, e tauaso mai lava ina ua fa’atoa 12 tausaga o lona olaga.

Moni la sa soifua pea i le pogisa i lona olaga atoa, ae le’i taofia ai o ia mai le tu’uina atu atoa o le malosi ma le iloa e fa’ailo ai lona sao aoga mo le lalolagi. Atonu e le tutusa uma malosi’aga o tagata tagata uma, ae le fa’apea ai e le o ia te ‘Oe le mana’o ma le naunau e finau ai mo se manuia. Tatalo nei ia Iesu e pulea atoa mai e Ia lou tagata ma ou ala e ola ai. E na o Ia lava e maua ai lou fesoasoani e te fa’atino ai ma fa’ailo lou sao aoga i le lalolagi nei. Toe mafaufau tasi lava…                    

By Fa’aliliu e Maiava 25 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>