Fautuaina tiute tauave a Malu ole Malo

25 March 2018, 12:00AM

(OFISA SO’OUPU) Ua fa’amaonia e le Fono Aoao Faitulafono le Lipoti ma Fautuaga mai le Komiti o Vaega Tau le Va Fealoai, aga’i i nisi o galuega fa’atino ma le auaunaga a le Matagaluega o Leoleo.

O lea lipoti e aofia ai ni fautuaga se tolu, o lo o manino ai le alagatatau ona fa’atino mo le alualu i luma o le tautua matavela a Malu o le Malo.

O le vaega muamua na fautuaina ai e le Komiti ina ia silasila toto’a i le malosi’aga o so’o se tasi e avea ma leoleo, e aofia ai le lelei o le mafaufau, soifua maloloina le tino e aofia ai ma le itu fa’aleagaga, ina ia mautinoa le faigofie ona tali atu i taimi o galuega ogaoga e mo’omia ai le fesoasoani a le Matagaluega.

“Ia avea ma vaega o le iloiloga o galuega fa’atino (performance assessment) a leoleo i tausaga ta’itasi se tapula’a ausia mo lo latou malosi e fa’atino ai le galuega fa’aleoleo (medical & physical fitness capability)”.

O le i si vaega o le fautuaga, na manino ai le finagalo o le Komiti ina ia si’itia totogi o Leoleo, fa’atusa i le tulaga lamatia ma le soifua ofoina atu ona o le puipuiga o le saogalemu ma le ola o Samoa aoao.

“Ia silasila le Malo i totogi talafeagai mo alii ma tama’itai leoleo ona e manatu le Komiti, e tulaga ese le galuega fa’aleoleo. E fa’amoemoe i ai le malutia o tagatanu’u uma o Samoa, ma o o latou soifua ua tu’uina atu mo le puipuiga ma le saogalemu o le atunuu i so’o se taimi.”

“Silasila toto’a i totogi ma alauni talafeagai, ina ia atagia ai le taua o le auaunaga o lo o tu’uina atu e fa’atinoina e alii ma tamaitai leoleo aua le saogalemu o tagatanu’u o Samoa. Fa’amauina e le Komiti e le o totogiina ovataimi ae na o alauni (shift allowance) o lo o agava’a ai.”

I le totogi amata o lo o i ai Malu o le Malo e $11,233.00 i le tausaga, ma e le’o maua ni totogi i a latou ovataimi se’i vagana ai ua fa’aaoga e ave fa’ataimi malolo (time off) ae le totogiina.

Ma le vaega tolu na fautuaina ai e le Komiti ina ia fa’aopoopoina leoleo mo le Puleono i Salafai, e aofia ai ma le i ai ni Ta’ita’i Leoleo i Ofisa Autu uma ma Lala tuma’oti a le Matagaluega i itumalo i tua.

“Silasila toto’a i le numera mana’omia o alii ma tama’ita’i Leoleo e fa’atinoina le auaunaga i Savaii, ma e 68 le aofa’i o Leoleo o lo o galulue i Savaii e aofia ai ma le Ta’ita’i Leoleo (Superintendent) e to’atasi. E 600 le aofa’i o alii ma tama’ita’i leoleo. Afua i le faitauaofa’i o tagata Samoa e 190,000 e 1/3 o lo o afifio ma papaaao i Savaii. E ao foi la ona 1/3 le aofa’iga o alii ma tama’itai leoleo e tatau ona galulue i Savaii. Peita’i ane e na o le 68. E manatu e tatau ona le i lalo ifo o le 100 alii ma tama’ita’i leoleo e fa’atinoina le auaunaga i Savaii. E le aofia ai ni Ta’ita’i Leoleo (Superintendents) e le i lalo ifo o le lua. E tatau foi ona iai ni Leoleo Asiasi (Inspectors) e lua mo Ofisa Autu i Tuasivi ma le ta’itasi mo lala uma i nu’u i tua.”

O nei fautuaga uma, e mo le fa’aleleia atili, si’itia maualuga, ma le amanaia o le tautua a Malu o le Malo, o lo o lima taumatau i ai Samoa atoa, i le puipuiga o lo o tatou sa’olotoga ma le saogalemu fa’aletulafono.

Na amata iloiloina lenei lipoti i le aso 29 o Aukuso seia paia le aso 29 o Setema 2017, ma o Sui Faipule o le Maota Fa’apalemene a le Atunuu e aofia ai Gatoloaifaana Amataga, Leaana Ronnie Posini, Ili Setefano Taateo, Sulamanaia Fetaiai Tuivasa ma Aumua Isaia Lameko, na o latou iloiloina, su’esu’e, mata’itu ma tu’ufa’atasia lenei lipoti mo le Fono Aoao Faitulafono a Samoa.

25 March 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>