E lelei le taui o au galuega fai

By Fetalai Tuilulu’u 25 March 2017, 12:00AM

O le maua ai le fa’atalatalanoaga le Fofoga o Samoa ma le taule’alea ia Ioane Manu’a le aso ananafi sa ia fa’ailoa ai le suamalie o le ola tautua i aiga, nu’u ma ekalesia. 

“E faigofie lava le feau o le faia o galuega uma le alofa i ē pele iai te oe.

“E ese’ese lava tagata ma mea o lo’o fa’anaunau iai o latou loto ina ia fa’ataunu’uina i lenei foi tausaga ua amata. 

“Pau lava lona fa’anaunauta’iga mo lenei tausaga o le atina’e lea o lo’u aiga ina ia maua se lumana’i manuia. 

Na ia ta’ua o lona fa’anaunauta’iga o lo’o iai, o le galue malosi lea ina ia manuia ma ola fiafia lona aiga. 

O lo’u sini lava ua fa’atū neia tausaga, ina ia fa’aaoga lelei le malosi ma le ola mai le Atua e tautua ai si o matou aiga. 

“O le taimi lenei o lo’o talavou le ola, e taua lava le fa’aaoga tatau i feau a le aiga. 

“Sa ou faigaluega muamua peitai o lo’o va’ai alofa lava si o’u aiga I feau fai o lea ua ala ai ona malolo mai le galuega ae galue le maumaga. 

“O le mea lava lena o lo’o taula’i iai le va’ai, ina ia galue malosi aua foi le ola manuia ma le fiafia o si o matou aiga. 

“E masani lava i le fa’alogo le fa’aupuga a matua, e iai lava le taimi mo mea uma, ma mo a’u lava ia, e sili lava le galue malosi ma fai lelei la’u pito la’au o le tausi aiga.” 

Na ta’ua foi e Ioane, o lo’o ia va’ai foi lava ma le fa’anoanoa le feoa’i ai o nisi o le tupulaga talavou e le’o fa’aaoga ma le tatau o latou taimi ma le malosi e tautua ai aiga. 

“E le aoa’ia lava e laupu’a tamafaiga, ae na’o se fautuaga lava mo i latou o lo’o faama’uma’u le taimi e feoai solo ai ma fa’atupu misa solo, ina ia fa’aaoga tatau o latou malosi e tautua ai aiga. 

“Afai ua leai ni galuega, o lo’o iai ma’umaga ma fanua e mafai ona galulue ai ma fesoasoani ai i le atina’eina o aiga.

E tele lava fa’amanuiaga e maua mai i le ola tautua ma le ola tausi aiga. Ua ou talitonu lava a’u ia i lea tulaga, ma o le ala foi lea e le’o fa’avaivaia ai a’u e faia le pitola’au o lo’o ou faia nei. 

“E taua lava le fa’alogo i matua ma usita’i. O iina e ala mai ai manuia o so’o se tagata.” 

Na ia ta’ua foi, o lo’o solosolo lelei lava le olaga i Samoa i lana maitau i lenei vaitau o le tausaga. 

“E leai lava se nofoaga e sili atu nai lo’o Samoa, ia te a’u lava ia ma la’u va’ai. 

“O lo’o lelei lava mea uma ma o lo’o maua foi lava mea e tausi ai aiga mai fanua ma fa’ato’aga o tagata. 

“O Samoa lava ia o le tausiga lava o aiga e ave iai la latou fa’amuamua.

By Fetalai Tuilulu’u 25 March 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>