O TOFIGA O LE ATUNUU

By Fuimaono Na’oia Faasavalu Touli F. Tupua 25 March 2016, 12:00AM

1. TOFIGA  NAI TULIMATA’ALA MA SI’ULEFAITOTO’A  A MALIETOA SAVEA –Na ma’ape ai le Falealii o Tumua. Na tofi ai Lealali e alu ma lona Tumua; tofi Fata e alu ma lona Alataua, tofi Faleata e Faleo’o I ai upu o Malo. Na ave ai le isi Tumua ia Tuisamau, ave le isi Tumua ia Auimatagi, ae mulimuli nei ona o’o le Tumua ia Lufilufi ina ua afe i ai Tafua ma Fuataga ma le Tumua na avatu ia Malietoe.

2. TOFIGA NA I LE MALAE O LE VAVAU-Na totofi e Pili lana fanau o Tua, Ana, Saga, Si’ululemuimuia ma Tolufale. Tua-o ‘Oe o le ‘oso to-tiapula, Ana-o Oe o le Tao ma le Uatogi-o lou faiva o le tau. Saga-o Oe o le Fue ma le To’oto’o-o lou faiva o le lauga. Si’umulemuimuia-o le a e nofo I le tuavao e palalaua ia te oe mea uma o le taua.Tolufale-o le a e nofo I le va o Savaii ma Upolu-o lou tofi o le tapua’i.

3. TOFIGA NA I LE SI’UMO’O MA LE VAIOA A MALIETOE TAULAPAPA-o tofiga ia o Faleupolu e Fa-Safune, Taulauniu ma Salemuliaga-o lo outou tofi o Savaii. Faleata ma le Alataua-o lo outou tofi o Upolu. Saleutogipo’e-o le a limamatua ia te oe faleupolu e fa o tofiga.

4. TOFIGA NA I LE UTᾹ-FANUA a’o le’i ai Lufilufi ma Lalogafu’afu’a. Na vaetolu ai le I’a e le tama o Seleselelimalelei ona faapea ai lea:- O le Ulu o le i’a o le a ave ia Tafua ma Fuataga, e mafua ai “Ao o Atua”. O le uso o le i’a o le a ave ia Iuli ma Moeono-ona maua ai lea o “Uso o Atua”. O le i’u o le i’a o le a ave ia Taloolemaagao  ma Tofua’eofo’ia-ona maua ai le o “I’u o Atua”. Ona ta’oto ai lea o Atua i lagotonu e o’o mai i le asō. 

5. TOFIGA NA I LALOGAFU’AFU’A a le Tupu Tafa’ifa o Fonoti ina ua i’u le taua ma Toleafoa ona o le ‘Ietoga o le Pepeve’a’. Ua fo’i mai le tafeaga a lona uso na i Tumuā i le Motu o Salaia. Fai mai-“Tofae”-sau ina alu ma lou Tao-“ a iva pou o le Fale Tuiaana-o le a “Sefulu ia te oe.” A fitu pou o le fale Malietoa” auā le to’afitu i Malie, o le a “valu ia te oe.” A ono pou o le fale Tuiatua auā Lufilufi-“o le a fitu ia te oe”. Ona tulei lea o le Alii i alo o Fia’ai- o Auelua ma Fatialofa-“o mai ina o ma lo oulua Punefu” lea –o le a ta’ua oulu o “Tulaniu o Atua” O le ala lea o le se’e ese o le faalupega o –“Tulaniu o Atua” lea sa ia “Sagapolutele ma Tagaloa” i Saoluafata!. “Falefa”-o le a ta’u Oe o lo’u “aai ma lo’u nuu”, ona maua ai lea o le upu-“o le tala mea faasolo i le aai o le Tupu.”Fagaloa-o lo’u vaa lea mo outou- lea ua pogai ai ona ta’ua Fagaloa o le “Vaa o Fonoti”. Faleata-“O le itu’au lenei o le taua. O le lua fesoota’iga lea ma le Alataua. Afai e te savalia, e sunu’i i Togamau.

6. TOFIGA NA I FUIFATU-ina ua ola le taua o le”Pa U’amea”. Na vaevae ai le To’oto’o o “Safotulafai  ma Sale’aula”-lea ua maua ai nei le upu-“O le Usoga a Puleono i Salafai”-ae sa na o le lua lava pule faavae mai le tu’itu’ufafau o Samoa mai anamua.

By Fuimaono Na’oia Faasavalu Touli F. Tupua 25 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>