LAUGA - “O manatu i le manuia”

Tusia Rev. Petaia Setu ,

157 Hits

Rev. Petaia Setu

Rev. Petaia Setu

 (Ieremia 29:11)

O le mătua fai tama o le mătua alofa. A o le mătua alofa moni e sasa ma faatonu. E mamao lana tofā. Na te iloa le taunuuga lelei. E malamalama i le faamoemoe manuia, o le ola ua atoatoa saunia. Ua manatu Isaraelu i lona tuulafoaiina; a ua manatu le Atua i le faaolaina. Ua faailoa e le perofeta o Ieremia le finagalo faa mătua alofa moni o le Atua: Auā o a’u nei, ua ou iloa manatu ua ou manatu ai ia te outou, o manatu o le manuia, ae le o le malaia.

E le i milia faa-’u’u e le Atua lana fanau. E le i vaēa foi le alofa faa mătua o le Atua ia Isaraelu. Fai mai Tavita, “e moni, e mulimuli mai ia te au le agalelei ma le alofa i aso uma o lo’u ola” (Sal.23:6). Ioe, e telegese lona to’asā, ae tele  lona alofa (Sal.103:8). Fitusefulu tausaga le taimi faatapulaaina e le Atua e koleni mai ai Isaraelu i Papelonia. O vaega taūa ia o le soifuaga o Isaraelu i le va feagai ai ma le Atua, o loo faaalia ai le ese o auala e faaalia ai le alofa o le Atua i le nuu.

Le nuu fai manatu; faalogogatā, fouvale; e loto ma’a’a. A o le Atua, o lana pitolaau tauave, na te a’oa’i, faatonu, sasa ma faaumatia; a o loo totonugalemū ai le alofa ua natia. O ia lava na ia faatāfea lona nuu i Papelonia (f.4,7). Ua ia tuuina iai le fitusefulu tausaga e toe tapu’e ai ma toe fo’i ai i le Atua i le loto salamō. Samoa, o le Atua, o le alofa lava ia (1 Ioa 4:16). Poo fea lava e aga’i iai le toasā o le Atua, e faa-silisili lava lona alofa (Rom 5:20).

Manatua foi, ua iai lava fuafuaga (plan) a le Atua i tagata uma. O le tōfā alualu mamao la lea a le Atua i lona nuu o Isaraelu. E a’oa’i, faatonu, ma sasa, ae o loo iai le faamoemoe ola o i lona taunuuga. O le nuu ua uma ona tofi; peitai, o lona tapenaina ma le saunia lelei, e le faigofie. E tumu i ala gaoā ma fitā. A o ala ia o loo ua ta’oto ai le finagalo o le Atua i faamanuiaga mo le nuu. E le tali filemu faamanuiaga o le faaolataga a le Atua. Manatu le nuu ua na o sina taimi puupuu  e faaaunu’ua ai e pei ona faalogo ai i le mau leo sesē eseese. A ua tautino e Ieremia i lana tusi le finagalo o le Atua.

Fau ni outou fale mautu; fai lelei o outou faatoaga; fai avā ma nofo tane ai iinā. O le ata lenā o le fitusefulu tausaga. E le o se taimi puupuu. Ua o se leo faavaivai loto. A o le Atua, ua ia te ia lava le atoaga o lana fuafuaga. Na te silafia le taunuuga o lana lava plan. “Auā o a’u nei, ua ou iloa manatu ua ou manatu ai ia te outou…”  E mătua fai tama. E agaga i le alofa. E finagalo i le ola. O ona manatu, o manatu i le manuia. Ia soifua fiafia tagata uma. Ia mălie le galala faaleagaga. Ia saoloto ona tagata; ia pale lana fanau i le faamoemoe ola.

Samoa, e iai taimi tatou te manatu ai ua lafoai tatou e le Atua. Ua tatou siligia poo f ea o iai le Atua. Aemaise lava o itu aso e osofa’ia ai tatou e malosi eseese faa natura. Poo fea lava e felafoaiina iai tatou e puapuaga ma faigata o le olaga, e silisili lava le alofa o le Atua. O ala eseese ia o loo tapenaina ai i tatou e le Atua mo le taunuuga lelei, ua iai le faamoemoe. O le silasila lenā a le Atua ia te oe ma a’u, i lau fanau ma o tatou aiga; e silasila i le lelei; e manatu i le manuia; e tapena i lou ola. 

O loo tatou faaopeopea i le vaitau masani o timuga ma matagi. O upu a le atunuu, “ia moe le utu, ia to’a le paipai. O la Mose i lona nuu, ’aua tou te fefefe… auā o Ieova lou Atua, lua te ō faatasi ma ia; na te lē tuua oe, na te le lafoai ia te oe” (Teu.31:6). E mătua faitama le Atua; ae na te le faamatananaina ta’ua. Na te saunia se ala umi, ma na aumai ni mea kuku’a i lou olaga, e tapena ai ou faamanuiaga. 

Samoa e, a faaeaina oe ai faigata o le olaga, ona foaiina lea e le Atua ia te oe le taunuuga, e iai le faamoemoe. Auā o a’u nei, ua ou iloa manatu ua ou manatu ai ia te outou, o manatu i le manuia, ae le o le malaia.

Amene

Mobile: (685)-773-7063

(685)-7783782

© Samoa Observer 2016

Developed by Samoa Observer in Apia