Tagi a Pagota i le lelei o le va’aiga o latou

By Deidre Tautua – Fanene 25 February 2018, 12:00AM

O tu’uaiga e fa’apea o le lelei o le faiga ma le tausiga o pagota i totonu o le to’ese o mafua’aga ia e ala ai ona sosola ese mai Tafa’igata. 

E le tusi lea sa fa’ao’o mai e se tasi o pagota i le Samoa Observer, ma o lona fefe tele mo lona saogalemu o lea sa le mana’o ai lea pagota e fa’ailoa lona suafa.

Ae pau le tulaga sa mana’o ai lea ali’i ina ia fa’aleoina ona lagona ma le tulaga o lo’o iai le faiga o latou i le falepuipui.

“Sa ou nofo taofia i le masina o Ianuari, ma sa fa’atonuina a’u e le fa’amasinoga e toe tula’i i le Aso 26, Fepuari, 2018.

“I le fa o aso talu ona ou nofo taofia i Tafa’igata sa ou ma’i ai.”

O lea pagota sa mafatia i lona nifo.

 “Sa le’i mafai ona moe, pe ‘ai fo’i o lea sa ou talosaga ai i leoleo o lo’o i Tafa’igata mo se fesoasoani ina ia mafai ona ou alu atu i le falema’i.

 “Ae sa aumai le tali ina ia ou fa’atali ae se’i fa’afeso’ota’i mai le ofisa su’esu’e C.I.D. i le matagaluega a leoleo i Apia.

 “E uma ane le aso o lo’o o’u tauanau pea i ali’i ofisa nei mo se fesoasoani.”

E tusa ai ma le fa’amatalaga a lenei pagota, e le’i avea ia i le falema’i, ae sa ave ia i le pasimā.

E tusa ai ma le fa’amatalaga o le tusi, ina ua mavae aso e lua talu ona iai lea ali’i i le pasima, o se tasi o pagota sa i totonu o le pasimā na ma’i.

O lea na amata tauvala’au ai i ofisa o le falepuipui mo se fesoasoani.

Ina ua mavae le itula na omai ai ali’i ofisa nie ma ave le pagota lea e ma’i i fafo ma sa iai ni gaioiga sa latou fa’atinoina i lea ali’i.

Ina ua fo’i mai lenei ali’i pagota ma nei ali’i ofisa, sa va’aia le lava toto mai o ona foliga ma lona ulu o lo’o ta’e.

I le fa’amatalaga a lea ali’i o le aso na soso’o ai sa ave ai o ia tu’u i le potu o lo’o iai le pagota o lo’o tuli a latou fa’aasalaga i moliaga o le fasioti tagata, ma e fa’apea lana fa’amatalaga o ia ua fefe.

 “Mai le taimi atoa sa ou iai i totonu o lea potu ma nei tagata e le’i mafai ona maua se moe.

“Sa ou nofo i luga o le simā e aunoa ma ni lavalava ona ua ave uma e nei tagata o’u lavalava ae e fai lava si malulu o le simā.

 “O le fesili, o le faiga lea o matou pe a o’o ina o i Tafaigata, ae e alaga tatau i ali’i ofisa o le falepuipui ona latou fa’ao’olima i pagota?

 “O le mafua’aga tonu lava lea e tele ai pagota sosola i tua, ona o nei faiga le alofa.”

I le masina na se’i mavae atu nei i le va o le 30 aso, e to’afitu ni pagota sa sosola ese mai i Tafa’igata.

E to’aono lea sa mafai ona toe maua ane, ae se’i vagana ai le to’atasi le ali’i o Uili Manuleleua lea lava e o’o mai i le taimi nei e le’i maua lava.

O le to’afa muamua lea sa sosola i le masina o Tesema a’o loma ai aso fiafia o le Kerisimasi.

E aofia ai Lauitiiti Tualima, Vaioa Soliam Aniseko Vaelei ma Uili Manuleleua.

Sa tapā e le Samoa Observer se tali mai So’oupu ale Matagaluega o Falepuipui, Ulugia Niuia Aumua.

Ae peita’i e le’i tali mai o ia.

By Deidre Tautua – Fanene 25 February 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>