E leai se mea e maua ma se filemu
E tatau lava ona iai sou lagona fiafia i lau galuega faatino.
I le fa’atalatalanoaga ananafi o le Fofoga Samoa ma Atonio, 38 lona matua mai Vaimoso Uta, na ia faailoa ai lona talitonuga i le faigofie ole olaga pea masani le tagata ia e galue mo lona ia olaga e tusa lava pe’a faigata.
“ Oute ola a a’u ia ile tausiga o lo’u aiga.”
“Ia te a’u lava ia, o lo’u aiga o lo’u faasinomaga. Ou te faamuamua i lo’u aiga ma ou te talitonu e le taitai ona ou fiu pe ou te lelava ile tausiga o i latou.”
O Atonio e faigaluega o ia ile Elisa Hotel ma na’o o ia fo’i le lima tamatau o lona aiga. E laitiiti lava se seleni e maua mai lana galuega, ae peita’i e lava ai a latou fa’asoa ole vaiaso.
“E mo’i a e toatele tagata e faamamafaina le mataupu tau tupe i o latou mafaufau ae i lo’u a ia tagata, e le fa’apena mo a’u ma si o’u aiga.
“O le tupe e le mafai ona fa’atauina mea uma. E le mafai e le tupe ona faatau sou fiafiaga.
“I lenei olaga, e leai ma se tagata i lalo o le la nei e leai ni ona fa’afitauli. Ae e pei o auala e tatou te fo’ia ai nei fa’afitauli le e tatau ona tatou va’ai atu iai.
“ Ou te masalo e pau lava le taimi matou te mana’omia vave ai se tupe pe’a fa’apea lea e fai ni fa’alavelave o le nu’u po’o isi fo’I saogatupe i totonu ole nu’u aua le tau atina’e ina.
I lo’u a ia manatu o mea fai a le nu’u e fai a sina taugata i lenei vaitaimi.
E lagona lava e Atonio lona loto fa’afetai I le le taumafa ‘ava pe ulaula tapa’a fo’i. Aua ole toatele lava o tagata o lesi tupe fa’aalu lea.
I le fa’atalatalanoaga a Atonio, sa ia fa’apea mai ai e filemu ma manaia le olaga i totonu o le latou nu’u e mafua mai lea i le lelei o le vaavaaiga ma tulafono ua faatuina e le pulenu’u.
“O le taimi muamua a’o le’i puleina lo matou nu’u, sa tele ai a le pisapisao ma toatele tagta e fa’atupu misa e pei a o latou e ona le nu’u. O se mea lelei ua tele suiga ma tulafono ua saogalemu ai.
I lenei olaga fita ma le faigata, o le talitonuga a Atonio e tatau lava e tagata uma ona pulupulu lima fa’atasi ma galulue e fesoasoani le tasi i le tasi.
“O lo’u tiute o le va’aiga ma le tausiga o lo’u aiga aemaise lava si a’u fanau.
E iai lava le popolega ole tama ne’i te’i tupe ni fa’alavelave tetele mai le taugata ole olaga.
“ Out e tatalo lava e aua ne’i tele ni fa’afitauli e mafua mai ile taugata ole olaga aua out e va’ai atu , ua amata ifo a na sui ituaiga ola le ola ai tagata i nei vaitaimi i totonu o Samoa.
“Ua to’atele le fuainumera o matua e le mafai ona ausia atu se tulaga lea ole ave o latou fanau i aoga ae o le toatele o le tupulaga talavou, ua leaga amio ma fa’atupu fa’alavelave solo.
“ E tasi a le mafuaaga pea tutupa nei mea fa’apea, ua fa’ateteleina le numera o fa’alavelave ma e le toe maua fo’i se filemu i Samoa.
O le fautuaga a Atonio, e tofu lava le tagta ma lana ia tiute e fai.
I lona talitonuga, e faigata lenei olaga mo so’o se tagata.
O le ala lea o lo’o taumfai malosi ai o ia e galue, fa’atasi ai ma le tatalo.
“Ou te le fia nofonofo ma fa’atali i ni mea tutupu. Ou te fia galue a a’u i aso uma ma ou te mana’o fo’i ia ola mai la’u fanau ma tapu’e mai auala o lo’o o’u a’oa’oina.”