Galue malosi, e faigofie ai mea uma o le olaga
O le manatu lea o le taule’ale’a o Mona Misiluki, 25 tausaga mai Tokelau ma Alafua.
O lo’o galue nei i le faamamaina o se tasi o fanua i Alafua, ma o lana galuega a lea i aso uma.
“E lata i le $500tala la’u tupe maua i la’u galuega lea o lo’o faia, e tele le fanua ma e mamafa foi le galuega, e le faigofie foi’ o lana tala lea i le Fofoga o Samoa i le aso ananafi.
O lo’o nonofo nei Mona ma nisi o ona uso e toatolu i se tasi o fale mau totogi i Alafua, ma o latou faigaluega faatasi ai ma o leisi lea tulaga faigata o lo’o feagai nei ma ia;
“O le totogiina o le fale i masina uma e taugata, ae mo le itu i le seleni, e lava ai lelei le faasoa aua e le toatele, toe faigofie le tausiga aua o tama uma.
I le faamoemoega i le lumanai, o lo’o vaavaai lava aua sona aiga, ina ia faaaoga iai lana galuega o lo’o faia.
“E moni lava i le taugata o le soifuaga, ae a galue mlosi lava le tagata, e maua a mea uma, mai i galuega a ona lava lima.
Ua ia maitauina foi le tele o le suiga o le olaga ma luitau e faafeagai ma tagata e ala lea i le tau o le soifuaga ae e tatau lava i le tagata ona galue ma le malosi ae aua le ola faalagolago;
“Amuia Samoa o lo’o maua mea i o tatou laufanua e pei o maumaga ma faatoaga a aiga taitasi, pe a faatusatusa atu i nisi tagata o le lalolagi, o lo’o fesuluna’I solo i le fia aai.
“E tatau i tagata oma atia’e aiga i le mea e gata ai, aua e alu aso ae sau aso, tola ane fanau, ae o lo’o iai mea e tua iai.