Mana’omia e Samoa ni metotia fou

196 Hits

Tusia  - Ilia L Likou

 

Ua sauni atu nei le Faipule a Faleata i Sasa’e, Aveau Niko Palamo mo le Faiga Palota o lo’o lumana’i nei.

O le sauni atu ai la mo le aveina o le Fu’a a le Vaega Fa’aupufai o le Tautua o se tasi lea o fa’amoemoega o lo’o i le sui faipule pe afai ae toe tusi ‘a’ao lona Itumalo i a te ia.

O le fa’atalatalanoaga  ma le Samoa Obserever o lo’o ia fa’ailoa mai le solo i tua o atunu’u o le atunu’u.

 “O lo’o feagai le atunu’u ma le tele o nisi o mataupu e fa’atatau i le soifua maloloina, a’oao’oga, o le tau o le soifuaga aemaise o le mana’omia tele ai lea o ni avanoa faigaluega aua tagata lautele.” Lana  saunoaga mai lea.

“O le foia ai o ia fa’afitauli, e ao lava ina sui le faigamalo o lo’o i ai nei ina ia mafai ona  omai nisi e fou atu ma ni a latou metotia fou  e latou te tauavea le malo.

 “O lea lava le tulaga e tatau ona i ai aua le agai atu ai i le lumana’i.

Ina ua fesiligia i lona finagalo pe afai ae manuia i le faigapalota, na ia saunoa o le Tautua e ao ona avea ma suiga fou o le malo.

 “E tele nisi o vaega e mafai ona fa’atinoina aua o tatou tagata, ae paga lea o le fa’aiuga lava o mea uma e sau mai le malo,” o lana tala mai lea.

 “O le mativa ma le tele o fa’ama’i pepesi o se tasi lea o va’aiga o lo’o atagia ai le faigamalo o lo’o tula’i mai i le taimi lenei. E mana’omia se faigamalo lelei mo o tatou tagata.

Ina ua fesiligia ai i lona filifilia o le Tautua , na ia saunoa , o se agaga fiafia i a te ia o le mafai ai lea ona fa’aleo vaega uma o lo’o mana’o ai ma le fiafia.

 “O se sa’olotoga e mafai ai ona fa’ailoa sa’oloto mataupu uma i totonu o le Palemene aua lava le lelei o tagata o le atunu’u.

Fa’amata o lo’o i ai sona finagalo le mafai ai lea ona toe palota tagata mo ia.

 “E na’o le Atua lava o lo’o ia silafia. O lo’o tele lava e lagolago mai i totonu o le Itumalo.

 “O lo’o i ai fo’i lo’u talitonuga o lo’o fiafia lava le to’atele i le tele o fa’atinoga o lo’o mafai ona ou fa’atinoina i totonu o le Palemene.

 “E ao ona palota aua se ‘ai o le atunu’u.

“Tele nisi o vaega e ao ona silasila i ai mo le fa’aleleia ma ia mafai fo’i ona tutusa uma tagata uma.

 “O lo’o o tatou taumafai pea ina ia manuia mea uma, o le maea ai o le 30 tausaga o lo’o taumafai pea, o lona uiga e ao ina o tatou palota mo le manuia.

O le tausaga e 2011 na avea ai o ia ma sui o le Palemene i lalo o le Vaega Fa’aupufai o le Tautua.

© Samoa Observer 2016

Developed by Samoa Observer in Apia