I’u manuia le ‘Fusu’aga Tele i Parataiso’

248 Hits

Lupesoli’ai Joseph Parker ma lana faiaoga o Kevin Barry i le mae’a ai o lana taaloga i le po o le Aso Toonai.

Lupesoli’ai Joseph Parker ma lana faiaoga o Kevin Barry i le mae’a ai o lana taaloga i le po o le Aso Toonai.

Ripotia e Maddison Clarey

Fa’aliliu e Maiava

 

Na matua mata’ina le fusu a le alo o le atunu’u, o Lupesoli’ai La’auli Joseph Parker i le fusu’aga na fa’aigoaina o le “Fusu’aga i Parataiso” ina ua taofia le la fetauiga ma le Ali’i-agavale Amerika o Jason Bergman i le ta’amilosaga lona valu, a o alalaga fiafia le silia i le lua-afe o Samoa sa tapua’ia lana fusu’aga i le po o le Aso To’ona’i talu ai. 

Ae ui i le vevela o le fale, e leai se nofoa na avanoa o le Fale Ta’alo i Faleata i le tumutumu o le atunu’u lea na matua fa’amalieina i ulua’i paga o le po a’o le’i o’o i le paga-fa’apitoa. 

Sa ‘auai le Afioga a le Ao Mamalu o le Malo, Tui Atua Tupua Tamasese ‘Efi fa’apea le Ali’i Palemia, Tuila’epa Lupesoli’ai Sa’ilele Malielegaoi ma molimauina ai le toe lalagaina mai o fusu’aga i totonu o le atunu’u e pei ona va’aia le to’atele o tama-fanau a Samoa e matua talenia lava i le ta’aloga.

 E leai fo’i se laulau-fa’apitoa i tafatafa o le maea, na avanoa ma na va’aia fo’i le alumia o le Taula a’o le’i amataina fa’agatama o le po, lea na tatala lava i le fetauiga a Petelo Matagi ma Hugo Fata lea na tutusa. 

O le paga na soso’o, o Bubba Tuigamala – na tapua’i iai le to’atele ma manatu e malo i se tu’ioti - ma le ali’i o Gogosina Ulutoa.

Ui e le’i taunu’u i se tulaga fa’apena le fusu’aga, ae na manumalo lava le ali’i-pule o le falefusu o le Planataion Boxing, ma matua mitamita ai si ona tua’a o Inga Tuigamala ma le latou Vaega.

O le paga lea e le’i o’o i le mea na ulua’i fuafuaina e le vaega sa tapenaina fusu’aga, le Duco Events, ma ua toe fiafia ai nei ina ua le o’o ona fusu Tuigamala ma le latou tama o Brown Buttabean e pei ona mua’i talanoa iai.  

Na matua mata’ina fo’i le Fofoga o le Po, le Ali’i o Dan Hennessy i lona fa’afiafiaina o le ‘au-maimoa i ana saunoaga ae maise lona si’ufofoga ma’ati’ati a’o fa’afeiloa’i  atu i le paga lona tolu i le va o Alapati A’asa ma Faranisisi Mamoe.

Na manumalo A’asa mai le A’oga Fusu a Samoa ina ua ‘au’au-fa’atasi ali’i-fa’amasino i la latou fa’ai’uga.  

I paga uma o lea po, na foliga ai e manumalo lava le tulimanu lanu-moana se’i o’o i le paga a Warrren Fuiava ma Tone Fereti, lea na manumalo ai Fereti sa i le tulimanu lanu-mumu.

A o le paga na sili ona mata’ina o le po, o le fetauiga a Jordan Tai ma Toni Iapesa. Pau lea o le paga-oti o lea po atoa na manumalo ai Jordan ina ua taofia le fusu’aga e le’i uma ta’amilosaga.

O le paga a Silivelia ‘Batman’ Pekepo-Tevaga ma David ‘Brown Buttabean’ Letele, na matua fa’afiafiaina ai le ‘au-maimoa i aga-malie a Buttabean a’o aga’i mai i le maea, i totonu ma le toe fo’i ‘ese atu fo’i ma le maea.   

Ae uma lava le fia-malie o Buttabean pe a pa’o le logo, ae tau’ai loa meafaipele i lana paga, o se Samoa fo’i e nofo-mau i Niu Sila. Na ‘autasi fa’amasino e manumalo Buttabean, ma o le ulua’i manumalo fo’i lea o le po, mo le Vaega a Parker mai Niu Sila.

Na suia atoa lagona ma mo’omo’oga o le Maota Ta’alo ina ua mae’a paga-fa’aopopo ae alo e tatali le taimi o le ulua’i fusu’aga a le tama-fanau a le atunu’u, ua faia mai i Samoa.

A’o le’i amataina le paga-fa’apitoa, na fa’alauiloa ai e le Fofoga o le Po, se fa’atau-tu’i fa’apitoa e fesoasoani ai mo fa’alapotopotoga i le lotoifale, lea na maua ai le seleni e silia i le sefuluono-afe tala ($16,000.00).

O fa’ailoga na ofoina atu, e aofia ai nofoaga-i-tafatafa o le maea, i le isi fusu’aga a Lupesoli’ai e faia i Karaiesetete i le Aso 17 o Aperila, o se pea o meafaipele a Joseph Parker ua mae’a ona saini ai le ali’i fusu, ma se ‘ofu ‘Olopeleki na aupito tele se seleni na maua ai, e $5,100.00.

O le uso o le tama o Lupesoli’ai, o Fasavalu David Parker na lagiina le Vi’i o le Fu’a a Samoa na pepese fiafia ai le au-maimoa atoa, a’o fa’aalia fa’asolosolo ata o Lupesoli’ai, a’o tapenapena mo le fusu’aga, i potu i vaega i tua atu o le fale.

Na ulua’i fa’afeiloa’ia i le maea le Ali’i-Amerika o Jason Bergman lea na malaga mamao mai lona nu’u-malulu o Pittsburgh i lona tulimanu “vevela” lanu-mumu i le Maota Ta’alo i Faleata. 

O le aga’i mai o Lupesoli’ai i le maea na matua le toe lagona ai se tala i le alalaga leotetele o le atunu’u. 

Na atili fiafia le atunu’u ona ua fa’a‘umi’umi le fusu’aga, ui sa manatu le to’atele, e le ‘umi.

Sa mata’ina le ta’alo a Lupesoli’ai, e ana gaioiga vavave o tu’i ma so’a ae sa le tu’u-mamaina fo’i e Jason Bergman.

Ina ua lavea Jason i le ta’amilosaga lua, na manatu le to’atele ua uma moni le tama-Amerika peita’i na toe tula’i Jason e fa’ailoa mai fo’i lona lelei i le ta’aloga. 

 “’Ou te manatu sa fa’ailoa lelei mai lava e Jason lona tulaga i lenei vaiaso,” o le fa’aaliga lea a le faia’oga a Lupesoli’ai, o Kevin Barry.

O le tala lava lea a Jason i lenei vaiaso atoa, e le na o se tagata-malaga e pei ona manatu ai le to’atele a’o le fusu’aga lea e fa’amaonia ai, e vavave ma lelei fo’i ana meafaigaluega e pei o Lupesoli’ai.

O le fusu’aga lea, o se ‘tulaga lelei’ tele e pei ona manatu Bergman e maua ai se avanoa e fa’amasani ai Lupesoli’ai i lana ulua’i-fusu’aga ma se tagata-agavale, ma maua ai sona agava’a e lu’i ai le fusi o le lalolagi (IBF) o lo’o umia nei e le agavale-siamupini o Charles Martin. 

Ae sa’o lelei Bergman, e fai lava si vavave tele o lima o Lupesoli’ai mo ia pei ona ta’atia ai ina ua fa’atoa tasi le minute ma sekone e lua i le ta’amilosaga lona valu, a’o fe’ei fiafia ma leotetele le atunuu tala-tama sa maimoaina lea fusu’aga i Faleata. 

Lea ua mae’a le fusu’aga, ma ua fiafia ai tele Lupesoli’ai o le a alo mo se malologa e tolu vaiaso e sa’oloto fiafia ai a’o le’i toe malaga atu i Los Vegas e tapenapena ai le le isi ana fusu’aga ia Aperila, e faia i Karaiesetete i Niu Sila. 

“O le tausaga lenei ua matou talitonu, e o’o ai Joseph i le numera tasi,” o le fa’aaliga maumautu lea a Kevin Barry i se talanoaga ina ua mae’a le fusu’aga.

Ae mo le taimi nei, ua aloalo atu nei Lupesoli’ai e fai se malologa lelei i lona aiga i lona atunu’u nei, e matua tafili-saunoa ai i le fuata-mago ma le toganiu tele a lona aiga.

© Samoa Observer 2016

Developed by Samoa Observer in Apia