‘Au le Palemia i le Vaega Tinei-Mu

189 Hits

Se va’aiga i le mu na fa’aleagaina ai le Maketi i Savalalo a’o taumafai le Tinei-Mu e tape.

Se va’aiga i le mu na fa’aleagaina ai le Maketi i Savalalo a’o taumafai le Tinei-Mu e tape.

Ripotia e Lanuola Tusani Tupufia

Fa’aliliu e Maiava 

 

Ua tali-pupuni e le Ali’i Palemia, Tuila’epa Sa’ilele Malielegaoi, le vaega tinei-mu sa feagai ma le mu na liu-efuefu ai le Flea Maketi i Savalalo i le Aso To’ona’i talu ai. 

O lona li’oli’o o le Vaega Tinei Mu, sa ia tu’uina mai ai fo’i nisi vaega e mafua ai ona tupu o fa’alavelave fa’apea ae maise o ni a’oa’oga lelei ua maua mai ai.

“O le mea na vave ai le sosolo o le afi, ona o le taimi tonu lea sa matua malosi ai le agi o savili mai itu-‘ese’ese.

“Matua malosi lava le savili,” o le saunoaga lea a Tuila’epa, “a’o le tele o mea na mu, o lavalava, lona uiga e pei lava o ‘aulama le vave ona mu ma faigata ai ona taofia le sosolo a le afi.

“O le mea sa faia e tama o le fana o fale tu-lalata ma tafatafa o le mu aua ua le toe aoga ona tape le afi.” 

Na ta’ua e le Palemia, o le faiga fa’apena e masani ona faia pe a tupu se mu i le togavao.

“E iai lava le taimi e le mafai ai ona toe tape o se afi tele fa’apena, ae tu’u loa e mu pea le vaega lena ae fa’atino loa se mea e vavae ‘ese ai, e taofia ai le sosolo pea.

“E tele lava lesona e maua mai mea fa’apena e tutupu.”

Na ta’ua fo’i e Tuila’epa, o le isi mafuaga sa faigata ai ona tape le afi, ona e le’i vave fa’afeso’ota’ia le vaega fui-mu.

Na fa’amalamalama mai, na vevesi solo le leoleo-po e sa’ili le aiga tonu e ana le fale’aiga lea na amata ai le afi ae sa tatau ona ulua’i vili le vaega fui-mu e o-atu e fui le mu.

“’Ou te matua le-malamalama lava i le mafuaga e sa’ili ai fua le aiga e ana le pisinisi lea aua e le o-mai e ta’atitia i luga o le afi ia pe ai.

“A’o le feosofa’i-solo e tau sa’ili le aiga e ona le pisinisi lea, na galo ia te ia, o lo’o alu pea le afi ma e fa’atoa fa’afeso’ota’i atu le tinei-mu, ua leai se aoga, ua tuai.”  

© Samoa Observer 2016

Developed by Samoa Observer in Apia