Manatu o le Fa’atonu - Mafaufau loloto i lo tatou lumana’i

180 Hits

Tusia - Marj Moore


Ua masani tele ai o tatou tagata, e fiafia tele i manuia maua-vave, tama fo’i ia e le ‘umi ae fua mai, le ‘auala pu’upu’u e fa’atino ai se mea pe a fai se tonu.

E seāseā tu’u-mamao le silasila ma fuafua lelei mo se taunu’uga lelei.

Se e mafai lava. 

A tupu a ua tupu.   

E matua le-naunau lava e talanoa ‘umi i se mea, pe fetu’una’i-solo le mafaufau i fesili fa’apea “a fai nei la, o le a le mea e ono tupu mai mulimuli? A’o ai fo’i e afaina ai ma nisi tulaga e ono aliali mai pe a fai o sea fa’ai’uga? po’o le “taugata fo’i ma tele tupe e alu ai?” po’o “se fa’ai’uga lelei lea mo tagata uma?” po’o le fesili tele, “tatou te gafatia tupe e fa’atino ai lena mea?”

A o le mea moni, e le fa’apea ona e la’ititi se taimi sa talanoaina ai lena mea. Ua fono so’o fo’i, fai a’oa’oga ma polokalame fa’amasani ua tatau ai lava ona avea tatou ma tagata e faia tonu a le lalolagi. A ona o le le-lelei o talanoaga sa faia, e le’i matua o’o-o’o ai i o’oga e tatau ai. Ua masani tatou i le ta’amimilo solo i isi mata’upu ma mea le-aoga ma aunoa se ta’ita’iga lelei na mulimulita’i ai, ua tupu ai le fetaa’i fa’alou-le-magā ua le-mautu ai  i le tonu talafeagai sa tataou ona silasila iai.   

E iai lava fo’i ma le tulaga lea pe a fai o ni talanoaga, o le ta’u-so’o ma lote so’o o se mea lava e tasi e ui ina ‘ese’ese o fa’a’upuga e tau fa’amatalaina ai – ma saga umi ai ma ma’umau le taimi. 

O le isi fo’i itu, e tele lava ina ‘augata ma musua tagata talavou e fa’aali o latou finagalo e te’ena ai se mata’upu ona o manatu ma lagona o tagata matutua.

O le fa’anoanoaga lea pe a taga’i i totonu o ofisa, i le leaga o le fa’atinoga o ‘au’aunaga lautele ae maise le leai o se fuafuaga lelei sa faia muamua, e foliga mai ai lava o le tele o fa’ai’uga ma tonu-fai a le malo, sa faia e aunoa ma se silasila-toto’a iai.  

E foliga e matua leai ma se popole ia siakia vaega e ono vaemanua ai fuafuaga fai, lea e matua tele tupe a tagata lautele o le atunu’u o lo’o fa’aalu ai. E le gata i lena, o le leai o se popole e fa’ailoa fa’alaua’itele i le atunu’u nei fa’ai’uga, ma le manatu fa’apito fa’apea, e le mo’omia se fa’amalamalama ma e leai fo’i nisi tala e toe faia. 

O le tausaga ua mavae, na fa’aofi ai e le Matagaluega o A’oga i mata’upu mo a’oga a fanau, le vaega tonu lea, o le mafaufauga e fesiligia ai se mea, po’o le mafaufauga e iloiloina ai se fa’ai’uga po’o se mea fo’i ua fuafua e faia. A’o talia la ma le agaga fiafia ni suiga tetele e afua mai lea fa’amoemoe, e mautinoa lava, o se la’asaga lelei tele mo o tatou ta’ita’i o le lumana’i le amata malie mai lava lea i a’oga-tulagalua.

E taua tele ma aoga mo fanau-a’o’oga lea itua’iga atamai, e mafaufau loloto ai, e tu’u-fesilisili ai ma iloilo toto’a, ma faia ai le fa’ai’uga aupito talafeagai mo le aga’i i luma o o latou olaga ae maise o galuega o le a feagai ai.  

Ua tele tausaga o faitioina pea a tatou fanau-a’oga, ona o le tu’u-fesilisili so’o ma ‘ese’ese o latou manatu e uiga o tagata matutua po’o  latou fo’i o lo’o i tulaga maualuluga. 

Ona o’o loa la i a’oa’oga maualuluga fa’aIunivesete e mo’omia ai le mafaufau ma tautatala mo latou lava, ae o le fa’alavelave lea, e leai so latou talitonuga ia latou lava, vagana le masani lea o le toe lalau mai o mea sa fafaga ai a’o laiti. 

O le fesili tele lea, e mafua i se a lea tulaga?  

A’o tatou aga atu i Faiga Palota ia Mati, o le a lafo ai o tatou fa’atuatuaga mo le lumana’i mo le isi lima tausaga ma luma atu i a’ao o sui o le a filifilia, ua tatau ai nei ona mafaufau loloto i a tatou filifiliga o le a faia.

Moni o nisi o a tatou sui-filifilia o iai nei ma nisi fo’i o lo’o naunau e fa’atasi atu iai, e misi sasa’o ma ni agava’a fa’apea, ae to’atele lava le atunu’u e mafai ona maua ai se fa’amoemoega mo le faia o fa’ai’uga lelei e aso ma tausaga, pe a tatou filifili ma le poto.   

(Fa’aliliu e Maiava)


© Samoa Observer 2016

Developed by Samoa Observer in Apia