Ua o tatou i ai nei i le Aso Kirisimasi o lenei tausaga, ma o se aso e tasi o le tausaga e tatou te ofoofota’i ai ma aiga, uo ma e masani ma fa’amantuina fa’atasi le Mealofa Paia na ala mai i a Iesu Keriso mo i tatou uma lava.

E le taumateina i totonu  i si o tatou atunu’u pele o Samoa i lenei aso talotaloga ma vi’ivi’iga o le fa’afetaia ma le agaga fiafia o lea Taulaga Tutasi, Le Pepe o le Kirisimasi o Iesu Keriso lava lea.

O le aso e toe fa’amanatu mai ai lo tatou ola ma le soifua nisi o Ana fetalaiga e fa’apea,‘Āfai ana o se isi o ‘outou ‘ua alu atu i le fale o lana uō i le tulua o po, ma fai atu, ‘La‘u uō e, se‘i aumai lava ni nai areto se tolu. 

‘Ua sau la‘u uō i lana malaga ma afe mai i lo‘u fale, a ‘ua leai se mea‘ai e tali ai.’ 

‘Āfai la e fa‘apea mai lana uō mai totonu, ‘Soia le fa‘alavelave mai. 

‘Ua uma ‘ona fa‘amau le faitoto‘a; ‘ua matou ta‘o‘oto i le moega ma la‘u fānau; ‘ua ‘ou lē lavā toe tu i luga e avatu se mea ‘iā te oe.’ 

 ‘Ou te fai atu, tusa pe lē tula‘i o ia ‘ona o oe o lana uō, ‘ae tula‘i lava ma avatu ‘iā te oe mea uma ‘e te mana‘o ai, ‘ona o lou saga fa‘atauānau pea. 

‘O lea ‘ou te fai atu ai ‘iā te ‘outou: ‘Ia ‘outou ōle atu, ‘ona foa‘iina mai lea ‘iā te ‘outou; ‘ia ‘outou sā‘ili, ‘ona ‘outou maua ai lea; ‘ia ‘outou tu‘itu‘i atu, ‘ona tatalaina mai lea ‘iā te ‘outou. 

‘Auā o lē e ōle atu, e foa‘iina i ai; o lē e sā‘ili, e maua lava e ia, e tatalaina fo‘i le faitoto‘a i lē e tu‘itu‘i atu. 

‘O ai se isi o ‘outou tamā na te avatu i lona atali‘i se gata pe a tagi mai i se i‘a? 

‘Pe avatu ‘iā te ia se akarava pe a ōle mai i se fuāmoa?  

‘O le ā lava lo ‘outou leaga, ‘ae tou te iloa lava ‘ona avatu mea lelei ia ‘outou fānau. E lē sili ‘ea la ‘ona foa‘i mai e le Tamā i le lagi le Agaga Pa‘ia i e ōle atu ‘iā te ia?”

O lenei  lava fo’i le aso ma  le taimi e tatou te manatua ai pea le Alofa o le Atua na Liutino Tagata mai ai le Lalolagi e ala i a Iesu Keriso ina ia aua nei i ai se tasi e fano ae ia saofaga atu le ola e fa’avavau ua ia saunia mo i tatou uma.

E pei o nisi o ana fetalaiga e fa’apea; ‘O Ia lava na o matou maua ai le tofi o i matou na tofia anamua e tusa ma le finagalo i le ua matua galue i mea uma lava e tusa ma le pule a lona finagalo’

E avea ai a’u e fai ma sui o le Nusipepa o le Samoa Observer e fa’ao’oina atu ai le agaga fa’afetai aemaise o fa’amanuiaga mo si o tatou atunu’u atoa lava.

Fa’afetai i la outou lagolago i mea uma lava, e lagona le fa’atauva’a pe a toe tu ma toe tepa i galuega ua ma’ea o lenei tausaga, ma o le itu mautinoa, na mafaia mea uma ona o lo outou so’oso’o tauau mai.

E talitonu o a ni fa’aletonu ma ni aleu na sasi ai le auaunaga nei, ua o tatou ioe fa’atasi i le  fa’amagaloga sili na afio mai ai le Atua e ala i le Pepe o le Kirisimasi,o Iesu Keriso.

Ia tatou tau fai tatalo ma talitonu i le Malosi o lona Mana e ta’ita’iina ai pea i tatou i aso uma i le loto maualalo,filemu ma le alofa uma lava.

Ia tatou tau fai maua fa’atasi se Kirsimasi Fiafia ma se Tausaga Fou manuia.

Soifua.