Soso’o Fa’amausili Moli suafa Malietoa

By Ilia L. Likou 24 December 2017, 12:00AM

Ua fa’amaonia mai nei le Fa’amasinoga o Fanua ma Suafa le avea ai lea o   Fa’amausili Moli e na te tauaveina le suafa Malietoa.

O le finagalo autasi lenei a le fa’amasinoga ua avea ma fa’ai’uga; ‘Fa’aiuga ma Poloaiga’

1. O le faasalalauga e fatatau i le suafa Malietoa na fa’asalalauina i le Savali 28 Iuni 2017 ua talia ma fa’amaonia e le fa’amasinoga 

“(a)O le faasologa i le suafa Malietoa e amata mai suli o Malietoa Moli, soso’o ma suli Malietoa Gatuitasina soso’o ma suli o Malietoa Talavou ua talia ma faamaonia e le fa’amasinoga

(e)O le filifilia ma le tofiaina o Papaliitele Fa’amausili Moli Malietoa i le suafa Malietoa ua talia ma faamaonia e le fa’amasinoga.

(i) Ia faia le saofai e tusa ai ma tu ma aganuu i le fuaiupu e 20 o le Tulafono o Fanua ma Suafa i le 1981.

“(o) A mavae le nofo o Papaliitele Fa’amausili Moli Malietoa i le suafa Malietoa mai suli o Malietoa Moli ona soso’o lea ma se nofo mai suli  Malietoa Gatuitasina, e 12 masina e fai ai le filifiliga a suli o  Malietoa Gatuitasina afai ae ma’ea le 12 masina o le filifilga a suli Malietoa Gatuitasina e  le’i maua se autasiga ona se’e atu loa lea i suli o Malietoa Talavou, afai foi e ma’ea le 12 e le’i i ai se autasiga a suli Malietoa Talavou  ona toe o’o atu foi lea i le fasologa i suli Malietoa Moli e filifili ai foi sa latou nofo e tasi ai i totonu fo’i o le 12 masina ma o le faiga lea o le a alu ai le faiga filifuiliga o le suafa Malietoa i le lumana’i.

I se toe tepa ai i tua i le mataupu lava lenei  i nisi o fa’asalalauga talu ai e fa’apea na  faamanatu  isi alo (faletama) o Malietoa Tanumafili II, “Tuamasaga manatua e iai lou tofi, ne‘i faoa.” Papalii Titiuatoa Malietoa Tanumafili II.

O se itu na tete’e ai fanau a Malietoa Tanumafili II, ile filifilia o Moli ile suafa Malietoa.

E tusa ai ma ripoti na saunoa ai Papalii Titiuatoa “O le uiga tonu lava lea ole faaupuga ua logo ai Samoa atoa, o Malietoa ma lona talaga atoa.” 

“E faasino tonu lava ile atu Tuamasaga.

Ole filifiliga na faia i Sapapalii i masina ua tuana’i mo se suli na te toe tauavea le suafa Malietoa e pei ona agia ai i luga o ofisa faasalalau, faapea na malilie itu e tolu ina ia faaauau ai e Faamausili Moli Malietoa Tanumafili II le suafa Malietoa. Ole nofo lea na fai faavaveao i Malie ile silia ma le 10 tausaga ua tuanai ae mulimuli ane ua taofia ele faamasinoga e oo mai ile taimi nei.

“E  le filia mai Sapapalii le Malietoa auā e le ose Malietoa a Sapapalii. 

“Ole filifiliga matou te lē filifilia ae matou te talatalanoa lava matou ole fanau, ise tasi o matou e malilie iai, ona tuu lea ma faataatia. Auā ole filifiliga e fili mai ele Tuamasaga.

“Na‘o na fili e matou ole fanau, ae afai e le finagalo iai le Tuamasaga ona faatino lea ole filifiliga ale Tuamasaga. 

“Ole Tuamasaga oloo iai le pule e filifili ai se Malietoa, ole Tuamasaga oloo iai le pule e faaee ai le suafa Malietoa.

“Ole talaga atoa ole Malietoa ma lona nofoa vaevae loloa, ole itu tolu o Sagaga, Talaga atoa, ole Faleono ole Atigaga,  Faleata ma le Gafa. O Faleata atoa ma Safata atoa ole Vaimauga atoa ma Palalaua i Siumu ile Alataua, ole talaga atoa lena ole Malietoa ma Faleula o iai le isi toatolu ma Saleimoa. Ole faleono lena ole Atigaga.

Na ia ta’ua fo’i “Ole agaga ma lo‘u manatu e fia faailoa lea vaega ole talaaga atoa ma le nofoa vavae loloa. Ona ole magumagu ile Tuamasaga ne‘i faoa lona tofi.

“Ole tofi ole Tuamasaga ole Suafa Malietoa ma ona mamalu. 

“Ole matafaioi ale Tuamasaga ole puipui o lona tofi, auā na tofi mai e Letiogie le uluai Malietoa e nofo ile Tuamasaga. E susū ma nofo ile Tuamasaga. 

“Ose tulaga e ao ona manino Samoa ma le Atunuu, o mea nei na tuugutu mai e lo matou tamā ia te au. Na ia faapea mai, Papalii Titi, tautuana ma oe le Tuamasaga. 

“E faamanatu ai ile Tuamasaga ne‘i faoa.

Usuga a Malietoa Tanumafili II

Usuga muamua ile tamaitai Rarotoga o Caroline, e ulumatua le matou uso ua maliu e suafa ia Papalii Eddie poo Aki ma lona tuafafine o Tooa Tutai, ole toalua lena e faasino iai le upu ole Alii o Aiga.

Usuga lona lua ia Lili Tunuiavela ole alo Molioo Seiitu e ulumatua ai Papaliitele Laupepa, sosoo lea ma Tooa Tosi, Vainuupo ua maliu, Papalii Momoe ae uii ai Faamausili Moli.   

Usuga lona tolu ile alo o Fonoti Ioane, o Lotofaga, Falesefulu Satuala Iutita Fonoti, e toatasi na‘o Papalii Titiuatoa.

Usuga lona fa, ile suli o Matautia Utufaalalafa i Aleipata, le tamaitai o Matilamaivasa, e toatasi le tama oloo teu i tuamaota o Malietoa i Vaimauga.

 

Usuga lona lima, ile  alo o Maualaivao Neru I, le tamaitai o Aolele, e toatasi le tama o Papalii Ioane Junior.

Usuga lona ono, ile alo o Lealiifano i Vaovai Falealili, ile tamaitai o Kale, e iai Papaliitele Douglas, oloo nonofo nei ma lona toalua i Meleke.

O nei  faletama uma ua fa’amaonia  le faaiu faaletulafonoina uma lava ia Malietoa Tanumafili II.

By Ilia L. Likou 24 December 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>