Fa’aaogā lelei le taimi – Mahonri
O le talitonuga o le ali’i i a Mahonri Levale, 15 tausaga o Letogo - ‘ e leai lava se isi mea e mafai ona maua mai ai manuia, ua na’o le tausiga lava o matua.
E afea e le Fofoga o Samoa Mahonri i le aso ananafi o lo’o ia fa’atauina atu i le mamalu o le atunu’u feafio’ai niu malulu i le tau e $1 ma le $2. “Ia o lo’o ua malolo le aoga i le taimi lenei ona olo’o ua fa’agasolo nisi o suega a vasega, ma o a’u o lo’o i le Vasega 10 i le Kolisi o Vaimauga.
“Na tu’ua loa matou ona o su’ega o’u fai loa i o’u matua ou te sau i luma ‘i’inei e fa’atau niu aua se tupe maua o si o matou aiga.
“O le agaga fiafia tele i a te a’u ina ua ou o’o mai ia o lo’o tele lava tagata e omai ma fa’atau atu niu i aso uma. “E maua lava la’u $50 i le aso e tasi, ma o se tupe lelei tele e fesoasoani ai mo le aiga.
“Ia na ou fai i lo’u tamā e malolo ia ae ou sau i le asō, ua ou alofa ai ua alu fo’i le tausaga o feagai ma galuega nei aua se tupe maua e ave ai matou ma nai o’u tei i le aoga. “E sili i a te a’u lo’u sau ou te faigaluega nai lo le alu e ta’a solo i le taulaga.
O lea fo’i le manaoga o Mahonri i le toatele o fanau aoga.
“O la’u ia fautuaga i le to’atele o tupulaga ia fa’aaoga lelei ia le taimi e malolo mai ai aso fiafia. “E fai lelei ai se fe’au e fesoasoani ai nai matua ma ia taumamao mai vevesiga i le taulaga. “Ae pei e manaia lava nai fe’au nei e fesoasoani ai i aiga...ma fa’aaoga lelei le taimi.