Galue Leao ia a’oa’oina ai le Fanau

Tusia Ulimasao Fata ,

48 Hits

Leao Liva Muliaga

Leao Liva Muliaga

E ese’ese lava mafua’aga e ala ai ona galulue tagata.

O nisi e galulue ina ia maua se seleni, a’o nisi foi e galulue aua le tausiaina lea o aiga.

O le Tama ia Leao Liva Muliaga, ua atoa le 62 le matua o lona soifua, ma e sau mai le afioaga o Faleula.

Na feiloa’i atu le Fofoga o Samoa ia Leao a’o faia lana galuega o le fa’amamaina lea o le vao I totonu o lana fa’atoaga ma o lo’o fesoasoani atu iai lona faletua ma lana fanau tama e toalua I le taeao ananfi.

Na fa’aalia e le Tama ia Leao, o le mafua’aga lava ua ala ai ona ia galue i lana fa’atoaga, ona o le lagona fiafia e n ate maua mai ai e pei lava o faia sana fa’amalositino, aemaise ai le taumafai lea ia iloa e le fanau ona fai le ola galue.

“O lo’o faapena lava ona fa’atuputupulaia le lagona o le fiafia e galue leaga ua amata foi ona sau le matua ia, ae manaia si lea mea e fai ma fa’amalositino aemaise foi le a’oa’oina o le fanau ia iloa ona fai le aiga faatasi ma isi galuega fai”, taua e Leao.

Na ia fa’asoa foi i le Fofoga o Samoa o lana fanau Tama e toalua o lo’o faigaluega uma I laua, ae fa’atoa o i le afiafi, ae galulue mo ia ma lana fa’atoaga I le ao.

“O la’u fanau tama toalua lea o lo’o matou galulue ai iinei e tele lava ina faigaluega I le po ma le afiafi a’o le taeao e faigaluega aim o a’u”, 

Na taua foi e Leao o lo’o faapena foi ona tulaga lelei lona aiga, i le faigaluega uma ai o lana fanau, aemasie le latou fa’atoaga o lo’o galulue ai nei.

“I le soifuaga lava ia ua tatou iai nei, o lo’o lelei mea uma I le matou aiga ona o le fesoasoani ua maua mai I galuega a le fanau aemaise le matou fa’atoaga”.

“O fua uma o fa’atoaga I totnu o le matou fanau, matou te le fa’ataua atu I se mea, ua na’o le fa’aaogaina lava aua meaai a le aiga, ae a tele lava ua matua fa’asafua atu I nai aiga o lo’o nonofo atu latalata I le matou fale”.

“O lo’o matua fa’afiafiaina pea a’u ona o lenei galuega out e faia, e fa’amalosiau mai pea mo a’u ina ia tumau ai pea le malosi I le tino”.

Na toe fa’aalia foi e Leao I sana fa’asoa I lenei vaitau ua iai le tatou atunu’u.

“Ou te talitonu lava ua le na’o Samoa o lo’o maualuga ai le tau o le soifuaga, talitonu o lo’o tau fai tutusa I tatou ma le tele o nisi atunu’u le maualuga o le tau o le soifuaga”.

“Pau le mea mautinoa, a ua tatou iloa loa ua maualuga le tau o le soifuaga, ona tatou toe foi loa lea I le mea tuai o le fa’amoemoe loa I mea toto ma mea o lo’o maua lava I Samoa nei”.

Na ia fa’aalia foi o le fiafia ma le ola sa’oloto o le toaga lava e fa’amolositino.

© Samoa Observer 2016

Developed by Samoa Observer in Apia