O le Talalelei, o le Upu Moni

By Nefertiti Matatia 24 October 2017, 12:00AM

A lelei ona tapenaina lou lotoifale, o le fua vaaia foi lea o au galuega I fafo atu, saunoa ai Suitulaga Li’o.

I le fa’atalatalanoaga ma le Fofoga o Samoa, na taua ai e Suitulaga mafua’aga ua tele naua ai fa’afitauli I totonu o aiga talu le le faamaoni I matafaioi fa’ale matua.

“Ona ua fa’amuamua lava e Tama le fagu pia I le aso Sapati, ae galo ai ona alu e ave le fanau I le lotu, aua o le Tama o le ulu o le aiga e tatau ona fai ma fa’ata’ita’iga lelei”, saunoa Suitulaga Li’o.

Na saunoa foi Suitulaga mai le afioaga o Vailele o le mafua’aga lava o le tele naua o sauaina o tama’ita’i I totonu o aiga o lo’o tatou fa’alogo ai pea, pei lava o le tala I se Tama lea na ia toe faia ni uiga mataga I lona lava afafine ona o le o’o lava I se malumalu tapua’i.

Na taua foi e le Tama ia Suitulaga e 50 tausaga o lona soifua, ua tele o nisi o aiga ua fai le gasesega o le To’ona’i ma mea ua alofia ai le malumalu tapua’i, ma o se tulaga le talafeagai lea tulaga.

“O le mea lea ua tele ai nei mea e tutupu mai ona o le le fa’asoa lava I nisi aua ni auala e foia ai nei uiga ma talatalanoa atu foi aua se fofo o lenei mea ua tupu”.

E talitonu foi le Tama ia Suitulaga o le talalelei a le Ali’i o se upega lea ua matua sili lona taua I tatou olaga, ma o le Ali’i foi o lo’o tatou tapua’i ai o se Ali’i e tumu I le alofa mutimutivale.

“O le upu a le Ali’i e tomatauina ai I tatou I le ala moni, ma e fa’aaupegaina ai foi I tatou I le fa’atuatua ma le poto”.

Na’o le pau lava le auala e maua ai e tatou le ola fiafia o le Ali’i lo tatou fa’aola.

Na saunoa foi le Tama ia Suitulaga o le alu I le lotu I le aso Sa o se fa’amalosiau lea mo I tatou aua le vaiaso fou ma ona galuega.

“O le alu I le lotu I le aso Sa, e saunia ma tapena ai I tatou I le fa’aleagaga aemaise le fa’aletino aua fuafuaga tatau uma o le vaiaso fou. Amata foi le aso gafua e amata malosi lava talu ai le feau mai le Sapati na totoina e le Ali’i I totonu o lou agaga mo le vaiaso atoa”.

“E te alu I le lotu I le aso Sa ma e tatalo I le Ali’i mo lana puipuiga, e moni lava foi e tatou te lima vaivai I le tele o taimi, o le Ali’i e n ate le tu’ulafoaiina I tatou”.

Na taua foi e Suitulaga o le tau o le soifuaga ua iai nei Samoa e le taugata, o lo’o ia fiafia lava o ia I ana mea ua iai. Na ia fa’ailoa mai foi I le Fofoga o Samoa o le mafua’aga ua mativa ai nisi o tagata Samoa, ona ua ova le paie.

“O la’u lava ia manatu I le tau o le soifuaga ua iai nei Samoa, e le taugata. O tatou I lenei vaitau, ua manana’o lava I le mea vave po’o le auala vave.

Ae o le mea e tatu ona tatou iloa ma malamalama lelei iai o lo’o iai o tatou fanua o lo’o tatou galulue ai mo le totoina o fa’atoaga pei o le olaga a tatou tuaa ua tao’oto mai I Ti’asa.

O le tele foi lava o nisi ua na’o le faitio I le malo fai mai ua le fa’amaoni le malo I le latou pitolaau ae galo ai o tatou lava tagata o lo’o pau iai le le sogasoga.

Na ia taua o totonu lava o le tatlou lotoifale e tatau ona tapena muamua, aua o iina tonu e fua mai ai au galuega I fafo atu o lou lotoifale.

By Nefertiti Matatia 24 October 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>