E manuia pe ā galulue fa’atasi

126 Hits

O  le galulue fa’atasi ai o so’o se afio’aga aemaise o le pulupulima i le tauaveina o so’o se galuega o le ā le taumate le manuia o so’o se taumafaiga.

E pei o lea le agaga e tasi na mafua ai le tino mai o le  galuega a le afio’aga o Le’auva’a, i le fa’amatagofieina lea o  lumāfale o le afio’aga i moli ma nisi o teuga ese’ese.

O le tatalaina ai o lea fa’amoemoe i totonu o le afioaga i le Aso To’ana’i o se agaga  fa’afetai tele i le to’atele o le mamalu o le afio’aga i le tele o pa’aga ma uo aemaise o aiga i atunu’u e mamao i le fesoasoani ai.

Na saunoa le sui o le afioaga, Tuala Oli Ah Him o lenei fa’amoemoe o se isi la’asaga fou lea mo le afioaga aemaise o le aga’i atu ai i le lumana’i.

“Ia e pei ona silafia e le’o nao le pau nei o atina’e o lo’o silasila ai le nu’u nei mo le atina’eina ae o lo’o fa’apea ona unai’a fo’i le tele o tupulaga  talavou ina ia mafai ona maua lo latou iloa i le faiga o ma’umaga ma isi lava atina’e e pei o faigafaiva.

“O lo’o ave la matou titilo i nai fanau fo’i ua uma a’oa’oga ina ia maua so latou malamalamaga i le fa’atinoina ai o vaega nei mo le lumana’i.

O lea fa’amoemoe i le Aso To’ana’i i le tatala aloa’ia ai o vaega nei mo le afio’aga e pei ona amata laina atu ai lava moli i le auala i le amataga o Le’auva’a se’ia pa’ia le tua’oi ma Sale’imoa.

 “Ia e pei ona ta’ua muamua ai le tele o atina’e fa’agasolo pea aemaise lava mo talavou, ia o le agaga maualuga lava ia atina’e i le taimi lenei aua o i latou ia o manuia o nu’u, ekalesia ma le atunu’u. “A lelei atu lava i le asō ia o le a le taumate fo’i taeao.

 “Ia o le soifua maloloina o lo’o tele lava ina fa’amamafa ai fo’i le tele o taimi aua a lelei lava vaega nei ia o le manuia fo’i lea.

“O le agaga maualuga lava o lenei fa’amoemoe e pei ona  i ai i le asō , ia  o le lagolagosua lava i le malo ma ia fesoasoani tele e fa’atosina mai turisi po o tagata mai fafo i totonu o Samoa.

 “E pei o lea lava le agaga maualuga o nei galuega uma, e ui lava ina tele se taimi na alu ai ia ae fa’afetai i le Atua o lea ua tatala aloa’ia i le manuia.

 “O le taimi  lenei o lo’o ua matou fa’aaogaina le eletise a  le malo e pei lava ona masani ai ona e fai lava si taugata o le eletise e alu i le la. “O lo’o fesoasoani ai tele ai le tele o nai aiga i totonu o le afio’aga.

 “Ia masalo e le toe mamao ia ona sui lea i le malosiaga e alu i le la.

“E leai lava se isi mea e mafai ona fai pe ana le galulue fa’atasi ma tasi le agaga e fa’atinoina ai vaega uma nei. “Ia o lea le fa’anaunauta’iga tele ia fai fo’i lenei afio’aga e tulei malosi nisi o atina’e mo nisi afio’aga.

 

© Samoa Observer 2016

Developed by Samoa Observer in Apia