LAUGA - “… a o a’u, ou te tū i tafatafa o lo’u tamā; ou te tautala foi i lo’u tamā ia te oe.”

By Rev. Petaia Setu 24 September 2017, 12:00AM

(1 Samuelu.19:3)


Ua ola se isi ia te oe? Ua mafai ona e faaleleia ni masei? O ’e faalatalata i lou tamā poo lou tinā i ni mea lelei? Manatua, e afua ona faasili e le Atua le tagata, ina ua alofa faamaoni sea tagata i le Atua.

O le vaega muamua lena o le Tulafono faa-auro a lo tatou Alii. Lua, o le ituaiga alofa e te alofa atu ai i lou uso ā tagata (tuaoi), faapei ona finau ai le ulumatua a le tupu o Saulo mo lana uo o Tavita. “… a o a’u, ou te tu i tafatafa o lo’u tamā; ou te tautala foi i lo’u tamā ia te oe.”

O upu tautino. Upu na te momoli maia lagona o i le loto. Le loto ua momomo i le alofa.

O Ionatana, o le perenise o le malo Isaraelu. O le ulumatua ia a le uluai tupu o Isaraelu. Manatua foi soo se perenise lava e le siligia lona see i le nofoa e sosoo ma le tamā! A tautala foi i lona tulaga o le aliioaiga, o lona uiga, o ia lava e ave iai le faamuamua a le aiga i mea uma. E faamoemoe iai le aiga. E limataumatau iai le tamā. E tatala ia te ia le tōfā a le sa’o i mea uma o le aiga, o ana measina i suafa, o gafa ma eleele, atoa ma ona nafa tausi faa tamatane.

O mea vaivai ia o le olaga sa ia faataugāina le soifua o Saulo ma faalumaina lana nofoaiga i lona fia fasioti o si nei tamaitiiti faga manu amiolelei (1. Sam.20:30,31). Faafetai i le Atua ona o lenei perenise loto mamā! Ua iloa e Ionatana le vaivai ma le toilalo popo o lona tamā; ua ia talitonu foi i le faamaoni o le Atua ma lana pule aoao i tagata ma mea uma lava (1 Sam.20:15).

Ua le i manatu Ionatana i lona tulaga maualuga ma le miti a lona tamā ia te ia. A o mea tonu lava foi ia o loo lepetia ai le fealofani o aiga ma fanau, malepelepe ai nuu ma faalapotopotoga, ua soona fai le malamalama ai le tele o feau ma galuega, ua oi ma fesulufai solo ai le atunuu ma ona tagata lotu. O lou manatu o oe ua se’ei i le suafa; ua e pule i tagata ma mea uma. O oe ua poto; e lelei lau galuega; e fai ai ou faailoga. Le au uso e, e le i faapena le manatu o Ionatana.

Na sau i lalo e fai ma olataga. Na tu i le va e fai ma puluvaga. Ua le i manatu ia te ia lava, a ua alofa i le uso a tagata. Ua faamoemoe e tu i tafatafa o le tamā, e faaolooloma’au mo le lelei tausia o le va.

E le o faamoemoe le tu e foli i le tofi; a o le alofa e faamaoni. E mafai ona ola se isi i lau tu? Ae o sa’o le mea o ’e tu ai? Pe e te le o tu i le tulaga o Iuta le faalata? Poo le faasapasapa a Peteru a o faafoliga lona olaga? O le uiga o le igoa o Ionatana, ua tuuina atu e le Atua? Samoa e le i faa’alo’aloa se upu a Ionatana. E le i fefe foi e tautala i le mea moni (1Sam.20:32).

Na velo e lona tamā i le tao na misi! E le i suia ai le leo ma le moni o le alofa o Ionatana. Aisea? Ua tuuina iai e le Atua le loto ua atoatoa. E tautala mo le lelei. E finau i le amiotonu. E tu mo le ola.

E oti ona o le alofa. Oka, se tamālii o lenei perenise! E ma’eu le loto o lenei talavou! E le ina a tagi le uō i lona mafatia, “Mauga o Kilepoa e, aua nei iai se sau; aua nei iai se ūa. Ua tigaina a’u ona o oe Ionatana; sa ma’eu lou alofa ia te a’u, e sili i le alofa o fafine. Auē! Ua maliliu toa, ua maumau ai ‘au’upega o le taua.” (2 Sam. 1:21, 26,27). E le lilo i lalō tamaliiaga o le uō. La lea ua pese ai augātupulaga uma i le vii o Ionatana. Aisea? O le alofa e moni. Tumau i le feagaiga ua ōsi (1 Sam 20:14-17). Faamau i le oti (1 Sam.20:42).

Samoa e, e manatua tua’ā o le atunuu ma augā tamā ua taooto mai ti’a sa. O ē sa tutū i le ao ma le po, i tigā ma puapuagā ina ia fai mo oe le asō. Ae faapefea o tatou aso? O ai a tu mo lau fanau ma lou aiga? O ai a tautala mo oe? O ai e alofa moni i le atunuu ma le ekalesia?

Le atunuu e, ua uma ona maliu Keriso; o le atoaga lena ole alofa faamaoni o le Atua ia i tatou. O lo ua afio a’e o ia i le lagi, o loo tu foi o ia i le itu taumatau ole Atua le Tamā, o loo fautua mo oe ma a’u ma tatou uma ( Rom.8:34). Tatou te fesēsēa’i solo i agasala.

Peitai fai  mai Ioane, “ o ia te i tatou le fautua i luma o le Tamā, o Iesu Keriso lea, o lē amiotonu.” (Ioa2:1) “O le mea foi lea e mafai ai ia te ia ona faaola pea lava i ē faalatalata atu i le Atua ona o ia, auā o loo soifua pea ia e fautua mo i tatou.” (Epe.7:25). E ui lava ina mativa ma faatauvaa le uō a Ionatana (1 Sam 18:23), a o le alofa lava sa fai ma fu’a taualuga i loto o nei tama.

E te silafia Samoa, o le ’auga atoa  o le afio mai o Iesu Keriso i le lalolagi; e alofa ia te oe. Ia ola lou aiga ma lau fanau. Ia lelei oe ma le Atua. Ia tatou saoloto ma ola fiafia. E lei gata i luga o le satauro le alofa laveai o le Alii ia te oe. E le mafai ona taomia e le tuugamau le moni o le alofa faaola o Keriso. O loo tautala pea i aso uma ma fautua mo tatou uma.

O loo galue pea lona mana ina ia tatou maua le faaolataga. Ioe, e le o mālōlō le Alii. O loo tu pea o ia i le itu taumatau o le Atua le Tamā, ma tautala mo lou saolotoga ma lo tatou faaolaina. Se ā fa āu? O ’e iloa lau feau? E te finau mālō i le manomano o luitau? 

Uso, tu ia ola se isi i lou ola. Tautala i le alofa e saoloto ma manuia ai. Fai mai le atalii o le tupu o Saulo, “… a o a’u, ou te tu i tafatafa o lo’u tamā, ou  te tautala foi i lo’u tamā ia te oe.”

Amene

7737063/7783782

By Rev. Petaia Setu 24 September 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>