O Samoa o se atunu’u galulue ona tagata

By Sarafina Sanerivi 24 September 2016, 12:00AM

“A le afu le muāulu, e le maua se manuia.” O le talitonuga lea o le tamā ia Damian Peterson mai le afioaga o Faleasi’u. 

O Damian e 40 ona tausaga ma e to’alima nai ona alo. O ia o se faipisinisi, ma e fai lana fale’aiga e ta’ua o le Lawdion’s Takeaway i autafa o le alatele i Faleasi’u. 

Ina ua afea e le Fofoga o Samoa i le aso nanafi mo sona finagalo i le soifuaga ma le olaga i Samoa, na ia fa’ailoa mai ai, o Samoa o se atunu’u e galulue ona tagata. 

“O le mea lea o lo’o ou maitauina pea i totonu o Samoa, o le ola galulue ma le ola finafinau o tagata,” o lana fa’aaliga lea. 

“A e lē galue, e leai fo’i se mea e maua e tausi ai fanau ma aiga, aemaise o mea e fai i totonu o le aiga ma nu’u.

“O le ala lena e va’aia ai le tele o le mau ai faipisinisi ma i latou e fa’atau a latou oloa i autafa o le auala auā o iina e maua mai ai le fesoasoani mo latou ma latou aiga.”

Na ia fa’aopoopo mai fo’i, o le olaga lenei, a le afu lava le muaulu, e le manuia. 

“O a’u e fai la’u pisinisi falai moa ma falai i’a. 

“O la’u lea galuega e fai e fesoasoani ai i le tausiga o la’u fanau ma mea e fai a le aiga. Ou te talitonu lava a’u ia i le suamalie ole taui o le tagata e ola finanau ma ola galue. Auā a tatou le galulue, o le a fa’afefea ona tausi fanau ma aiga? 

“O le ala lena e ese lo’u fiafia ai i le ola galulue o tagata Samoa, e fa’aosofia ai fo’i lo’u nei tagata ina ia galue malosi fo’i auā ou te iloa, a fa’amaoni lava le tagata ma to’aga, e manuia ai lava lona ia aiga ma lana fanau. 

“Auā e le fa’apea e galue malosi a’u ae manuia ai isi tagata. E galue lava le tagata ia mo ia lava.”

Na fa’ailoa mai e Damian, ua tolu nei masina talu ona faia lana pisinisi nei. 

E le gata i lea, ae na fa’aalia fo’i e Damian, e na’o le pau lea o le alagatupe a ia ma lona aiga. 

“O le ala lea ou te tinoū ai lava e fai la’u pisinisi auā o lo’o fa’amoemoe ai le manuia o si o matou aiga.” Famai Damian, e maua lava lana $100 i le aso e tasi mai i lana fale’aiga.  “Sa telē lava se tupe na ou mauaina i taimi o iai la’u fale’aiga i le isi itu o le nu’u. Peita’i o lea fa’ato’a amata i le mea fou lea ua iai, ma o le ala lena e mo’i lava ia ae to’atele latou te le’o iloa le nofoaga fou lea ua iai la’u pisinisi.” Na ta’ua e Damian, e ala usu lava i le taeao i Apia e fai lana fa’atau ona fa’ato’a sau ai loa amata lana pisinisi i aso uma.  O le isi tulaga na fa’aalia mai e Damian o lo’o tupu i Samoa i le vaitau lenei o le tulaga lea i le fa’atuputpula’ia o le faitau aofa’i o Saina e fai a latou pisinisi i Samoa. 

“Ia te a’u lava ia, ua va’aia lava le to’atele o i latou ua fiafia e fa’atau mai i faleoloa a le au Saina, ae ua seāseā ona toe iai nisi e fa’atau i faleoloa laiti a tagata lava o le tatou atunu’u.

By Sarafina Sanerivi 24 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>