Ua usufono le Salelesi o le Maota - Letalu Sogialofa Tasala

Tusia Lanuola Tusani Tupufia ma Fa’aliliu e Maiava ,

500 Hits

‘AU’AUNA LELEI E MA LE FA’AMAONI: Le Tofa a Letalu Sogialofa Tasala.

‘AU’AUNA LELEI E MA LE FA’AMAONI: Le Tofa a Letalu Sogialofa Tasala.

Ua vala’au le Atua i le sa fai ma va’aiga o aganu’u mamalu a Samoa i totonu o le Fono Faitulafono e pei ona lauiloa o le Salelesi, pe a tau-aofia le Palemene a le atunu’u. 

O le vaiaso ua mavae, na usufono ai le Tofa a Letalu Sogialofa Tasala, le sa fa’aigoa e le to’atele, o le malu-o-aiga, a’o le agai fo’i a le atunu’u aoao. 

E le o māua le mafuaga o le maliu o si ali’i-tausa’afia mai le afio’aga o Salelesi. 

Na avea o ia ma agai (Salelesi) o le Maota mai le paea’iga lona XII, i le tausaga e 1991 – 1996 e o’o mai i le 2016, ua atoa iai le fa (4) o paea’iga soso’o o tautua ai pea mo le Palemene o Samoa. 

O Letalu na fa’aauauina mai le tautua fa’aSalelesi, ina ua usufono le Tofa a Asa Seigifili sa avea ma Satini o le Maota i lea taimi. 

I taualumaga a le Palemene i le aso ananafi, na fa’aauau ai e le Salelesi fou, o Tamua Senituli Ta’alili Levi le galuega ua tu’ua e Letalu.

I taualumaga masani o galuega a le Palemene, o le Salelesi e agaia le taulaga-osi pe a tauaofia le Maota ma fa’ailo le ‘auai o le atunu’u aoao i taimi o Fonotaga.

E masani ona va’ai le Salelesi i ana teuga fa’aleAganu’u, o tula’i i le ogatotonu o le Maota e fa’atino le taulaga i taimi uma e amata ai le Fono pe fa’ai’u fo’i.

I aso ua mavae, sa tau’ave e le Salelesi le tofi o le ‘Satini o le Maota’. O nisi o ana tiute-fai, o le tau’aveina lea o le “to’oto’o o le pule”, a’o foufou atu le Fofoga Fetalai i le Maota i aso uma e fonoa ai le Maota o Samoa.   

O le taimi nei, ua na o le agaia o le taulaga-osi o lo’o fa’atinoina pea e le Salelesi a ua tau’ave e le Satini o le Maota le To’oto’o, lea e fa’ata’oto tonu i le laulau, e fa’ailo ai le nofoia e le Fofoga Fetalai o lona Nofoa mo le amataina o taualumaga a le Palemene.

© Samoa Observer 2016

Developed by Samoa Observer in Apia