E faigatāle olaga fai fa’atoaga

Tusia Joyetter Feagaimaali’i-Luamanu ,

63 Hits

Ene Tama mai Solosolo

Ene Tama mai Solosolo

 “O le olaga faifa’atoaga o se galuega faigata, ae o le iuga lava lea e o’o i ai le tagata e le’i uma ni aoga e pei o a’u,” o le talitonuga lea a Ene Tama mai le afioaga o Solosolo.

E 21 tausaga o lona soifua ma e māua atu e le Fofoga o Samoa, o lo’o fa’atali lana pasi i le ala e aga’i i le maketi e fa’atau ana meamata.

Na amata mai le olaga faifa’atoaga a Ene fa’atoa 16 ona tausaga, ina ua malie lava o ia e nofo ma le aoga.

O ia o le ui’i o se fanau e to’afa.

Ae ui o ia o le ui’i o le fanauga e le’i avea lea ma alofaga o lenei taule’ale’a.

“E tatau ona ou galue malosi e pei o nai isi o’u uso matutua atu i a te a’u.

“I totonu o nisi aiga e fai fa’apelepelelava le ui’i, ae o a’u out e le mana’o e fai fa’apepe a’u.

“O lo’u lava loto na ou nofo ai ma le aoga e le’o se loto o sesi, e i ai fo’i la le taui o le le i’u o le aoga ma e ala ona ou galue ma le malosi e pei o nai o’u uso matutua.”

Sa fesiligia fo’i e le Fofoga  Samoa le aofaiga o lana seleni e maua mai i lana fa’atoaga.

“E fai lava si telē o le fa’atoaga a le matou aiga ma e lua i le tolu taga talo e ave i le maketi i vaiaso ta’itasi.

“E maua ai lava le matou $250-$300 i le vaiaso, ae aga malie fo’i tagata o le atunuu pe a o atu nei e faatau talo.

“E i ai nisi taimi matou te le tau o ai i le maketi ae fa’atau lava i luma o le auala.

“O nisi fa’atau talo e fa’apea lava latou o se galuega faigofie le fai fa’atoaga ona e fai mai lava i se paū, o nisi taimi toetoe lava o lota faiatu ai e ave fua ma latou.

“Ou te leiloa pe aisea e ala ai ona faapea tagata auā e le fa’apea a o i faleoloa o le au Saina ona fai ai lea e aumai se paū o tau o oloa mo latou, e le taitai tupu le na tulaga.

Sa fa’aalia fo’i e Ene o lesi alagātupe maua a le latou aiga o lona tuafafine o lo’o aumau i Niu Sila.

O le tulaga fo’i i le suavai sa fa’aalia e Ene o lo’o pulea e le komiti a le afioaga e pule lava la latou i le taimi e ti ai ma tapē ai.

“O le matou nu’u atoa lava e ao ona usitai’a tulafono o le komiti o ali’i ma faipule ma o latou fo’i ia o lo’o pulea le nu’u.

“Ae pau le itu e fa’afetaiai ai ona o le nuu nei e le’o mitaina le vai ma e le’o totogia fo’i la ni tupe a tagata i le komiti.

Ae i le va’ai mamao a lea taule’alea e fia avea o ia ma kamuta e pei o si ona tamā.

“Ou te fiafia lava e fesoasoani i nai o’u uso matutua, ae ou te mana’o lava ia avea a’u ma kamuta pe a o’o ina fai lava lo’u ia aiga.”

© Samoa Observer 2016

Developed by Samoa Observer in Apia