Fesoasoani i lou aiga

Tusia Aruna Lolani ,

109 Hits

Manu Puamo mai Laulii.

Manu Puamo mai Laulii.

Aua e te faamaimauina seleni ma lou taimi ile faatauina o le tapaa ma le ava malosi, o nei mea e le taua uma.

O le fautuaga lena mai ia Manu Puamo mai Laulii ile au tupulaga a Samoa.

Sa maua atu o ia e le Fofoga o Samoa ao ia agai atu e utu mai se vai sami mo se tasi o ona aiga. 

E 22 le matua o lona soifua ma sa ia taua e lei pa’i lava o ia ise tapaa pe taumafa ava malosi foi o ia.

Sa ia taua o nei mea uma e maimau ai fua le taimi ma faaleagaina ai lou soifua maloloina.”

O le tele o tagata e nao le tele o tala ae le faataunuuina ae peitai o lenei ali’i o se tasi e tu malosi i lana ia tala ua fai. 

Sa taua foi e Manu e toatele lona aiga ma o ia o se tasi o loo galue malosi aua le tausiga o lona aiga.

E faalagolagoina o ia ma nisi o ona uso aua e leai lava sesi e tua ai le aiga.

“O au a ia ou te alu ile maumaga mai le Aso Gafua ile Aso Lulu ona malolo loa laia i isi aso o le vaiaso ma faaogaina lou taimi mo lou aiga.

“E tau le tele a ni mea e fai vagana ai le faia o nai feau laiti mo le aiga. O isi foi taimi ou te kuka ai mo lou aiga.”

Ua tatou iloa uma ma malamalama ile natula o aiga Samoa, e loto fesoasoani le tasi ile tasi ma e tausi aiga foi ona tagata. 

O le ala lena sa taua ai e Manu o ia lava e fiafia e tausi lona aiga ma e iai foi isi ona uso ma tuafafine o loo fesoasoani ile itu tau seleni.

E leo se olaga faigofie ae ala mai fanau le galue ina ia faafaigofieina. 

“Ma o se fautuaga mo le au tupulaga, aua le faamaimauina le taimi e tafafao solo ai ma faaalu sese le tupe ile tapaa ma le ava malosi ae ia toaaga e tausi o outou aiga.”

© Samoa Observer 2016

Developed by Samoa Observer in Apia