Ua vaaia le Faaiuga o le galuega o le falesa e faitau miliona ma miliona lona tau

Tusia Ilia L. Likou ma Faaliliu e Seagaitumua Tupuola ,

417 Hits

Rev. Vavatau Taufao . (O le fausia o le Falesa o le Iupeli  i Malua)

Rev. Vavatau Taufao . (O le fausia o le Falesa o le Iupeli i Malua)

O le Falesa o le Iupeli i Malua lea e faitau miliona ma miliona lona tau e tatau ona mae’a i luma mai o le faaiuga o Oketopa. Ae peitai-o lea tau o le galuega ua faatatauina o le a tele isi miliona e sili atu ai i lo le tau na fuafuaina muamua mo lea galuega.

Na faamaonia e le Failautusi Aoao a le Ekalesia Faapotopotoga Kerisiano i Samoa, o Reverend Vavatau Taufao-lenei tulaga i le faagasologa o se talanoaga ma le Sunday Samoan.

Ae peitai-sa vave ona faailoa mai e Rev, Vavatau e faapea o le aso e mae’a tonu ai lea galuega e faalagolago lea i le faagasologa o mea uma ina ia o faatasi ma le fuafuaga.

“O lenei galuega atoa e faalagolago  lea i oloa faufale mai (atunuu mamao) ma lona taunuu mai i le taimi fuafuaina,” o le faaaliga lea a Rev. Vavatau.

“Ana faapea e mafai ona matou tuuina atu (nisi o oloa fau fale mai totonu o le atunuu-o lona uiga- o le a matou galulue fuafua i lea taimi. Ae o loo matou tilotilo i mea faufale e lelei ma o le pogai lena o le faatuai.” O Rev. Vavatau lea na tofia talu ai nei i lea matata, fai mai o se tasi o faamoemoega o le faamae’a o le galuega, talu ai ua leva ona tosotoso.  Ae peitai, e leai sona mana’o e faanatinati e fai ma mea e ‘alo i ai. 

Matou te le manana’o e tau ina fai ia mae’a le galuega, matou te loto e faamae’a lenei galuega tele i se tulaga e sili ona lelei,” o lana faaaliga lea. 

O le pogai lea ua faigata ai. Mo se faataitaiga, afai e le mafai ona matou tuuina atu faamalama i totonu o le atunuu, o lona uiga-e tatau ona matou toe tilotilo i se isi atunuu e tusi mai ai) mai Niu Sila.

Afai e leai-ia o Saina ma isi (atunuu).”I le taimi nei, fai mai Rev. Vavatau o loo lelei le faagasologa o le fausia o le falesa. “Afai e te alu i lea nofoaga, ona e vaaia lea o loo faagasolo pea le galuega. “O le a i ai le isi uta mai vaa (o mea faufale ia ua faamoemoe e taunuu mai a’o le’i uma lenei masina.

O lea uta o loo aumai ai ‘apa, faamalaga ma isi lava oloa faufale.” I le faagasologa o le fono tele faale-tauaga i lenei tausaga, fai mai Rev, Vavatau na tofia se komiti laititi e galulue i lea galuega.

Ina ua mae’a le Fono Tele a le ekalesia i lenei tausaga, o le tau aofai o le Falesa o le Iupeli a’o le’i uma sa $10,107,951.32. O le tau ua ta’ua i luga o le Iupeli na faamaonia i le faagasologa o le Fono a le Komiti o Tupe a le Ekalesia i le Fono Tele o le tausaganei i le aso 13 o Me. 

O le vaevaega o le tau ua ta’ua i luga e $10,107,951.32 e aofia ai tau o le totogi o leipa e $5,149,630, tau o mea o loo faaaoga e $628,327, mea faufale e  $2,986,579.76, tau o le pulega e $157,833.22 faatasi ai ma tau o le faafoeina e 1,185,581.34.

O lea galuega na amata i le 2014 ma sa fuafuaina i se tau faatatauina e $7m. I lea taimi, sa fuafua e tatala lea fale i le 2015, i le tausaga talu ai. Ae sa le taunuu lea fuafuaga.

O le tausaga talu ai na faamaonia ai e le Faaputugatupe mo le Lumana’i Manuia o Tagata-le faaunegatupe a le ekalesia e $15 miliona tala.I le taimi nei-o lea ua tuuina mai i le ekalesia le 10 i le 15 tausaga e toe totogi ai lea faaunegatupe  e ala i ni tupe totogi faale-tausaga e $1, 743,300.

E tusa ai ma le Ta’ita’ifono o le Komiti o Tupe ale Ekalesia, o Le Mamea Ropati i se talanoaga talu ai, o lea tupe mo le faamae’aina o galuega faifai pea a le ekalesia e aofia ai le Iupeli i Malua.

© Samoa Observer 2016

Developed by Samoa Observer in Apia