Telē le suiga o Samoa
Na maua le avanoa o le Fofoga o Samoa ma le tinā i a Maota Lopati, 84 le matua o le soifua o Sa’anapu-tai i le aso ananafi.
I lea fa’atalatalanoaga na ia fa’ailoa ai le tulaga faigata ma le tele o suiga ua i ai nei le atunu’u pe a fua atu i le tele o tausaga ua mavae.
The mother of eight is particularly concerned about the increasing cost of living that Samoa is facing everyday.
“Ia o a’u e to’avalu si a’u fanau, ae o le tele o vaega e pei ona ua tatou i ai nei, ia ua le toe natia lava le tulaga e pei ona ua tele ina lofia ai si o tatou atunu’u i le taugata o le tau o le soifuaga o lo’o ua tatou i ai nei.
“O le itu mautinoa lava ua tele o nai o tatou tagata e pei o le aitalafu lava ua tua i ai nei vaitau, ona o le le tagolima lava.
“O le tele o suiga ua lofia ai nei, ia ua tatou va’ava’ai uma lava i le taugata o le soifuaga o lo’o ua i ai.
“O le tele fo’i o atinae ua i ai, e le’o mafai ona fesoasoani o le to’atele o nai o tatou tagata ua leai ni galuega, ma ua si’itia ai le leai o ni galuega.
Na ia fa’ailoa o le fai ma fa’ata’ita’iga lelei i lana fanau o se itu lelei tele lea.
“Ia o lea lava le tulaga e ao ona o tatou va’ava’ai i ai, e le gata mo tatou fanau ae o fanau a fanau.
“E pei ona outou silasila mai i ai, ia o lea lava le olaga na masani ai i aso ua alu, ia o le otaota, kuka, ia o mea uma.
“Ae ua masani lava i ai, ma o lea fo’i le tulaga o le maua ai pea o le ola ma le malosi ae o le taimi lenei, o lo’o sologa lelei mea uma.
“Ae o lo’o sologa lelei mea uma i totonu o si o matou nu’u nei.
“O lo’o lelei mea uma, o fanua o lo’o galulue ai, o lo’o lava ma totoe.
“E o’o fo’i pulega a matai, ia o lea lava le tulaga o lo’o i ai, o le to’a’aga lava e tatalo ma fa’alagolago i le Atua, e manuia ai taumafaiga uma aua le lelei o aiga.