O le maua ai o le fa’atalatalanoaga a le Fofoga o Samoa ma Charlie Eti o Matautu Lefaga sa ia taua ai le taua tele o lona fa’atoaga talo ia te ia ma si ona aiga. 

O lenei alii e 20 tausaga le matua le soifua ma o ia o se fai fa’atoaga. 

“Ia e pei ona tau mai lenei itu o le atunu’u ia o lo’o fa’atau atu nai talo aua lava le aso to’onai ma le asosa. 

“Ia o a’u ia sa ou fai maumaga mai lava a’o o’u laititi ina ua le mafai ona fa’aauau la’u aoga. Ia o lo’u tama lava e fesoasoani mai ia te a’u. 

“Ia o lo’u maumaga nei o lo’o fa’alagolago malosi ai le matou aiga. O matou foi e nonofo fa’atasi ma nisi o o’u uso ma tuafafine. O nisi foi o latou e faigaluega ae o a’u lava ia o le maumaga lava e fa’amoemoe iai. 

“O la’u masani lava o aso Faraile uma lava e fa’atau ai a’u talo. E fitu tautalo le taeao fitu tautalo le aoauli toe fitu foi le afiafi. Mai ai tautalo e leai se tautalo  e totoe e la’u uma lava e tagata. 

“Ia e uma a’e le aso e $800 na’i luga la’u tupe maua ma o le fa’amoemoe lava lea o lo’o aiga i mea fai ma mana’omia ia le tupe.

“Ia  o le fafai fa’atolu ai lea o le ma maumaga ma lo’u tama. 

“Ia o ia foi o lo’u limatamatau i le ma galuega ma e faia uma mo le ma aiga. 

“E ui lava le faigata o le totoina o le talo ma faia o galuega fa’afaifa’atoaga, ia e uma a’e lava e lelei lava le tali. 

O lenei galuega e le’o se galuega faigofie, e mana’omia le sa’o o lou mafaufau i le taimi e fa’atino ai, e mana’omia lou malosi ma e mana’omia fo’i le iai o lou loto ma lou fatu i taimi uma e fa’atino ai.

“O la’u taleni a la o se galuega lea ou te fia fa’aauauina i le lumana’i ma ou te talitonu, o se tasi lea o taleni a Samoa, o lo’o to’atele tagata latou te mana’omia mo alagatupe aua tausiga o aiga ma fanau. 

“Ou te fa’afetai a a’u ia i le Atua mo lenei taleni ua ou maua, ae le gata i lea o le malosi.”