Momoli le fa’afetai a Fanau-A’o’oga i ā Ausetalia

Tusia Fa’aliliu e Maiava ,

233 Hits

O fanau-a’oga, o Taupou-Sa, faia’oga ma matua o le A’oga Tulagalua a Sagato Iosefa i Le’auva’a, nisi o Samoa aupito fiafia i lenei vaiaso. 

E fa’afetaia ai le Fesoasoani a Ausetalia na ‘auala mai i a latou Polokalame Fesoasoani Tu’u-sa’o, ua mafai ai ona fa’atau e le A’oga, nofoa matagofie e 300, e tusa ma le $49,500.00 tala le tau atoa. 

Na saunoa le Tama’ita’i-Sa Pule o Lavalea Ielenimo, o le fesoasoani lea mai Ausetalia, ua matua fetaui lelei le taunu’u mai i lenei taimi. 

 “Ina ua mae’a le tatalaga aloa’ia o le falea’oga fou, sa matou mo’omia ai lava ni nofoa ma ni kesi, ma isi totoga mo’omia,” o lana fa’aaliga lea.

“Lea ua to’ai mai le fesoasoani a Ausetalia, e ala i nofoa e 300 mo le a’oga. E le taugofie nei nofoa mananaia toe ‘anagata e 300.

“Ua matou talia ma le agaga fa’afetai tele, le fesoasoani a Ausetalia ma e talitonu lava le fa’amoemoe, o ituaiga nofo ua matou maua, o ituaiga aupito lelei lea ma ‘anagata, ma ‘ou te iloa, e o’o atu i le sefulu ma le lima pe sili atu fo’i tausaga o le a fa’aaoga ai pea nei meaalofa taua ma aoga. 

 “’Ou te fia fa’aaogaina ai lenei avanoa, e momoli atu ai le fa’afetai tele i le Malo o ‘Ausetalia ma le Hai Komesina o Ausetalia, le Vaega ma le ‘Aufaigaluega, ona o le silasila mamao i mana’oga o afio’aga ma alalafaga ‘ese’ese i totonu o Samoa, e aofia ai ma lenei a’oga fa’atauva’a, le A’oga Tulagalua a Sagato Iosefo i Le’auva’a.

Ua nonofo lelei nei tamaiti-a’oga a Sagato Iosefo, ma fiafia i lo latou si’osi’omaga fa’aleA’oa’oga, talu ai lava le fesoasoani ua ma’au iai Ausetalia. Fa’afetai, Fa’afetai, Fa’afetai tele lava le Agalelei!”

© Samoa Observer 2016

Developed by Samoa Observer in Apia