Fa’amaoni ma le Alofa

Tusia Fa’aliliu e Maiava ,

149 Hits

Toe mafaufau tasi lava…E iai se taimi na e misia ai le pasi pe le-maua fo’i le va’alele na tu’u e malaga ai, ona ua fai si ou tuai teisi? E le’i mamao tele atu, na pu’e ai la’u va’alele ‘ou te fia alu i se fono taua lava e faia i le isi nofoaga, ma sa ‘ou vave alu ai i le malae-va’alele e fa’atali le taimi o le malaga.

Ua sau le vala’au, ae na matua fa’ate’ia a’u ona ‘ou te o’o atu i le faitotoa, ua loka ma ua ola fo’i afi o le va’alele! O a’u ua vevesi ma taumafai ai loa i le ‘Aufaigaluega a le kamupani va’alele, ina ia tatala le faitoto’a mo a’u. Leai se mea na ‘ou mafai, a ua matua naunau lava ia ‘ou malaga, ma i’u ai lava ina ou talosaga iai, ou te le mana’o e fai le mea amiotonu, ae tatalo atu ina ia alolofa mai.

E leai, e le’i amana’ia e le tama’ita’i lea o le kamupani-va’alele, si a’u ‘ai’oi.  Ua silafia lelei lagona o le fememea’i ma lagona fa’aletonu, pe a sese se mea ua e fai, ae maise lou iloa o a’afiaga e o’o iai. So’o se ekalesia lava –vagana Ekalesia Kerisiano, e iai lava tulafono po’o aga-masani, o feagaiga e ao i tagata ona taumafai e fa’atino, e maua ai le fa’amagaloga a o latou atua, ona o sese ma fa’aletonu sa latou fai.

O nisi ekalesia, e au lava i le fasiotiaga po’o le sauaina o isi tagata po’o latou lava fo’i, e tau totogi ai a latou agasaga ma sese sa fai.    Ae na fofola manino lava e Iesu Keriso, e matua leai leai lava se mea tatou te fai, ia tatou maua ai le fa’amagaloga a Le Atua, ona o mea sa tatou fai.

E o’o lava i a tatou tatalo, o tiute-fai ma ta’utinoga, e le taitai ona tau-lalata, e totogi ai a tatou agasala ma ‘aitalafu ia te Ia. Tatou te le mo’omia le faia o se fa’amasinoga tonu, ae tatou te mo’omia le alofa! Leai se tasi o tatou e ‘ausia le maualuga o le alofa ma le lelei atoatoa o Le Atua i mea uma tatou te mafaufau ma tautatala ai, atoa fo’i ma mea tatou te fa’atino. 

O le mafuaga tonu lena o le afio mai o Le Atua le Alo ma liutino tagata, ina ia fa’atino mo tatou. Fetalai Iesu, pau lava lea o lo tatou fa’amoemoe, o Lona Alofa aua ua mae’a ona ia totogi le sala mo a tatou agasala uma, e ala i le foa’ina o Lona Soifua mama mo ‘Oe ma a’u, i luga o le satauro.

Pau lava lea, o le tatou tatalo ma talitonu, o le a Ia ‘aumai Lana meaalofa foa’i-fua o le fa’amagaloga ma le soifua fou i le ola e fa’avavau. Ona toe amata ai lea ona tatou soifua, i Ona ‘auala lelei ma Lona Alofa na foafoa lava tatou te ola fiafia ai.

Ioe i lenei aso, tatalo loa ia Iesu mo Lana meaalofa foa’ifua o le fa’amagaloga ma le ola fou. Tatalo ia amata suia e Ia, ‘Oe ma lou olaga ina ia ola manuia ma fiafia i Ona ala na saunia ia e soifua ai. Toe mafaufau tasi lava… 

© Samoa Observer 2016

Developed by Samoa Observer in Apia