Tatui se alii talavou i se osofaiga mata’utia

By Ilia L. Likou 24 June 2016, 12:00AM

O se alii talavou mai Aele o loo taufao le mai ma le magalo mo lona soifua i le Falema’i Tele i Motootua. 

O lea tulaga e mafua mai se faalavelave lea o loo tuua’ia ai e faapea na osofa’ia o ia ma tatui i le tele o taimi. 

.O lea la faalavelave- na faamaonia e le uso o lona tamā, o Tautea Koyo, lea fai mai o le ua manu’a-o loo i se tulaga faigata.Na ia faaalia i le Samoa Observer e faapea na o ia ma se tasi o lo latou aiga i se faleoloa –ae osofa’ia ai loa o ia e le isi alii mai lo latou nuu. O le pogai o lea osofaiga e le o iloa. 

“Ma tatui lo’u tausoga mai tua,” o lana faaaliga lea. E lua ni manu’a loloto i lona ulu, sa faanatinati atu o ia i le falema’i –lea ua i ai o ia i se tulaga faigata i le asŏ.  “Ua matua tigaina o ia i le taimi nei ma ua matou le mautinoa pe o le a le mea o le a tupu-i nai aso o i luma.”

Na faamatala e Mr. Koyo le tatuiina o ia o se “mea taufaafefe” ma e “mata’utia” “O le tilotilo ia te ia ua matua lilofia i le toto i lea po ma o se vaaiga faigata,” o lana faaaliga lea.  “Ua matua faanoanoa ma mafatia lo matou aiga.

Matou te le toe manaomia se isi lava tagata ina ia pagatia mai sea tulaga.” Fai mai le uso o lona tama o loo suesueina e Leoleo lea mataupu. Ua matou matua le fiafia lava. Ae i lea lava taimi, e tatau ona matou faamagalo atu i le tagata na fai a lenei mea i lo matou tausoga.

Matou te talitonu foi o le a maua le amiotonu e tusa ai ma le taimi a le Atua. “Ua uma ona matou lipotia lenei mataupu i Leoleo ma ona pau la matou tatalo i le taimi nei e mo le ola o si o matou atalii.”Na fai le ta’otoga o lea alii talavou i le Aso To’ana’i “O le lipoti mai le falemai ua faailoa mai ai ia i matou e faapea o loo i ai o ia i se tulaga tigaina i le taimi nei…o loo pagatia o ia mai le leaga o lona mafaufau ma le tafetotoi i totonu.” Sa le mafai ona maua mai se faamatalaga aloa’ia mai Leoleo poo le falema’i ananafi.

By Ilia L. Likou 24 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>