Fa’atonu le saisai o se tasi sa i le Ami

Tusia Lanuola Tusani Tupufia ,

369 Hits

MO’OMIA E LE FA’AMASINOGA:  Le Ali’i o Mualia Salamo, ua fa’atonu le tu’uina atu iai o se tusi-saisai ona ua le o’o atu i le Fa’amasinoga

MO’OMIA E LE FA’AMASINOGA: Le Ali’i o Mualia Salamo, ua fa’atonu le tu’uina atu iai o se tusi-saisai ona ua le o’o atu i le Fa’amasinoga

Ua fa’atonuina nei e le Fa’amasino Sili, le Afioga a Pātū Tiāva’asu’e Falefatu Sapolu, le tu’uina atu o se tusi-saisai ia Mualia Salamo, o se tasi sa i le Ami a Amerika.

E le’i aliali atu Mualia i le Fa’amasinoga Maualuga ananafi, sa fuafua e su’esu’eina ai le mata’upu o lo’o molia ai.

I luma atu, sa ia te’ena ai moliaga e lima fa’asaga ia te ia, ona o le umia o Fua’ala’au Fa’asaina fa’apea le umia fa’asolitulafono o ‘aupega mata’utia e le fa’atagaina i le atunu’u.  

O lo’o molia le tama-tuai o le Ami a Amerika, ona o le ‘aumaia i totonu o le atunu’u, o fua’alau ma vaila’au fa’asaina fa’apea a’upega e le fa’atagaina, lea na maua i totonu o pusa-oloa na ‘auina mai fafo i le tausaga talu ai. 

Sa logo-fa’alilolilo e se tasi le vasega o leoleo, sa fa’aauau loa su’esu’ega ma taofia ai le pusa-oloa lea na maua iai le tele o itua’iga ‘aupega mata’utia fa’apea fuala’au fa’asaina  i totonu. 

I le masina o Aokuso talu ai, na tu-vaelua ai le Ofisa o le Loia Sili i se talosaga a Mualia, fa’apea e toe fia fo’i i Amerika mo ana siaki masani. Na fa’ailoa i le Fa’amasinoga e lana loia, o Leulua’iali’i Tasi Malifa, o Mualia e malaga lava i Amerika i tausaga uma mo ana fua’alau ma fa’atino ana siaki masani.

Sa ia ta’utino e toe fo’i lava i le taimi o lona fa’amasinoga.

© Samoa Observer 2016

Developed by Samoa Observer in Apia