Ua lu’iina e le sui mai Salega Sasa’e, Olo Fiti Va’ai le alii palemia, Tuilaepa Sailele Malielegaoi ina ia ave ia i le fa’amasinoga e fa’amaonia ai tu’uaiga sa faia e fa’asaga ia te ia e fa’apea o ia lea o O.L.P.

O lenei poloaiga sa faia e Olo ao faia ai taulumaga o le palemene  o Samoa i le Aso faraile o le vaiaso nei.

Sa teena e Olo ia tuuaiga, ma ia faailoa ai e le o ia lea o O.L.P, lea o loo faia le amio o le tuuaia o le Palemia i le tele o mataupu i luga o upega tafailagi e ala mai lea i le facebook.

O lenei mataupu sa tulai mai ao fai ai se fefinauaiga i le tulafono taufaaofi o le Tobacco Control Amendment Bill 2018.

Sa saunoa Tuilaepa i le mataupu e uiga i le saolotoga o le tagata e filifili ai i le lelei poo le leaga ina ua ia fa’aalia ai loa lea mataupu o le O.L.P.

Sa ia tu’uaia ai Leavopolo, o le isi lea suafa matai o Olo e faapea o ia lea o O Le Palemia.

“Outou uma lava ia e aofia ai ma Levaopolo, tuu nei loa.

“O lea ua ou faiatu ia te outou i le taimi nei, o lea ua matou iloa uma lava outou ia e faaleagaina le malo.

“Lea ua uma ona ou faatonuina le Loia Sili ma le Komesina o Leoleo e fai loa le latou gaioiga talafeagai i le itu lea.”

Sa faaui lavea atu Olo Fiti ma sa ia talosaga ai le Fofoga o le Fale, Toleafoa Faafisi mo se avanoa e fai ai sana saunoaga.

Ae sa o i sa taumafai ai le Fofoga o le Fale e taufaafilemu le mataupu.

Sa ia saunoa ai o le mataupu o loo talanoaina e le Alii Palemia o loo faasaga ia Leavopolo ae le o Olo Fiti.

Ae peitai sa mautinoa lelei e le ali faipule o ia lea e faatatau iai le saunoaga a le alii palemia, ona e le o se taimi muamua lea ua tuuaia ai lona igoa e Tuilaepa e faatatau i le “O Le Palemia.”

Ma o i sa faailoa ai e Olo lona agaga fiafia ona o le a oo ai le mataupu i le faamasinoga ma faamaonia ai nei tuuaiga uma.

“Faafetai o lea o le a ou oo atu i le faamasinoga ina ia mafai ai ona kilia le ea i le mataupu lenei.

“E le o se taimi muamua lenei ua tuuaia ai au.

“E pei e logo malie le tuuaiga, ae e le malie ona e le mama i lo’u itumalo nei tuuaiga ona e fai lava si matuia o nei tuuaiga.

“O le mea lea o le a ou faatali ai i le malo e ave au i le faamasinoga ma folasia uma ai nei tuuaiga.”

I le faatalatalanoaga a Olo ma le Samoa Observer sa ia faaalia ai lona le fiafia i tuuaiga a le alii palemia e faasaga ia te ia.

“E le manaia ia tuuaiga. 

“Tele lava mataupu ou te taulamua ai ae le faapea o au o O.L.P.

“Afai e iai se mataupu ou te fia talanoa ai ou te aumaia i luma o le palemene ae ou te le lafi mai i tua o se komipiuta.

“O le isi itu e mafai lava e soo se tasi ona talanoa ia O.L.P. i luga o le facebook ma o lea la ou te faatali ai i le malo e omai e ave au i le faamasinoga.”