O Solomona Tavita o se taule’ale’a ua fa’amanuiaina.

O lenei alii ua manumalo i le faalauiloa ale Digicel lea sa faatautaia mo le fusuaga tele a le alii ia Lupesoliai Laaulialemalietoa Joseph Parker lea o le a faia i le amataga o le masina o Aperila lea e faia i Cardiff, Wales.

Ae e le na’o ia o le a malaga, o laua ma lona tina o Senara Taulelei lea o le a oatu i lea atunuu e maimoa tuusao i le fusuaga.

O lenei taule’ale’a e 22 le matua o lona soifua ma o ia o le uii o le fanauga e toafa mai afioaga o Sinamoga ma Foaluga, Savaii.

Sa ia taua ua ia filifilia lona tina e la te o ona sa tausi lava ia e lona tina ma le isi itu e lelei lava lona tina e fai ma ana paaga e la te o faatasi.

Sa taua e le Pulesili a le Digicel, Farid Mohammed, lona fiafia tele i le alii o Tavita ma lona tina.

 “e matou te faalagolago lava i a matou paaga.

“E le na’o le sueina o le tupe mai a matou tagata faatau, o lea matou te iai iinei ma o le auga ma le faamoemoe a le Digicel o le ofaina atu lea o le matou auaunaga mo a matou tagata faatau uma lava.

 “O lea ua mafai ona faaaluina le $25 miliona i le toe faaleleia o le matou auaunaga. O lea ua matou koneti atu i le Tui Samoa Cable ma o le isi $25miliona faaopoopo lea ua matou tuuina atu.

 “O le tau o le pepa malaga e tasi mo lenei faamoemoe e $1,200 pauni, ma le totogi lea o le isi tagata faigaluega i Samoa mo le tausaga atoa, ma o le aofai lea o le tupe ua matou avatu i a matou paaga.

 “O le taimi lenei o matou matoue te toe auauna ai i matou tagata faatau ma faafiafiaina ai latou.

“O le matou faamoemoe lava lea o le matou toe auauna atu lea i a matou tagata faatau i soo se auaunaga lava ina ia faafiafiaina ai latou.”

Sa faaalia foi e Mohammed o loo faatupeina uma lava e le kamupani a le Digicel mea uma lava mo le valu aso lea e malaga ai Tanielu ma lona tina ma e oo atu i luga i le $30,000 le tinoitupe o le a faaaluina i lea faamoemoe e le aofia ai le $500 pauni lea e aveina e le Digicel mo laua nei aua ni mea e mananao ai.

O le ticket i le fusuaga sa faatupeina lava e le alo o le atunuu Joseph Parker, ma o le a tuua e laua nei le atunuu i le Aso 28 Mati.

 “O le lona fa lenei o avanoa ua mafai e le Digicel ona auaina atu nisi e maimoa i le fusuaga.

 “E leai se penefiti a le kamupani sa maua mai i lenei faalauiloa

 “Sa pikiina lava e le masini le ua manumalo  ma o lea sa faatautaia i luma o le alii malu o le malo.”

Sa ia taua foi o se fusuaga mataina lenei ua leva ona faatalitali ai tagata uma.

Sa ia faaalia foi le fiafia o le kamupani e auina atu nisi e maimoa i lenei fusuaga ona o laua foi ia o le a fai ma sui o tagata uma o le atunuu e tapuaia le faamoemoe o lea foi alo o le atunuu.

 “O ai lava o le a manumalo i lenei faamoemoe o le a avea ma siamupini o le lalolagi ma o le itu lea e taua tele ai lenei faamoemoe, ma o lea ua iai nei tagata e toalua ua manumalo i lenei faalauiloa tele e mafai ai ona laua maimoa i le fusuaga ma feiloai ai foi i le alo o le atunuu.

 “Ua fai si leva talu ona le iai se tagata tautaua faapea mai Samoa.”

O le na mauaina le TV 55” UHD Curved Smart TV  lea sa lagolagoina e le Samsung o le tama ia Faalavaau Moa Lapoa mai Siufaga Falelatai.

Sa ia taua i le Samoa Observer e ui lava e lei faamanuiaina ia e maimoa i le faamoemoe ae o le itu taua o lea ua iai lana TV e maimoa ai i le fusuaga a lea foi alo o le atunuu.