Mafatiaga o Simo i le leai o se suāvai

By Deidre Fanene 24 March 2018, 12:00AM

O le fa’atauanau a le aiga o Simo Leilua o le fia maua lea o se tane vai.

Sa fa’aalia e le tamā i le vaega o le Fofoga o Samoa le mafatiaga tele o lo’o feagai ma lona aiga i le leai lea o se suavai lelei e maua e latou.

O le taimi nei o lo’o fa’aaogaina e lea aiga se tane vai ua elea ma e leai se soifua maloloina e maua ai.

O lenei aiga e mai le afioaga o Tapatapao, ma e to’atolu lana fanau.

Sa ia ta’ua fo’i ua 15 tausaga talu ona latou nonofo i Tapatapao, ma galueaina le fa’ataoga ae e le’i ea lava le pologa.

Sa ta’ua e lea tamā 59, le matua o le soifua o le latou alagatupe e maua mai lea i le latou fa’atoaga ma o le mafuaaga foi lea e le mafai ai ona latou oese mai lea nofoaga.

 “O le manaoga tele lava o se tane vai lea mo matou.

“A tou vaavaai i le tane lea o loo iai i le taimi nei ua elea ma e leai se soifua maloloina e maua na’o le mama’i ai o tagata.

“E ui foi i le tulaga o loo iai le fale, ae o lea lava matou te nonofo lava iinei.

“Ua uma o sui pou o le fale, ae peitai o le tele lava o le vaega o le fale ua amata ona le toe aoga ona ua fai si leva talu ona matou nofoia.

 “O le upu moni lava ia e leai ni tupe e faatau mai ai se isi tane vai, ona o lea foi e iai tamaiti o loo aooga.

 “O le tele o taimi matou te ola lava mai mea ua matou maua mai i le faatoaga.

“E talitonu lava e iai le taimi e fai ai le fale, ae peitai e le o le taimi nei e leo mamafa tele iai le mafaufau.

“E pei lava o se tane vai lava lea e mamafai iai le mafaufau ona o vai e fa’aaogaina mo aso uma aemaise o lea e fa’aaoga e feinu ai ma fai ai meaai.

“O le tane vai lea e iai i le taimi nei e fa’aaoga e ta’eele ai ma fai ai tagamea ae o se upu e fa’aaoga e feinu ai ma fai ai meaai e leai se sefe o iai.

“O vai la lea e fa’aaoga e feinu ai matou te o i le fale o nai isi tagata o le nuu e la’u mai ai le vai e fa’aaoga e fai ai meaai ma feinu ai.”

Sa ta’ua e Leilua e nonofo i Tapatapao i aso o le vaiaso ae o i le isi latou fale i le fa’aiuga o le vaiaso ona e le mafai ona tu’ufua le latou fa’atoaga.

 “O le itu taua lava o le nonofo ai iinei o le leai lea o se tupe e fa’aaluina i le faatauina mai meamata ona o lea e maua iinei.

 “O lea lava ou te finau ou te galue i la’u fa’atoaga ona e leai ai ni au tupe e fa’aalu i le totogiina o lafoga.

“O tupe uma lava e maua mai o tupe mama lava e maua mai i lo’u galue fa’amaoni ma le finau.

 “O le tupe maua lava o le vaiaso e $200 ma e fesoasoani tele lea mo le aiga, aemaise lava i le tausiga o le fanau ma fai ai a latou aoga.”

Sa fa’amatala foi e Leilua o lana galuega o le palama ma o lana ia maitau e telē se tupe e faaaluina i lafoga, aemaise lava o le vaitau lenei i le taugata ai o le soifuaga.

“A le vili mai lava tagata ia te au I latou galuega, ia e nao le ulumatua lava a lenei aiga e faamoemoe iai, ma e galue i le faletalimalo o le Sheraton.

“Ua faigata lava lenei vaitau ona o le tele o kamupani lea ua iai e omai lava ma aumai latou tagata palama o le mafuaaga lena e tau leai ai nisi e vili mai, ma ua le tele ai ni galuega i lenei vaitau.

“Ae o lesi lea faafitauli tele ona o le tau o oloa ua alu i luga a’o totogi o tagata e le alu i luga o loo tumau ai pea i lalo.”

A fia fesoasoani ia Leilua faafesootai le numera 7791172.

By Deidre Fanene 24 March 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>