Falepuipui se tina ona o le taufa’avalea

By Deidre Fanene 24 March 2018, 12:00AM

Ua falepuipui nei se tina mo tausaga e lua ma masina e tolu.

O le tamaitai ia Alakoni Pinetuaoi Sio Tevaga, o Samalaeulu, Vaitele Tai ma Sa’anapu, sa tuuaia i lona faia faavaleaina lea o se ulugalii mai Fagamalo lea na gau ai se tinoitupe a lenei e ulugalii e tusa ma le $20,000.

 Sa fa’aamaonia le tu’uaiga ma e lua ni moliaga o le mauaina e ala i auala taufaasese sa molia ai lenei tamaitia.

O le fa’aiuga sa tauala mai i le alii faamasino o le faamasinoga maualuga ia Leiataualesa Daryl Clark.

O le loia ia Fuifui Ioane sa tulai mao le itu a leoleo a’o le alii ia Arthur Lesa sa tulai mao Alakoni.

Sa taua e Leiataualesa o le solitulafono sa faia e leni tamaitai e aofia ai se tinoitupe telē lava, o le fuafuaina lelei o lenei solitulafono ma o lenei foi solitulafono sa faatinoina a’o iai lenei tatala ai lenei tamaitai i tua ona oni tuuaiga tai tutusa lava ma lea mataupu.

Sa ia taua foi o lenei solitulafono o le faasalaga maualuga lava e 7 tausaga e ono falepuipui ai ma e i lalo o le faamasinoga faaitumalo.

E tusa ai ma faamaumauga ale itu a leoleo, sa fesootai e le o loo tagi Alakoni i le taumafaiga lea lona visa faapea ai ma lona toalua mo Ausetalia.

“I le aso 16 Setema, 2016, sa e aumai ai se tinoitupe e $675 mai le o loo tagi e faagaioi ai lona tusifolau, $150 mo le tautinoga faaletulafono ma le $5,800  mo laua pasese.

“O le aofaiga atoa o le tinoitupe e $6,625.

“O le aso 23 Setema, 2016, sa fesootai ai e le komesina a Ausetalia le o loo tagi i se imeli, ma faailoa iai ua teena le laua talosaga.

 “E te lei faailoa lava i le ua tagi ni faamaumauga mo lona tusifolau poo se tautinoga faatulafono, ae ua nao se risiti ua maea ona tusilima ina o loo iai se aofaiga e $5,800 mo laua pepa malaga.

“E leai foi se faamaoniaga o pepa malaga sa e aveina i le ua tagi.

“Ae peitai sa e faailoa i le ua tagi e toe fai seisi talosaga fou mo laua visa.

“Sa e taua foi e iai lau faauo o Carolyn o loo galue i le ofisa o Ausetalia e mafai ona faia mai laua visa.

“O lea sa faia ai e le ua tagi nei mea uma ma faagaioi ai loa le pepa talosaga lona lua mo laua visa ma sae faailoa ai e ave i totonu i le Aso 28 Setema, 2016.

“I le aso 17 Oketopa 2016, sa e toe uuina ai se tinoitupe e $14,000 mai le o loo tagi e aofia ai peimeni uma lava mo le faagaioiga o laua pepa talosaga mo le visa lona lua.

“Sa taumafai le o loo tagi e fesootai lau susuga i le tala mai i laua pepa malaga, ma o iina sa e faia ai loa se imeli sese i lalo o le ioga lea o Carolyn ina ia talitonu ai le o loo tagi ua mae’a ona faatautaia o laua pepa malaga.

“Ua uma ona avatu le faatagana a le o loo tagi ina ia e faagaioia ai laua pepa malaga, ma sa faatali lava le o loo tagi ma lona aiga i se tali mai.

“Ae peitai sa mauaina e le o loo tagi ua e pelogia laua e uiga i laua pepa malaga ma le laua talosaga ma o le tagata lea o Carolyn e leai ma sona malamalamaga i lea mataupu poo lau susuga foi.

“O le tauaofai o le tupe atoa sa mafai ona e maua mai e ala ini auala taufaasese mai le o loo tagi e $20, 625, ma e leai ma se mea sa faagaioia i lenei seleni.

“Pau le tulaga sa mautinoa e le o loo tagi o le totogiina lea o laua pasese e $1,405 ma o le isi $19,220 e leo mailoa poo fea ua oo iai.”

O le o loo tagi o se tane mai Rosemount, Ausetalia ma o ia o se Pule i le faletalimalo o le Savaii Lagoon Resort.

Sa taua e le o loo tagi e ala i lana ripoti tusitusia sa fai, le tele o le aafiaga o le solitulafono ua aafia ai ia ma lona aiga.

“Sa ia taua o le tinoitupe sa e aveina o se vaega o lana tupe faaagaaga ma sa teuina I le faletupe.

“E le gata i lea o le tele o feuiaiga sa fai ona o le mataupu sa faatuatuaina ai oe.

“Sa tele se aafiaga faalemafaufau sa aafia ai ona o lau gaioiga sa fai.

“Pau le itu lelei sa maua mai o lou totogiina lea o lona pasese e $1,405 e malaga atu ai i Ausetalia ma sa faia ma le mautinoa ina ia aua nei toe foi mai i Samoa.

“E leai se faatoesega sa e faia i le na aafia.”

I le faitauina ai o itu e ogaoga ai le solitulafono sa taua ai e Leiataualesa le tele o le tinoitupe sa aafia i lenei soligatulafono.

“Sa e fuafuaina lelei lava au gaioiga sa fai.

“O lau solitulafono ua fai si umi o fai ma sa e faatinoina lenei solitulafono ao tatala ai oe i tua e tusa ai ma nisi foi tuuaiga tai tutusa lava lea sa tuuina atu ai e le faamasinoga le avanoa e te le falepuipui ai.

“Sa e faailoa foi i lau loia ma e faamaoinia ai sa e pepelo i le o loo tagi e uiga I pepa malaga mo laua ma lona aiga.

“Sa e faia foi ni faamaumauga sese e uiga ia Carolyn ma ni imeli sa e faia e faatalitonuina ai le o loo tagi ua uma ona faagaioi o laua pepa malaga.

“E fai lava si eseesega o lau gaioiga ma lau tautinoga lea sa fai ina ua e faatoese mai i le faamasinoga ma e taumafai ai e tuuaia le o loo tagi i lenei mataupu.

“O lou le faamaoni sa e pepelo ai i le o loo tagi, e uiga I laua pepa malaga ma lou faia lea o se imeli sese ina ia talitonu ai ua maea ona faagaioi o laua visa.

 “Sa e tuuaia le o loo tagi, ma e taumafai ai e faatalitonuina le faamasinoga o oe o se Samaria Agalelei.”

Sa ta’ua e Leiataualesa ua tapā ele itu a leoleo se faasalaga faafalepuipui e amata atu I le tolu tausaga ona toe faaopoopo lea iai ma le ono masina ona o ona moliaga muamua i le mataupu lava faapenei.

Sa ia faailoa foi e alagatatau le faasalaga faafalepuipui ona o le matautia o le solitulafono ma ia ave ai se lapataiga mo e o loo taumafai e fai lenei solitulafono.

Sa faamaonia le solitualfono ma o le faaiuga a le faamasinoga e lua tausaga ma masina e tolu e nofo falepuipui ai.

By Deidre Fanene 24 March 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>