Fia maua se galuega
E pei ona ta’ua o le aoga o le ki lea mo se olaga manuia.
Ma o le taule’ale’a ia Jeremiah Leo mai le afioaga o Falelauniu, sa ia fa’aalia le taua tele o le olaga a’oa’oina.
Ae peita’i o le le manuia ai o ana taumafaiga i le olaga a’oa’oina o le mafua’aga lea o le fetaia’i ai o lenei taule’ale’a ma fa’afitauli o le olaga.
Sa mae’a le olaga a’oa’oina o lenei taule’ale’a i le tausaga 2017 ma o le itu e fa’anoanoa ai ona e le’i ogatasi le futia ma le umele e pei o la ea alagaupu fa’asamoa.
I le fa’atalatalaoaga ma le vaega o le Fofoga o Samoa, sa fa’aalia ai e Jeremiah lona naunautaiga i le fia maua lea o sana galuega e tausi ai lona aiga.
O ia o le ui’i o le fanauga e to’atolu ma o lana matafaioi o le tausia lea o ona tua’a matutua (grandparents).
“Mana’omia lava se galuega ina ia mafai ai ona ou fesoasoani i lo’u aiga,” o le tala lea a Jeremiah i le Fofoga o Samoa.
“E leai nisi e to’atele o le matou aiga e faigaluega, mao lea ua ou tofo i le olaga ma e fai lava si faigata.
“E le faigofie fo’i le va’ava’ai atu i si o’u tamā i le galue malosi auā le tausiga o le aiga atoa.”
Sa ta’ua fo’i e Jeremiah o lona uso matua e na o le pau lea o le tagata e faigaluega i le latou aiga, ae peita’i o lo’o iai fo’i le aiga o lona uso matua o lo’o ia tausia.
Sa ta’ua e Jeremiah, o lana fesoasoani i lona uso matua o le alu lea e galue i le latou fa’atoaga, ae peita’i ua fa’aleaga uma e le afā o Gita.
“So’o se galuega lava ou te mauaina i le taimi nei e talia ma le fa’afetai, ona e tatau lava ona iai se vaega e amata atu ai.
“Ua fai lava si faigata ma taugata o le olaga lea ua iai.
“Sa iai la’u galuega muamua o le kiligiina lea o le fale, ae peita’i ua ou le toe faigaluega ona e iai taimi e leai ai ni galuega ona ou nofo lea i le fale.
“Pe fa’alua na fai kiligi i le vaiaso.”
Sa fa’ailoa mai fo’i e lenei taule’ale’a le tele o ana miti ua le mafai ona fa’ataunu’uina.
“O lea la ua ou galue i le matou fanua, ae peita’i e le faigofie.
“Maimau pe ana toe fa’afo’i i tua le taimi semanū e toe fa’asa’osa’o ai mea sese sa ou faia.
“O na measese uma e toe fo’i uma lava i tua i taimi a’o o’u aoga.
“Sa ou leiloa o le a faigata fa’apea le olaga, sa ou le ago lava i a’u meaaoga ana ou iloaina semanu ou te finau lava.
“Ana lelei a’u taumafaiga semanū fa’apenei o lo’o o’u i luga i le Iunivesite, ma o le a tele ai ni faitoto’a e matala mo a’u, ma amata ai se olaga manuia mo a’u ma ou tausi ai lo’u aiga e aunoa ma ni fa’afitauli.
“O le taimi nei pau le galuega o lo’o o’u galue ai o le fa’atoaga.
“Ma ou te talitonu fo’i o manuia e mai so’o se mea lava pe a fa’apea e galue ma le fa’amaoni.
“E leai se mea e maua ma se filemu i lenei olaga, ma e ao lava ona tatou galulue ma le fa’amaoni ina ia tatou manuia ai.
“Pau le mea mautinoa a le Seanoa ma le tatalo e leai ni manuia e mafai ona oo mai.”
Afai e te fia fesoasoani ia Jeremiah fa’afeso’ota’i le numera o le telefoni 7780661.