SAUNI PARKER MO LE FUSU’AGA TELE E 1.8 miliona tala

Tusia Patrick McKendry - The NZ Herald ma Maiava ,

265 Hits

ALO I OU FAIVA-MANAIA: Lupesoli’ai La’auli Joseph Parker.

ALO I OU FAIVA-MANAIA: Lupesoli’ai La’auli Joseph Parker.

O lo’o fa’atalanoaina nei e le Vaega a Joseph Parker se fuafuaga, e ono avea ai le fusu’aga lea a le Siamupini Niu Sila mai Samoa, e sa’ilia ai se tasi e mua’i fusu i le fusi o le lalolagi, lea o le a faia i Aukilani ia Me, o ono fa’atuina ai se matati’a o se fusu’aga aupito taugata i totonu o Niu Sila.

E mautinoa lava, o le tupe atoa o le fusu’aga lea a Parker ma le tama-Cameroon e fa’amautu i Farani, o Carlos Takam, e sili atu i le miliona tala ($1miliona tala), ma o le a fa’aleaogaina ai le matati’a o iai nei, na fa’atuina i le fusu’aga na fa’aigoa “O le Fusu’aga o le Seneturi” i le va o David Tua ma Shane Cameron i le 2009, na tofu ai i la’ua uma, ma le ta’i-‘afa-miliona tala. 

Na va’ai-tino le Nusipepa o le NZ Herald i se tusi-fa’aImeli a le Fa’alapotopotoga o Fusu’aga Fa’ava-o-malo (IBF) ma vaega uma o lo’o latou galulue fa’atasi, o lo’o fa’apea ai, ua malilie fa’atasi le Vaega e Va’aia Fusu’aga a Parker ma Faufaufau a Takam mo le fusu’aga e fa’ataunu’uina i le Aso 21 o Me ma ua fa’ata’atia ‘ese ai nei nisi talanoaga e fuafua ai le tulaga tau-seleni, ona o lea ua tau-fai malilie uma iai itu e lua.    

Na fa’aalia e David Higgins o le Duco Events, o lo’o fa’afoeina fusu’aga a Joseph Parker, e le o mana’o e talanoa mai e uiga i le tusi-Imeli lea a le IBF ma fa’apea ai, “o lo’o ma’ale’ale lava le mata’upu ma feutaga’iga mo le fusu’aga i le taimi nei”, peita’i na ia fa’amaonia, e taunu’u lava le fusu’aga i Aukilani ma o se fusu’aga e mautinoa, le matua taugata lava mo le latou fa’alapotopotoga. 

 “E leai ni konekarate ma ni pepa ua sainia i le taimi nei e ui ua iai nisi vaega ua malilie fa’atasi iai,” o lana fa’aaliga lea.

“Ae matou te iloa, o le fusu’aga lea o se matua ‘ato a ma le fa’afafa le seleni e mo’omia. Ua matou malilie iai i le numera lea, e sili atu i le miliona tala, mo na o totogi o tama-fusu uma ma o le a avea ai o se seleni aupito tele lea mo se fusu’aga i totonu o Niu Sila, e sili atu nai lo le fusu’aga a David Tua ma Shane Cameron i le 2009, na avea ai ma matati’a.” 

O le fusu’aga lena a Tua ma Cameron i Mystery Creek i Hamilton – lea na malo ai Tua i le tu’ioti i le ta’amilosaga lua, o lo’o matati’a fo’i i le aupito to’atele o tagata-matamata i TV-totogi i totonu o Niu Sila. A ona o le fusu’aga lea a Parker ma Takam o se tasi o fusu’aga iloga, o le tagata e manumalo, o le a fusu ma se tasi o Charles Martin ma Anthony Joshua mo le fusi o le paga-mamafa i le lalolagi, le IBF. O le matati’a la lea e iai nei, e ono talepe i lalo ma fa’aleaogaina ai. 

A’o aga’iga’i pea i luma le lelei o Parker – lea o lo’o fa’amautu nei i Las Vegas - ma aloa’ia lelei ana taumafaiga i Amerika ma Peretania i le 12 masina ua mavae, o le a avea ai lana fusu’aga lea ma Takam, o se tasi o le a tuli-‘aupuina e tagata-matamata o le lalolagi atoa. 

O talotaloga lava a le Vaega a le Duco Events, ina ia manumalo le tama-logologoa Peretania o Joshua i le la fetauiga ma le Amerika o Martin i le Aso 19 o Aperila i Lonetona, ae oti Takam ia Parker, ona saofaga ai lea o se fusu’aga i le va o le to’alua aupito alualu o le paga-mamafa i le lalolagi. 

E na o le 90 lava sekone na fa’atauina ai pepa-ulufale ae mae’a, mo le fusuaga a Joshua ma Martin i le fale o le O2 Arena i Lonetona, e 20 afe tagata e ofi ai.

E mautinoa lava, o le a matua le-fiafia le anoano o tagata i Karaiesetete ma Invercargill e lagolagoina Parker, ona o le tala fa’apea, o le fusu’aga lea a Parker ma Takam o le a faia i se nofoaga e le’i fa’amautuina i ‘Aukilani. Peita’i ua tonu i le Vaega a le Duco Events, e tatau ona faia lea fusu’aga tele i le nofoaga ua fa’a’upuina e Higgins, “o le maketi aupito tele”. 

O Joseph Parker, ua 24 tausaga o lona soifua, ua 18 ana fusu’aga fa’aPorofesa, ma ua ta’ua mai, ua o’o nei i se tulaga maualuga ana tapenapenaga talu lana asiasiga pu’upu’u atu i Niu Sila ia Ianuari, ina ua mae’a lana fusu’aga na fa’amoe ai Jason Bergman i Samoa.

© Samoa Observer 2016

Developed by Samoa Observer in Apia