Masaga e ‘ese’ese tamā

Tusia Maiava ,

13723 Hits

E LE ILOA LAVA E NAI TAMAITI: Ua fitu ai masaga fa’apea i le lalolagi, e tina fa’atasi, ae ‘ese’ese tama.

E LE ILOA LAVA E NAI TAMAITI: Ua fitu ai masaga fa’apea i le lalolagi, e tina fa’atasi, ae ‘ese’ese tama.

Na fananau uma i le aso e tasi, mai le tina e tasi peita’i ina ua taumafai e sa’ili lo la tama, na fa’atoa iloa ai se mea mata’utia e seasea ona tula’i mai, lea e iai le masaga lea mai Vietnam.

O le masaga lea, e ‘ese’ese o la matua, o le uiga o lea mea, e ‘ese’ese o la tama. E seasea tupu lea tulaga, ae na ta’ua, o le ulua’i taimi lea ua alia’i mai ai i totonu o Vietnam ma, e na o le fitu ai lea o masaga e ‘ese’ese tama ua ripotia i le lalolagi atoa, talu mai le 2011.  

Na fa’ailoa mai e Porofesa Le Dinh Luong, le peresetene o le Fa’alapotopotoga a Fomai Fa’apitoa i Vietnam e fa’apea, o su’esu’ega fa’apitoa sa faia i lona fale-su’esu’e i Hano, na fa’amaonia ai, e ‘ese’ese tama o le masaga lea, ui e le-tele ni fa’amatalaga na tu’uina atu i tusitala ma vaega fa’asalalau, aua lava le puipuia o aia ma ‘oa teu-lililo a lea aiga. 

Na ripotia e se nusipepa a Vietnam e matala i upega-tafa’iLagi, sa faia se su’esu’ega fa’apitoa (DNA) o le tama ina ua amata ona tu’ufesili lona aiga, pe aisea e ‘ese’ese ai foliga o lana masaga.  

O le masaga lea (ua ta’ilua nei o la tausaga), e tutusa – o le ‘au-po’a uma, o le isi e migimigi-mafiafia lona lauulu a’o leisi e vaivai ma sasa’o lona lauulu. 

Ina ia le-masalomia ai le ono tupu o se feseseta’i o pepe a’o i le falema’i, na fa’atinoina ai se su’esu’ega fa’apitoa (DNA) a le tino o le masaga, lea na fa’amaonia ai loa, o ia lava le tina moni o tamaiti uma e to’alua. 

Na fa’aalia fo’i i vaega fa’asalalau e le Peresetene o le Kolisi Fa’afoma’i Fa’apitoa a Ausetalia ma Niu Sila, le Porofesa o Michael Permezel e fa’apea, e moni e seasea maua ni masaga e ‘ese’ese tama, ae sa ia va’aia nisi o masaga fa’apea i Ausetalia. 

E mafai ona maua se masaga e ‘ese’ese tama, pe a fa’apea na feusua’i le tina ma ni tamaloloa ‘ese’ese se to’alua, i totonu o le tasi i le fitu aso o le periota foafoa-ola o le tina, o le fa’aaliga lea a le ali’i Porofesa. 

“’Ai na fofoa ni fatu-ola se lua o le tina lea i le masina lea e tasi. O le tasi na pipi’i atu iai sua-ola o le isi tamaloa a’o le isi na fa’apipi’i atu iai le isi fo’i tamaloa. O sua-ola o tamaloloa e mafai ona olaola pea e o’o atu i le lima aso, ma ona fa’apipi’i fa’atasi atu iai, i aso ‘ese’ese,”o lana fa’aaliga lea.

© Samoa Observer 2016

Developed by Samoa Observer in Apia