O LA’U TALA FO’I

143 Hits

1. Matauina i Tala Fou fai mai ua tali atu le Malo e ala i le faailoa atu o ana fuafuaga.

O le uiga la o lea mea e tusa ai ma le Manifeso a le HRPP-fai mai e le o folafola maia e le HRPP le siitia o ni tupe maua poo le penisione e totogi atu- talu ai le faiga-palota-ma e le o se mea talafeagai lea ona aofia ai i totonu o le Manifeso.

E le mafai ona tatou ola faalagolago i tagata o tatou aiga o loo nonofo i fafo ma tatou paaga tau le atiina a’e. Fai mai e $400 miliona o le a toe faaleleia ai le malae vaalele faava-o-malo  ma ona totoga uma e tatau ona i ai.

Fai mai o le ata o le tele o ia galuega tau le atiina a’e na faaalia i totonu o se Manifeso e 19 itulau a le HRPP. O le matau la i lea Manifeso-e mafuli lava i viiga o le faigamalo ma le tele o galuega tetele na ia faia.

Afai la o lea ua savalia le 40 tausaga o pulea e le HRPP le atunuu-o lona uiga –ua tatau ma talafeagai ai ona tele galuega lelei e tatau ona latou faia mo le atunuu. Afai la e na o mea lelei lava ia e tolaulau mai-o lona uiga e le o atoatoa ma lelei lea Manifeso. E mafua ona sa tatau i le Malo ona faailoa mai ma ni mea faaletonu na tulai mai lea taimi umi na pulea ai e le HRPP le atunuu.

Afai la ua aumai na o mea lelei-aisea ua le aumai ai ma le anoano o lape ma mea faaletonu na fai e le faigamalo a le HRPP e pei o ana faiga pi’opi’o ia na lipotia ma faamaonia e le Pule ma Su’etusi Sili toe faamaonia atili e le Komiti a Alii Ofisa o le Palemene-lea e faitau miliona ma miliona tupe a le atunuu na maumau ai! Sa tatau foi ona faailoa i totonu o lea Manifeso taupulepulega leaga a tagata faigaluega o le Malo!

O le uiga la o se faamatala-sa tatau ona aumai uma mea lelei ma mea leaga-aua e leai lava se tagata o i Samoa nei ma nuu e mamao-e le o malamalama i ia faiga pi’opi’o mata’utia a le Malo- ae o lea lava e taofiofi e le o mafai ona tuuina atu i le Faamasinoga e fai i ai le amiotonu! O le a faapefea la ona sa’o le faiga o palota a le atunuu pe afai e aumai isi mea ae tuu i tua isi mea? O le a sou taofi? 

2. Matauina i Tala Fou le faagasologa o faamasinoga i le va o sui faatutu o itumalo-ma o ia faamasinoga-e aliali mai –e mafuli lava i le Tautua! O lona uiga-fai mai le isi sui faatu e le’i tautua le isi sui faatu!

O le tulaga la ua le malamalama ai-o le fea ituaiga o tautua lea ua mafua ai nei faamasinoga ona o le faiga-palota? Afai la o le upu “tautua” o le upu Samoa-ma e na o Samoa foi e faatino ai-o le fesili- o le a la le ituaiga o tautua lea ua fai ma ala e faalavelave ai fua le isi sui faatu i le aia tatau a le isi sui faatu mo le faiga-palota? O le uiga o le fesili-o le fea tonu lava le ituaiga o tautua lea e finau ai nei ma ua avea ma ala e faalavelave ai le tasi sui faatu i le aia tatau a le isi sui faatu? O le fesili la-o le a le ituaiga o Tautua lea o loo faatauaina e le Faamasinoga mo nei mataupu?

I le aganuu ma le faa-Samoa-e lua ituaiga o tautua e faatauaina- (1) o le TAUTUA TUᾹVAE -o lona uiga –o le laulau o le sua a le matai ona nofo mai lea i tua ma le apa fafano. (2) O le TAUTUA MATAVELA-o lona uiga –e le o nofo tonu i le aiga-ae tautua mamao mai i soo se faalavelave o le aiga e fai!  O le fea la o tautua ua faaalia i luga e faasino tonu i ai nei Tagi o loo fai nei e faasaga i le isi sui faatu?

O le a le pogai o le a aumai fua o le aganuu e fai ma faalavelave i le aia tatau a le isi tagata Samoa e tauva ai mo le faiga-palota? O se mea tatau la lea mea? A faapefea la le toatele ua matai nei ae na te le’i asuina se vai o le matai o le aiga? O le a sou taofi? 

3. Matauina pea le faatupula’ia o tagata o loo feoa’i solo i le Taulaga i aso uma e saili manuia e ala i ni faiga tau faasese ma le pi’opi’o!

O le matau la ia i latou nei-o tagata mai tuā poo Savaii foi-ua le fia nonofo i aiga moni ona o le mumusu e o gagau le vao ma fai ni faatoaga- ae ua sosola mai i Apia nei-ma ua le gata ina faatiga-ulu i o latou aiga i Apia nei-ae ua feoa’i solo e saili isi tagata masani e saili ai se tupe e ola ai-aua ua manaia lava le ta’ata’a i Apia nei-ae le o mafaufau pe faapefea pe a oti o taataa solo!

A uma ona nofo i le tasi aiga-ua alu i le isi ona aiga –ona faasolosolo ai lava lea faapena-ona o le musu e nofo i le aiga moni ma faaaoga tatau le malosi e saili ai se lumana’i manuia!

O le fesili la-afai ua matua faatupula’ia lenei ituaiga o tagata i totonu o le Taulaga-e ai le aso e ta’uvalea ai foi le igoa o Samoa i le lalolagi atoa-pe a aisi atu i le Turisi ae leai se mea e maua mai ai! Faamata e le o le taimi lenei e tatau ai i le faigamalo ona silasila i se faiga e mafai ai ona faasa nei ituaiga o tagata aisi i totonu o le Taulaga! Masalo o se tasi lenei o mataupu sa tatau ona ta’ua i totonu o Manifeso a Vaega Faa-Upufai ia ua faalauiloa nei!  O le a sou taofi?

 

© Samoa Observer 2016

Developed by Samoa Observer in Apia