Molimau e faatatau ia Rev. Siaosi Selesele

954 Hits

Tui Atua Tupua Tamasese Efi 

Malumalu Ekalesia Metotisi,Vaimoso, 

21 Ianuari 2016

 

O le Susuga a Siaosi Selesele ma Luatasi, na taualuga le la galuega faa-faife’au i Tua’efu.  Ma o le mafuaaga lea na valaaulia ai a’u e fai sa’u molimau.

Ma ou te fiafia e fai sa’u molimau aua e tele la’u a’oga na maua mai i le ma mafutaga ma Siaosi.

O Siaosi o se taulasea.  E atamai tele e fai vailaau mo gasegase o tagata.  Ma e mālie lava lana talanoa i laau ‘ese’ese e fai ai  ana vailaau.  Ma e mata’ina lona tomai e totō laau e fai ai ana vai, atoa ai ma laau e maua mai ai manogi.  E ma’eu fo’i lona silafia o le faiga o samilolo ma faaōtaga o fa’i, ua seāseā vaaia i nei onapo.

E tāua manogi aua e fai ai pale, ‘ula, sei, lolo.  Ae o se tasi o mea tāua, ona ua ma sa’ili le Atua i le ma su’esu’ega manogi.  Fai mai Siaosi i le isi aso, pagā lea ua mou atu le tu ma le aga a Samoa e sufi ai le palolo.

E matuā sauni faalelei ia manogi e fai ai pale, titi ma sei ma ‘ula ma fatu ona ‘ave lea togi i le mea e a’e mai ai le palolo, ma ‘alaga le sula: “Fanau mai! Fanau mai!”.  O se mea mata’ina, o le aga’i mai o palolo ua faapepepepe i mea ia e i ai manogi.

O le fesili, e māfua iseā nei mea?  

Pei lava ona ou faamatalaina i la’u lauga o le Kerisimasi, o le masina e faailoilo mai le vaitau e a’e ai le palolo.

O le fesili:  O ai na faailoilo i o tatou matua, e ta’u mai e le masina le vaitau o le palolo?  Omai nei saienisi ua fai su’esu’ega ma faamaonia,  o se tasi o fe’au tāua o le a’e o le palolo, o loo tuu fua. 

O le fesili, o ai na faailoilo i o tatou matua le fanau mai o le palolo pei ona fai mai le sula: “Fanau mai! Fanau mai!”

O le tali: O lē na faia le masina, o lē na faia le palolo ma lē na faia le tagata.  O se tasi lea o molimau sa talanoa mai le Atua i o tatou mātua ae le’i taunuu mai le Tala Lelei.  Ae o le Tala Lelei o le fe’au ua toe fuata’i ma toe faafouina.

Ae o le mea tāua, a tatou sagolegole i le loloto o la tatou tu ma le aga, i le faailoilo ma le sufiga o le palolo, tatou te maua mai ai i totonu o na mea, le loloto ma le ‘anoa o le momoliga o le fe’au a le Atua.  Ma o se tasi lea o mau e matuā fesoasoani e faalauteleina le to’atūgā lea e feagai nei ma le lalolagi, po o le mea lea e ta’ua nei o le climate change. 

O nisi mea sa a’oa’oina e Siaosi i le tupulaga a le ‘aulotu, o le faiga o le samilolo ma le faaōtaga ma le sofesofe, le tāufolo, ma le totōga o maumaga ina ‘aua ai ne’i ola fālōlō.  E tāua, e lē gata e maua ai le a’oga i le faa’ele’eleaga ma le gasesega ae e te maua ai fo’i le a’oga i le gagana.  E faapefea ona e malamalama i le uiga o le upu ‘faaōtaga pala’ pe afai e te le’i faia se faaōtaga? E faapefea ona e malamalama i le uiga o upu po o le fetuu, “o le a e soona tautala lava e te le’i fifi se tāufolo” pe afai e te le’i fifi se tāufolo? A e tau i le upu ‘samilolo’ i solo a o tatou mātua, faapefea ona e iloa le uiga pe afai e te le’i faia?

Tele laau na totō e Siaosi i Tua’efu.  O le tele o laau ua pepē ae o loo i ai pea nai isi laau manogi o loo ola pea e fai ma faamanatu o lana nofoaiga.

O Siaosi ma Luatasi o ni tagata to’aga i le galuega ma e aga fiafia, e tosina mai ai le ‘aulotu ma le fanau.

Na tuua le galuega ona ua gasegase le faife’au.  

I lenei taimi, e mafai ona ou faamatalaina le tele o mea sa asiasi i ai le ma talanoaga.  Ae pei lava ona fai mai le upu, ‘oto mai na o le mui’a’a, tau mai na o le pua e ‘ulā.  Ua lava la’u lauga o le Kerisimasi i le palolo e molimauina la’u faalumaga tāua na maua mai i le ma mafutaga ma Siaosi.

Ta’ua a le ‘alaga a le ‘au tapua’i, “Aku  ē! Ua mālō tautai!”

Soifua.

© Samoa Observer 2016

Developed by Samoa Observer in Apia