LAUGA - “ina ia outou iloa le ala tou te ui ai”

600 Hits

 [Iosua 03”04]


Petaia Setu


O ala o le Atua e mautinoa. A o le faamoemoe mo le nuu, ia latou iloa. Auā e lē ō faalēatoa poo le ō taumatemate, a ia ō malamalama. O le faatonuga, mulimuli i le atolaau. Ia fai se va ma le atolaau pe ā ma le afe iata. ‘Aua tou te faalatalata atu iai, ina ia outou iloa le ala tou te ui ai.’ 

 O le atolaau, o le ta’iala lea. O le faailoga o le auai o le  Atua. Le Atua e ona le pule ma le mana uma lava, ua vaavaai ma faalogo iai le nuu, i le tele o faailoga tetele ma vavega ua faia i lenei malaga umi. Aemaise foi o lenei vavega ofoofogia, i le vaeluaina o le vai o Ioritana, ua avanoa ai le ala e savavali ai le nuu i le isi itu. O āiaīga, ia faaitiiiti atu i tua (2 afe kupita) ina ia manino le vaai. Ia malamalama le ala. Ia mautinoa e saogalemu. O lona uiga, e le na o le vaai, a ia iloa. Ia vaai ma maitau, ia iloa foi ma taofi mau. 

O tatou Samoa e lelei le vaai, ae faalēlelei lo tatou iloa. Ua tatou vaavaai i le tele  o galuega ma vavega ua faia e Iesu ia te oe ma lou olaga, oe ma lou aiga, o tatou ma a tatou fanau. Peitai tatou te le o lagonaina lea alofa o Iesu. Ua tatou le iloa le faamaoni o le Alii. O le mamalu ma le silisili ese o le Atua o loo faaalia ai lana amiotonu i lou soifua ma le siosiomaga o loo tatou ola ai, ua tatou le iloa!

E tāūa ona fai o se va. Ina ia manino le vaai ma faamasani ai. Ia iloa ma talitonu iai. Talitonu i Le ona le mana uma lava. O le ala i le mănava o le Ioritana, e le o se ala o le lalolagi. E le i tusia e ni inisinia. E le i su’ea i se poto faa tekonolosi. E le i suaina e ni masini. E le i miti’ia foi e se palolo. A o le poto sa foa ai le lagi ma le lalolagi i le amataga, ia outou talitonu iai. Ina ia outou iloa, e silisili ese lava le  Atua o Isaraelu. Ina ia outou iloa, e tasi lava le Atua. O Lē soifua pea lava pea. O Lē na osi feagaiga ma o outou tamā anamuā. Le Atua na te faia mea e finagalo lava ia iai. Ina ia outou iloa, e mafaia mea uma lava e le Atua. O ia na ia taitaiese mai outou mai Aikupito. O ia na vavaeina le Sami Ulaula. O ia na fafaga ma faainu outou i le vao. Na ia faamātūtū le ilitivai o le Ioritana, ina ia outou iloa, o mea fou ia mo outou. O le ala fou, e le i iai anamua. O le ala ofoofogia, e le i uia muamua e outou! 

Samoa e, e  tāūa le iloa. E faamatala e le iloa lou loto, o lau amio, ma lou talitonuga. O lona uiga, e faailoa e lou iloa lou tagata. 

Fa sefulu tausaga i le vao e le o se taimi puupuu. A ‘ua fia ni vavega ua faia e le Atua i lea taimi? E fia ni faailoga ofoofogia ua vaai iai Isaraelu? Ae faapefea ona e faamatala le iloa ma le le iloa e le nuu o ia galuega mamana a le Atua? 

A mā’ona, ua pese fiafia ia Ieova. Ae ‘a fia aai ma fia inu, ua sa’i ia Mose ma Arona. A fiafia ua vivii i le  Alii. Ae a vaivai ma tigaina ua faalilii. E fetaui loa ma puapuagā ta’uta’u  Aikupito. Ae a vaai i vavega ma le silisili ese o le Atua ua faafetefete solo tino. E lelei nei; a o taeao māsei. Vaiaso nei e salamō ai; a o le vaiaso fou amio faa sau’ai. O le mafiafia o ō latou loto; ua augatā ai o latou taliga e faalogo. Ioe, o le olaga lenā sa taumālua mai ai tagata o le Esoto. O si taimi itiiti e aga’i ai i luma, toe tifa! Alu i luma, tifa! Fai mai Iesu, “auā o lo latou vaai latou te le vaai ai (le iloa), ma lo latou faalogo latou te le lagona ai” (Mataio 13:13-14) O le faatonuga mo tagata o le Esoto, “ia fai se va e va a’i outou ma le atolaau. ‘Aua tou te faalatalata atu iai” Ioe e talafeagai ona faautauta i le maitauina o galuega uma a le Atua. Tatou te malolosi ai. E faatupuina ai lo tatou loto tele. E faamalosi ‘au ai ia te oe. Tatou te iloa tino ai mea e tusa ona finagalo ai le Atua. O mea e tatau ona faia, ma mea ua le tatau ona faia. O ala e tonu ona tatou savalia, ma ala e le tatau ona tatou uia. 

Samoa, pe fia kupita e va a’i oe ma le silisili ese o le Atua, ia e talitonu i mea uma ua ia faia mo oe ma tatou uma. Ia tatou lototetele e talia mea faigofie ma mea faigata, auā o loo iai le Atua i mea uma lava. Ia to’a lau silasila, ma ia silasila mamao. Ia manatua, o le faa tōfā mamao, o pu’e o mănū mo taeao. O le taga’i mamao poo le silasila mamao i lona uiga faa Samoa, o le seu silasila i le lumanai o Samoa lalovaoa. 

O fītā o le asō, e usua’i ai taeao i le pati ma le po. O le faaaunu’ua o ō tatou tua’ā ma lo latou masoe i le ala, o le mau tuufaasolo lea i lea tupulaga ma lea tupulaga. Ina ia outou iloa, o iai le Atua ia Samoa. Ina ia outou iloa, e ta’iala le Atua mo Samoa. Ina ia outou iloa, e faavae i le Atua Samoa. Soo se feau ma soo se galuega, soo se faamoemoe ma soo se tapenaga, ia fai fiafia ma ia malamalama, ina ia outou iloa ai le Alii ma lona mana. O faiva o le vao ma faiva o le gataifale; o feau ma tiute faatino i fafo ma fale, ia faia i le agaga solia ma le faapalepale, ina ia outou iloa le filemu o Iesu Keriso nai Ketesemane. 

O le toe upu Samoa. E suamalie mālō; ae sili ona viia le mălŏlŏ faatamālii; ina ia outou iloa, o ala na o lo tatou Alii

 

Amene

7737063/7783782

E-mail: petaiasetu@gmail.com

© Samoa Observer 2016

Developed by Samoa Observer in Apia