Manatu o le Fa’atonu - O Lesona mai le afi

156 Hits

Tusia - Mataafa Keni Lesa

Faaliliu e Seagaitumua Tupuola 


Ona o lea ua fai ifo le malosi o lagona ina ua tuana’i se afi mata’utia  lea na liu efuefu ai le maketi i Savalalo i le faaiuga o le vaiaso talu ai, atonu o le taimi lenei e matua silasila toto’a ai i nisi o lesona mai lea faalavelave. 

Ma o le pito lava i luga o le lisi e tatau ona faapea o le tilotilo lea i ala e toe faaleleia ai le tulaga gagatia e le Pulega o Auaunaga Tinei Mu ma Auaunaga tau Faalavelave Faafuase’i (F.E.S.A) e taofi ai se afi ua sasao mai.  

 Ioe o se mea lea  e tatau i le Pulega ona silasila i ai ma matou te faapea atua ma matou te faapea atu ma le faaaloalo e tatau ai- i le tautiga ma le galulue malosi o nai alii ma tamaitai tinei mu o Samoa. Matou te faailoa atu e faapea e anoano lu’itau o loo feagai ma le F.E.S.A. O ia lu’itau e aofia ai le le  lava o alamanuia, tupe, aufaigaluega i luga atu o isi mataupu.

Ae peitai-e le aveeesea ai e lena tulaga le mea moni o lo latou i ai-ia lavea’i soifua ma meatotino. O lona uiga-a itiiti mai- tatou te manatu o i latou ia e faatinoina lea tulaga mai lea taimi i lea taimi.

Mai se vaaiga lautele o le galuega a le Pulega ma a fua inisi o mataupu talu ai nei na tatou vaaia, e foliga mai o le latou galuega o le titina lea o le efuefu pe a mae’a ona matua faatama’ia se meatotino. O se tulaga lea e faanoanoa ai ona e le o le tulaga lea e tatau ona i ai. 

A lelei ona faatino mea uma e pei ona tatau ai ona latou faia, a itiiti mai e mafai e Auaunaga Tau Afi ona mafai- a itiiti mai-ona lavea’i nisi o meatotino. Ae peitai- e le o faapena se mea o tupu. Ma o le afi i le maketi i Savalalo i le Aso To’anai talu ai o se faata’ita’iga maoa’e lea. 

Ona o lena ua uma ona failoa atu lena tulaga-matou te talia e faapea e le mafai ona lavea’ina meatotino uma. O loo i ai isi mea e it ala atu a le pulega o auaunaga tau afi ma e leai se mea e mafai ona fai i ai.

 Ae mo le afi i Savalalo i le Aso To’anai talu ai, e le mafai ona fesoasoani atu se tasi ae lagona e faapea masalo sa tatau lava ona mafai ona taofi. Talu ai  ona o Auaunaga Tau Afi ua na o se selau mita le mamao ese, e mafai ona e manatu e faapea semanu e ese lona taunuuga. 

Ae ua le faapena ma ua tatou silasila uma lava i le taunuuga.

Ina ua sasaso lea afi i totonu o le fale, o le mea na matou vaaia e peiseai ua tuu atu lava le afi e fai lana faitalia se’ia malie ma o le tulaga tonu lena. 

O le faafetaia o le auaunaga tau afi, na latou faia le isi mea e sili ona lelei.  Sa tafatasi a latou taumafaiga i le taofia o le sasao o le afi mai le sosolo atu i isi fale. Matou te fai atu o le isi mea lelei lena talu ai semanu o se matua afi mata’utia lava pe ana ausia e le Tooa Salamasina Hall o loo latalata ane faapea foi ma le faleoloa tuai o 

Faatoaga. Ua aumai ai ia i tatou se manatu ua leva ona faapopoleina ai tatou talu mai le vaiaso talu ai. E faapea e le’i ‘ausia e le afi ia fale, ae faamata e mafai e le Pulega o Auaunaga Tau Afi ma Faalavelave Faafuase’i ona taofi?  Faapefea pe    ana sopo’ia e le afi le auala ma faaumatia le  fale o MacDonald ma isi fale o loo latalata ane? 

E faapefea pea na o le vaega e i ai Eveni Carruthers na mu? E faapefea pea na faapea o le fale o le malo i le Eleele fou?  E mafai e lenei atunuu ona tali i sea ituaiga o faalavelave?  

Ia ‘aua ne’i outou aveseseina i matou, matou te faafetaia le manatu o loo feagai le F.E.S.A ma le anoano o lu’itau i le faatinoina o lana galuega. 

Aepeitai o lo’o o tatou popole i le saogalemu o Samoa ma le mafai e gafatia ai ona o latou tauaveina lea pito la’au. A le mafai ona fai se vaifofo i lea tulaga e ono avea ma papala i le lumana’i.

O le maitau atu ai i le Aso To’ona’i e pei ona mavae atu e tele lava se vaega e ao ona toe faia.

O le fa’ateleina ai o vaega o le taulaga e mafai ona utuina ai le vai o le mea lea e ao ona fa’atinoina muamua on a o le taua i le galuega fa’afuimu.

O le mea lava e ao ona manatua o le suavai e taua tele mo le tapeina o le afi a leai se suavai e leiloa po o le a le aoga o loli o lo’o fa’aaogaina mo fa’alavelave nei.

A o’o i le taimi e sasao ai le afi e leai se avanoa e tu’uavanoa ai le afi i galuega a le aufuimu – o lona uiga a’o latou fetamoea’i ai mo le aoina o le suavai e o’o mai i le taimi e taunu’u ai le nogfoaga o lo’o tupu ai le fa’alavelave ua fa’aumatia uma vaega nei i le afi.

E tele ina o tatou molimauina lea vaega i le tele ma le tele o taimi ma e ao ona vave faia ai loa se vaifofo.

E ese mai ai le afi o lo’o i ai fo’i le agaga mo le a’oa’oina lelei o le aufaigaluega pe a tula’i mai fa’alavelave tau mu.

O le tele ma le anoanoa’i ai o fagu kesi i le Maketi i Savalalo ua o se tulaga e leai ma sona saogalemu o i ai.

E ao lava ona i ai ni Tulafono aemaise o ta’ialai mai le ave’ese mai o vaega nei aua le saogalemu o tagata lautele. I le maitau atu ai i ‘fagu kesi’ e ao ona a’oa’oina lelei fo’i tagata i vaega taua e ao ona malamalama lelei ai i le fa’aaogaina o vaega nei – ma o le mea moni e to’atele i latou o lo’o fa’atamala tele i le mata’ituina o vaega nei. 

O lea vaega tele e pei ona tula’i mai o lo’o ua i ai ma se va’ava’ai atu i le ao ai lea ona fa’avava tetele avanoa i le tele o le mau fogafale aemaise lava i totonu o le taulaga. E le fa’ailoga tagata le afi, a o’o lava i le taimi e tula’i mai ai e fa’aleagaina uma lava vaega uma.

 

O le fa’ata’ita’iga lelei lava o lo’o o le Maketi i Savalalo.

 

A’o fai malologa ai i lenei aso – tatou talosia le to’atele o i latou na ‘a’afia a latou pisinisi ona o lea fa’alavelave ae le gata i lea o le mau fesoasoani e pei ona ua tu’uina mai e le malo ma isi aua i latou ua ‘a’afia e le afi.

Aepeitai e le tu’ua lesona masani e ao ona a’oa’oina lelei mai ai ona o lea malaia mata’utia i le Maketi Savalalo.

Ia manuia tele Aso Sapati ma saga fa’amanuia le Atua!

Faaliliu e Seagaitumua Tupuola


© Samoa Observer 2016

Developed by Samoa Observer in Apia