Tusi i le Fa’atonu - Aua le Taua le Moa ae le’i Fofoa

206 Hits

E muamua lava ona ou faatulou atu Samoa, aua o Samoa ua uma ona tofi. O ona tofiga uma e tofi mai le Atua. Manatua le malelega a Nafanua tali i lagi Samoa se ao o lou Malo. Lona uiga o le Ao Mamalu, Alii Palemia o Ta’ita’i uma o le atunuu. O Faauluuluga o Matagaluega uma Malo. O tagata ua faamanuiain e ala ia latou pisinisi. Po’o le a lava lau mea o fai i lau taleni faapitoa. O Tofiga uma na tofi ai i tatou e le Atua o lau taleni na foai mai e le Atua. 

Ae sa ou faitau i le Pepa so Lulu 13/1/16 o le ulutala ua tatau ona Malolo le Palemia o le Fa’aaliga lea a Afualo Salele. O lona uiga ua fesiligia e Afualo le tofiga mai le Atua. 

Ae pe faapefea o ia. Afai ua fia malolo fai sina malologa. O le mea ou te ofo ai, o le tele o folafolaga ae leiloa pe toe ofi mai i le Palemene. 

Ua tele tou faatosina ua fai mai i luma o le atunuu lautele. Ae e leo le atunuu e palotaina mai. 

Sa tatau o alii e faatosina i lona itumalo. 

Fai faalelei tagata o lona Itumalo, fai mea e manana’o ai tagata. Fai ni teugatupe e faaaooga ai fanau a lona Itumalo. Fai se Falema’i e vaai fua ai tamaiti ma tagata matutua o lou Itumalo ma alu i Fono o le Itumalo i Vaiaso uma. Fai faalavelave, e pei o Maliu a so’o se tagata o lona Itumalo. Fai taulaga i Ekalesia um ape fia lava Ekalesia i totonu o lona Itumalo fai iai ni au taulaga ae le na o le EKalesia e te lotu ai. O Faipule na alofa moni i lona Itumalo a faiuma faatosina na i lou itumalo e le taumate lou toe pale mai i le tofi. 

Ou te fautuaina uma ai faipule o le Tautua Party. O e fai mea na i outou Itumalo ae aua le alu le taimi e faaali mai ai outou manatu i le TV, Nusipepa. Ae o muamua e faalelei o outou itumalo. E le taumate le tou papale mai i le palota o loo loma nei. 

Fai muamua mea lelei i outou itumalo, fesoasoani i pili o aoga a fanau. Fesoasoani i e mama’i, fai faalavelave a aiga uma, lafo ni tou taulaga i Ekalesia uma i totonu o outou itumalo. Ona e sauna lea e te toe foi mai i le Palemene. Ae a e le faia le galuega lena o lona uiga e taumate lou toe foi mai ma vaai poo iai ni a outou aitalafu ini faletupe. Se tau togitogi a outou loans. Ae le o le taufaaali manatu i tupe lautele. Ao lo’o palapala outou suafa i Faletupe. Le taitai o le Tautua ua fai au faasilasilaga a outou tulai mai o le a aveesea Komiti Faufautua. Ae galo ia te oe, ua leva tausaga o e HRPP sa fai fo’i ou Komiti mai i lou Itumalo. O lona uiga ua leva ona e gugu, ae le faaali sou manatu i Palemia i lena vaitaimi. Ao lea ua faatoa maua ni ou manatu ua e ta’ita’i i le Itu Agai. Ae ia manatua lelei o tamali’i, faleupolu o Itumalo uma o le Atunuu. O lo’o galulue punoua’i i a latou tofiga na tu’u iai e galulue ai ma toe ripoti atu i le malo. Ma fautua i le Malo i mea e lelei ai le atunuu. O latou fai ia o lo’o filemu ai Samoa e ala i totonu o Alalafea ia latou pulega faamatai. E leai seisi e ula iai i Pulega faamatai o le tagata lava e faataute’e, faasala. A le faia faasavali ese ma le nu’u. O latou foi ia e fautua mo se tofi e oso i le Palota. Na o mai matai e faamaonia le sui o le a Resitala mo le Itumalo. Latou te fautuaina foi lona aiga mo le Sui e palota iai o latou foi oi ai le Pule latou te aveesea ai se sui e le’i tautua i le nu’u, e leai ni monotaga na faia. O latou fai e iai le aia tatau latou aveese se tagata e faataute’e Ali’i ma Faipule, Faleupolu o se Nu’u. 

Oi a’o lea ua e faatauvaaina i latou i lou manatu. Ua e manatumama ia i latou. O lona uiga ua e manatumama foi i tamalii ma Faleupolu o lou Itumalo. Afai la e te tulai mai e avea oe ma ta’ita’i o le Atunuu o ai la e fautuaina lau faiga Malo. O lou le Alofa foi lena i Malo o le Malo pe a faataute’e ma Itumalo. Aua lena e te le mana’o i Komiti faufautua, ua outou fai mai o Atina’e soona fai. Ao lea e fiafia iai le Atunuu lautele i auala. Ai pe tiga o outou mata pe a outou loto i mea ua outou vaaia. Ia faia ni mea lelei e fiafia atu ai le atunuu ia outou. Ae aua le tau faaleaga. Ua na o le Atua e silasila i le loto o le tagata soifua. Afai ae tou tulai mai fai ni penifiti a tamaiti i le tasi le tausaga i le 20 tausaga. 

E pei o atunuu i fafo ae tuu ia le penisione o loo faaauau pea i le nei taimi. Faamagalo mai le auauna pe afai ua la’avale se upu. 

 

Soifua 

Paletasala T

© Samoa Observer 2016

Developed by Samoa Observer in Apia