SE’I O TA TALANOA

187 Hits

A SIPA LE LAMAGA –E FANO MALOLO! 

Tatou te viia pea le alofa ma le agalelei o le Atua-ona ua tatou aulia manuia mai foi le aso muamua o lenei vaiaso -o lo outou soifua Samoa ma so matou ola. Ua mavae atu lena vaiaso o le tele o fe’au ma galuega sa feagai ai-ma o lea ua tatou aulia manuia lenei Aso Sa. 

E ui foi ina sa feagai nisi o le atunuu ma mala ma puapuaga i lena vaiaso ona o faalavelave ma mea tutupu faafuase’i-aemaise ai o le maliu ma le oti-ae faafetai e le o tuulafoa’ia i tatou e le Atua-e ala i Lana faamafanafanaga i aiga faanoanoa, o matua, uso ma tuafafine ma fanau pele. Ia fo’i atu pea le Viiga ma le Faaneetaga i le Atua o loo faavae ai le Malo Tuto’atasi o Samoa. Ae alo maia- o lena ua i luga le ulutala o le tatou Talanoaga mo lenei Aso Sa-ma e i ai le manatu- o se ulutala malamalama! 

Ae afai lava e moomia sina faapulapula teisi- e mafai lava ona ‘ou fesoasoani atu! Ae lelei ona faamanatu atu muamua le itu taua lenei! O lenei tusitusiga e pei ona faailoa atu pea- e le o se tala fatu; e le o se faaleaga pe o se faaoloataua-ae o le fia faailoa atu lea o mea uma o loo tutupu i lo tatou atunuu ma le pogai ua tutupu ai- ona tatou talanoa faatasi lea i ai-aumai so outou finagalo avatu so matou taofi-ona tuufaatasi lea ma taumafai ai se faiga e mafai ona fo’ia ai-talu ai- o mea uma lava o loo tutupu-aemaise ai o mea leaga-o le atunuu lava e sili ona aafia ai! Ia-o lena ua i luga le ulutala o lenei talanoaga fai mai-“A sipa le lamaga e fano malolo….! 

A toe faaupu la ina ia malamalama atili le ulutala o lenei talanoaga-ona faapea lea-“A leaga le moli o le lama-e leai se malolo e maua.”  

E mafua ona o le faiva lenei- e faamoemoe tele i le lelei o le moli! Aisea? E mafua ona o le malamalama o le moli- e tosina mai ai le i’a lea o le malolo-i le vaa! Afai la tatou te faaaoga lea ulutala i le faigamalo o loo i ai nei ma aga faiga-ona faapea-“A manino ma malamalama le faafoeina o le malo o le atunuu-ona leai lea o se afu e maligi fua poo se malosi o le atunuu e maumau! 

A toe faaupu ina ia malamalama atili-ona faapea lea- a manino ma malamalama le faafoeina o le malo-ona manuia lea o tagata uma! O lea ua ua tatou alo atu mo le Faiga-Palota ia Mati o le tausaga nei-ae a tatou toe tilotilo i tua ma le faafoeina o le malo o le atunuu- e faitau miliona ma miliona tupe a le atunuu ua maumau i faiga pi’opi’o a le Malo. O ia tupe- o tupe o le afu maligi o tagata faigaluega o le atunuu e ala i lafoga e tipi mai o latou totogi-ma lafoga e toe totogi e le atunuu atoa e pei ona faaopoopo i luga o oloa. 

Ana faapea la e leai ni faiga pi’opi’o a le Malo-e faapenei ua matua manuia le atunuu! Ae o le mea ua tupu- “au sipa le lamaga a le Malo ae fano ai malolo poo le atunuu! O lona uiga-e leai se mea e tasi mo le atunuu na maua mai na faaletonu ma faiga pi’opi’o! Ia o lea ua toe o se aga ona aulia lea o le faiga-palota lautele a le atunuu e saili ai ni ona ta’ita’i fou! 

O le fesili la-o le a le mea e tupu i le atunuu pe a faaauau pea ona pulea e ni ta’ita’i faapenei? O le a sou manatu- e maua ai se manuia o le atunuu? Afai ua savali i le 40 tausaga o faafoe e lenei faigamalo le atunuu-ae leai se manuia o maua ai-e mafai la ona e fai mai e manuia le atunuu pe afai e toe foi mai e faafoe le atunuu? Afai na sipa le lamaga ma lo latou faatautaiga o le atunuu i lea taimi umi ua mavae-e faapefea la ona toe sui le latou faatautaiga o le atunuu i se mea e manuia ai? O lea foi ua toe faafofoga le atunuu i le anoano o folafolaga-ae o folafolaga foi ia na fai i le lima tausaga talu ai-ae leai lava se mea o faia! E mafai la ona maua se mea e mafai ona tua i ai le atunuu? Afai e i ai- o ai la e mafai ona faatinoina lea tulaga? 

O le tali- o tagata palota lava e faia le tonu! O lona uiga- afai ua tatou matitiva moni-e te le tau faatali se’i sau se isi e fai! O oe lava e te faia le tonu e te manuia ai poo le tonu e te malaia ai. Ae ia manatua lelei la le itu lenei-o le palota e te faia-e faalagolago i ai le manuia ma le malaia o lou aiga. 

O lona uiga-a sa’o lau palota-ona manuia lea o oe –o lau fanau ma lou aiga! Ae a sese lau palota- ua tofu i Seoli lou aiga ma lau fanau. O le tolusefulu ma ona tupu tausaga talu ai- e le o se taimi puupuu-o se taimi umi. O lona uiga-o le umi foi lena o le taimi na e pologa ai ma pologa ai lou aiga! Afai la e te fia vaai i se aiga manuia ma se fanau manuia-o oe e te faia lena tonu ae le o se isi. 

Afai e ta’i 5 tausaga ma fai le Palota-o se taimi umi na’ua! 

O le pogai lena e tatau ai ona e matua faautauta lelei i le faaaogaina o lau palota. Palota i le mea e te manuia ai ma lou aiga. Afai o maua ni au tupe i le taimi nei-e te le toe maua na tupe pe a uma le palota! O le mea lea-e toe faamanatu atu ai  le tatou ulutala-“A sipa le lamaga e fano malolo” O lona uiga a sese lau filifiliga-e fano lou aiga! O le a sou taofi? Tusi mai e faailoa mai lou finagalo! 

© Samoa Observer 2016

Developed by Samoa Observer in Apia